This Text file is old! In a ��Museum, an unsorted archive of (user-)pages. (Saved from Geocities in Oct-2009. The archival story: oocities.org)
--------------------------------------- (To 🚫report any bad content: archivehelp @ gmail.com)

RIA MS C.i.2 fo. 24, apud ZCP 7 p.307-8


   Brugaid cétach comrumach bói isin leith iartharaig do Chonnachtaib
darsat (sic) comainm Crechán Ciantestach mac Angaile 7 isí ba bancéile
don brugaid sin .i. Cianóg. Ingen Í Cicharáin .i. aircinnech Etargabla a
crích Lughna an Cianóg sin 7 ní bái ní a n-easbaidh acht a mbeith can
gein meic nó ingeine. Ocus roaitc[h]etar næma 7 érluma ac troscad 7 ic
iaraid  cloinne do cait[h]im a comorbaise 7 ní fhuairutar a n-inat da
næmdacht an athcuindce. Condubratar aroile oidc[h]e ina n-imdaigh 7 ina
n-ardlebaidh: "As olc immorro" for siat "cen mac nó ingin acuind 7 imad
mait[h]esa linn". (fo. 24b) Condebairt Creachán re Cianóig: "Atá senóir
cráibdech a faidhc[h]e Sogain Sálbuidhi  .i. I Clúain  Caraill .i.
Cairell Sen mac Curnáin meic Tréna meic Finnc[h]ada meic Náir meic Erca
meic Tipraiti meic Soghain Sálbuidi meic Fiachrach Araidi 7 is é in
Cairill sin indara Pádraig in c[h]úigid sin. Úair gach inad inar deimin
le Pádraig bendachad do C[h]airill, nírbennaigh  féin ann 7 éirc-siu dó
7 troisg aige ocus dogéba h'ícce úada." 
   Acus tánic Cianóg co Clúain Cairill 7 rotroisg fo t[h]rí re Cairill
isin cathraigh 7 rotroisg Cairell lín a teglaigh do cumnam  le Cianóig
.i. secht næm ar déc 7 secht cét náem, rob íat sin tra muinter Cairill
do bunad, ocus táinic Cairell co Cianóig d'innisin a uirigill ó Bictar
aingel  tar éis a treidenais . 
   "Docuamair-ni tra" for Cairell .i. derbch ar in dúilema[i]n 7 ic a
cantain fria Cianóig secht náim déc 7 secht cét do iaraid  toirc[h]esa
do thecmáil duit 7 ní fúaramar uile a beith "na mac 7 ó nach fúaramar
tra itá nem can athc[h]eód dot anmain. Ocus imthig do[t] tig 7 teicémaid
toirc[h]es duit ocus béra dá ingen .i. ingen I tosaigh  oi[d]chi 7
tabair Osnadh d'ainm uirri. Ocus fáifidh in Osnaid sin re Erchad mac
Murchada 7 béraid sin ingin  .i. Bébinn ingen Erchaid, conid iside bérus
Brían Bóruma mac Cinnédig 7 secht meic coscracha Cinnédig arcena. Ocus
fáifidh ina diaig sin la ríg mBoirne Mæl[sh]echlainn mac Arga, conad  í
bérus dá mac maithi dó .i. Lochlann 7 Concubur ó mbiat Húi Lochlainn 7
Húi Conchubuair na crích sin. Ocus an ingen bért[h]ar deradh oidhche,
tabair Creisi fuirri 7 fáifidh in Cresin la Tadg na trí tor 7 béraid trí
maccu dó .i. Concubur 7 Mælrúanaid 7 Muredach." Ocus tosach a baile an
aidc[h]e sin ar n-imtecht do Cianóig da cathraig, conid ed asbert: 
     Síl Bébinn for Boirinn báin. síl Cresi a Crúachain comláin
     gach æn díb da ragha rim. ní bía I rígi co foiltfinn.