Nagsisimula na naman ngang gumiling ang kamera para sa pinakabagong pelikulang pinagtatambalang muli ng loveteam nina MAJ. Mala-Only You ang Hey Babe na bagong movie ng dalawa. Unlike sa Labs Kita...Okay ka Lang? na siyang launching movie of their loveteam, aminado si Jolina na hindi pa sila ganoon ka-sweet ni Marvin tulad noong ginawa nila 'yung last movie nila.
"Well, 'yung sweetness naman kasi, hindi mo naman 'yan maipipilit sa isang tao na gawin niya, 'di ba? Although, si Marvin naman, nandiyan pa rin naman siya. Kapag ano... nag-aalok pa rin siya ng mga pagkain. Sweet pa rin naman siya, sweet pa rin naman kami, 'yun nga lang, hindi mo pa masasabing kasing-sweet tulad noong ginagawa pa namin 'yung Labs Kita. And natural lang naman siguro 'yun, mahaba pa naman ang pagsu-shoot namin ng movie. In fact, kakaumpisa pa lang namin. So hayaan na lang natin, ako kasi, mas gusto ko 'yung hindi pilit. Mas gusto ko 'yung natural yung maging dating. mas maganda kasi 'yung results kapag alam mong natural niyong ginagawa," sey nga niya.
Sa palitan ng salita ng dalawa, mahihimigan ninuman na kahit papaano, gusto na rin nilang mawala 'yung namagitang intriga sa kanila. At least nga naman even for their loveteam or sa pelikulang ginagawa nila.
"Loveteam kasi kaming dalawa ni Marvin, eh. Hindi mo na siguro maiaalis 'yun kahit pa nga sabihin natin na nakakagawa rin naman kami on our own. kagaya ko, alam naman siguro ng lahat na nakakagawa ako ng album at nakakagawa rin kami ng shows na hindi kaming dalawa ang magkasama, pero kumbaga, loveteam pa rin kami. kaya nagtataka na nga lang din ako kapag may nagsasabi na hindi na raw kami gagawa ng movie. O kaya naman, kapag may nagsasabi na ayaw nang pumayag ng daddy ko na magkasama pa kami sa movie as a loveteam. Kung ganoon pala, bakit heto at may Hey Babe kami, then, meron rin kaming Gimik the Movie. So, hindi talaga totoo," paglilinaw pa rin niya.
Eh yung idea na ipa-partner siya kay Onemig, anong sey niya roon?
"Hindi ko pa masasagot 'yan. Sila naman ang masnakakaalam kung ano ba 'yung makakabuti. Siyempre depende pa 'yan. Titingnan muna kung okey ba 'yung plano. Pero, sa ngayon, kung loveteam talaga, si Marvin pa rin 'yung masasabi kong loveteam ko dahil kami 'yung may pelikulang ginagawa."