ONONAN BABASAEN Amos 7:12-15

Babasaen ya inaon ed libro na propita Amos
 
Insan inkuanen Amasias ed kinen Amos, "Tonda ka la, propita!  Pawil ka lad Juda tan diman ka la mampulong.  Pabayaran kad sikarad man ed pampulong mo.  Ag ka la dia mampropropisiya ed Betel.  Sikato yay pasen a panangigalangan na ari, say timplo ed intiron bansa."

 Inmebat si Amos, "Aliwa ak a propita odino anak na propita.  Managkomponi ak na saray karniro, tan managasikaso ak na kakiewan na igos.  Balet say Katawan inekal to ak ed kimey kon pumapastol tan ingganggan to ya onla ak a mampropisiya ed saray totoo ton Israel."

Salita na Katawan.

SALMO RESPONSORIO

Ebat: Katawan, ipanengneng mo pad sikami so panangasim, tan itdan mo kami pay panangilaban mo.

1. Onderengel ak ed ibabagay Dios a Katawan; isispan toy kareenan ed sikatayon dilin totoo to, no ag ti la pawilen so kaogsan tayo.  Peteg a sipaparaay Katawan a mangilaban ed saray mangigagalang ed sikato, et mansiansia ed dalin tayo so manangilaban a kiwawala to. E.

2. Manabet so panangaro tan inkatoor; ontan met a manlakapan so inkatonung tan kareenan.  Say inkatoor na too ontangay manlapud tapew na dalin, tan say inkatonung na Dios onosdung manlapud tawen. E.

3. Say Katawan paaligwasen to itayo, tan say dalin tayo mambungay daakan.  Manonaan ya onlad arap na Katawan so inkatonung, tan iparaan toy dalanen na Katawan. E.

KUMADWAN BABASAEN Ef. 1:3-14

Babasaen ya inaon ed kumadwan sulat nen Pablo ed saray taga Efeso

Nagalang komuy Dios tan Ama na Katawan tayon Jesu-Cristo, ta initdan to itayo na amin a maispiritun bindision ed katawenan, lapud pikakasakey tid Cristo.  Diad sayan pikakasakey tid Cristo, say Dios pinili to itayo la, kasakbayan ya apalsay mundo, pian magmaliw itayon masanto tan anggapoy pakabalawan ed arap to.  Lapud panangaroy Dios, inggana to itayo lan magmaliw ya anak to diad panamegley nen Jesu-Cristo.  Sikato yay linawa tan getmay Dios.  Igalang tayo lapud makapakelaw a panangaro ton inter tod sikatayo diad panamegley na inararo ton Anak!

 Arondon itayo la diad panamegley na dala nen Cristo tan diad ontan, apirdona la ray kasalanan tayo.  Agaylay kabaleg na panangaroy Dios, ya inter ton ag nasabsabaan ed sikatayo!  Onung ed kakabatan tan pakatalus na Dios ginawa to so ginetma to la nen saman tan impaamta tod sikatayoy maamut a plano to a sumpalen ton sumpalen diad panamegley nen Cristo.  Sayan planoy Dios a sumpalen to no onsabi lay manepeg a panaon et say pangipasakey tod Cristo na amin iray pinalsan walad tawen tan dalin.

 Amin a bengatla nagagawa onung ed plano tan linaway Dios; tan pinili kamiy Dios a totoo to diad pikakasakey ed Cristo, onung ed getma tan plano to nanlapu lad gapo.  Sikami sirin ya onaan a nanilalod Cristo, itanduro niy kagalangan na Dios!

 Ontan yo met a nen nadngel yoy tuan salita, salanti say Maung a Balita ya angiter ed sikayoy kilalaban, anisia kayod Cristo, tan minarkaan kayoy Dios a kayaryan to diad impangiter tod sikayoy insipan ton Ispiritu Santo.  Say Ispiritu so kaletan ya awaten tayo so insipay Dios ed saray totoo to, tan impailalo to a say Dios itdan toy nagnap a kawayangan iray totoon kayaryan to.  Itanduro tayoy kagalangan na Dios!

Salita na Katawan.

Alleluia
E. Alleluia.  Say salitam, O Katawan, et katwaan; pasanto mo kami pa diad panamegley na katwaan.  E.  Alleluia.

IBANGHILYO Mar. 6:7-13

Babasaen ya inaon ed masanton ibanghilyo onung ed kinen Marcos

Tinawag to ray labinduan disipulo tan imbaki to ran sanderwa.  Kasakbayan to ran imbaki, initdan to ray pakayarin mamaekal na saray maoges ya ispiritu tan binilin to ra, "Ag kayo manaawit na antokaman diad pampulong yo, likud labat ed baston.  Ag kayo anggan manaawit na tinapay, bayung, o kuarta.  Nayarin mansandalya kayo, tan duga lay sakey a kawes yo."  Imbaga to nid sikara, "Manayam kid abung a pamatuloyan dad sikayo, anggad ag yo isiput ed saman a baley.  No onsabi kayod pasen ya anggapoy toon mangawat o ondengel ed sikayo, taynan kid man tan pokpok yoy dabuk ed saray sali yo, a tanda na maoges a ginawa ra."
 Linma sirin iray labindua a nampulong na pampatauli da ray totoo ed saray kasalanan da.  Dakel iray pinapaekal dan dimonyo ed saray totoon inaaponan.  Dakel met iray mansasakit a pinopoyukan day larak, tan pinapaabig da ra.

Ibanghilyo na Katawan.