KUMALABIN APAT NA SIMBA ED ORDINARION PANAON (B)
9 HULYO 2000
ONONAN BABASAEN Ez. 2:2-5Babasaen ya inaon ed libro na propita Ezekiel
Linmoob ed siak so ispiritu na Dios tan impaalagey to ak, insan ko nadngel nin nansalita imay bosis, "Sika a toon ompatey, ibaki ta ka ed saray totood Israel. Linmaban irad siak tan sinumpa ra ak tan itutuloy day onlaban ed siak, a singa ginawa na saray lalaki ra. Anawet so olo ra tan ag da ak gagalangen, kanyan ibabaki ta kan mangibagad sikara na labay kon ibagad sikara, siak a Katawan a Dios. Dengelen ka man o andi na saraman a totoon mananumpa ed siak, naamtaan da a sakey a propita so nibakid sikara."
Salita na Katawan.SALMO RESPONSORIO
Ebat: Akanengneng ed Katawan iray mata mi, ta onkekerew kami na panangasi to.
1. Katawan, ontatangay ak ed sika, ditad tawen a panooleyan mo. No panoy paniilalo na aripen ed amo ton laki, E.
2. Kasian mo kami pa, Katawan, kasian mo kami; ontan lay impakababalaw mi! Abayag lay impanlelemlemew ed sikami na saray mamayaman, tan say impanbabalaw na saray maruksan mapaatagey. E.KUMADWAN BABASAEN 2 Cor. 12:7-10
Babasaen ya inaon ed kumadwan sulat nen Pablo ed saray taga Corinto
Pian ag ak lalon mampaatagey lapud saray impuyan ed siak na Dios a makapakelaw iran bengatla, naitdan ak na sakit a liliknaey laman ko, a pinagkalewet nen Satanas a pamairap tod siak, pian ag ak magmaliw a mapaatagey. Amitlok ya impikasid Katawan ya ekalen to yan sakit, balet onyay ebat to: "Say baleg a panangarok labat so nakaukolan mo, ta say pakayarik et sankabiskegan ya ontulong no makapoy ka." Malikeliket ak sirin a mangipasirayew ed saray kakapoyan ko, pian naliknak so panangyagel ed siak na pakayari nen Cristo. Kanyan no say makasengeg et si Cristo andi balin makapoy ak, napabaingan, napaermen, napasegsegang, tan napairap ak. Ta no kapigan a makapoy ak, diman ak mabiskeg.
Salita na Katawan.Alleluia
E. Alleluia. Siak so dalan, say katwaan, tan say bilay, kuay Katawan; anggapoy toon makaonlad Ama no ag diad panamegley ko. E. Alleluia.IBANGHILYO Mar. 6:1-6
Babasaen ya inaon ed masanton ibanghilyo onung ed kinen Marcos
Tinaynan nen Jesus iman a pasen, tan pinmawil ed baley to a kaolup to ray disipulo to. Kasabiy Agew na Panagpainawa, ginapoan toy nambangat ed sinagoga. Amayamay ed saray totoon wadman so mankelaw nen sikatoy nadngel da. Inkuanda, "Iner kasiy angalaan to yan too na saraya? Nanasulan to kasi na onya lan kakabatan? Panoy pakagawa to na onya la ran milagro? Aliwa kasin sikato ya may karpintiro, ya anak nen Maria, tan sikatoy agi di Santiago, Jose, Judas, tan Simon? Ag ta manaayam ira diay agagi ton bibii?" Sikatoy ag da sirin sinisia.
Inkuanen Jesus ed sikara, "Gagalangen na karaklan so sakey a propita, balet ag gagalangen na saray kabaleyan to, kakanayon to, tan anggan say dilin pamilya to."
Kanyan ag to akagawad man na milagro. Anggaman ontan, intatapew toy lima tod pigaran mansasakit tan pinapaabig to ra. Mankelaw a maung lapud ag da panisiad sikato.
Linman nambabangat si Jesus ed kaliber-liber iran bariod man.
Ibanghilyo na Katawan.