KUMALABINANEM A SIMBA NA ORDINARION PANAON
23 Hulyo 2000

ONONAN BABASAEN
Jer. 23: 1-6

 Babasaen ya inaon ed libro na propita Jeremias

Makapataktakot so isintinsia na Dios ed saray manoley a manederal tan mangikakayat ed saray totoo to.  Sikato yay kuan na Katawan a Dios na Israel nipaakar ed saray manoley a sikara komuy angasikasod saray totoo to, “Intaytayak yo ray totook tan pinataynan yo ra; ag yo ra inasikaso.  Dusaen ta kayo natan lapud saray maoges a ginagawa yo.  Tiponen ko ray totook ya akeraan manlapud saray bansan angikaykayatan kod sikara, tan ipawil ko rad dilin dalin da.  Nawalaan iray amayamay ya anak tan ondakel so bilang da.  Manoro ak na saray manoley a manasikaso ed sikara.  Ag la rad satan ontakot odino nataktakot, tan anggapod sikaray nabalang.  Siak, say Katawan, so nansalita.”

Say Katawan kuanto, “Onsabiy panaon a mamili ak na ari a matonung a kabyangay boleg nen David.  Sayan ari manoley a sikakabat tan gawaen tod intiron dalin so katonungan tan kaptekan.  No sikato so ari, arawid kaatapan iray totood Juda, tan mambilay ed kareenan iray totood Israel.  Natawag na, “Say Katawan a kilalaban tayo.”

Sikato yay Salita na Katawan.

Ebat a Salmo
Sal. 23:1-3/3-4/5/6

E. Say Katawan so managpastol ed siak; walad siak so amin a nakakaukolan ko,

Say Katawan so managpastol ed siak; amin a nakakaukolan ko walad siak.  Pampapainawaen to ak ed saray malambut a dika, tan iyaakar to ak ed mareen a danum.  Papasimbaloen toy biskeg ko.

E. Say Katawan so….

Iwawanwan to ak ed saray maptek a dalan, onung na insipan to.  Anggan sankabilongetay dadalanen ko, ag ak ontakot, ta wala kad abay ko.  Say baston tan say pekpek mo iyaagel da ak.

E. Say Katawan so…

Mangipaparaan kay ponsia a para siak, a pakanengnengan ed siak na saray kalaban ko; maliket so pangaawat mod siak, tan malepwa so pamapanom na kupak.

E. Say Katawan so…
Andi –saew a say kaabigan mo tan say panangarom et mansiansiad siak legan kon mambibilay; tan ando lan ando a manayam ak ed abung mo.

E. Say Katawan so…
 

KUMADWAN  BABASAEN

Babasaen ya inaon ed sulat nen Pablo ed saray taga Efeso

Lapud pikakasakey yod Kristo Jesus, slkayo ran gendat ya arawi, niasingger kayo lad diad panamegley na dala to.  Ta si Criston  dili so manangiter na kareenan tayo, ta impankasakey to ray Judio tan saray Hintil.  Ta si Criston dili so manangiter na kareenan tayo, ta impankasakey to ray Judio tan saray Hintil. Tinebag toy padir a makasengeg na impansian tan impankolkol dan dua.  Diad panamegley na laman to inekalan toy biskeg so Ganggan a pati saray bilibilin tan saray totontonen, pian nagawa ton saksakey a balon tipon na totoo iray duaran bansa diad pikasakey dad Kristo, et diad ontan manoley so kareenan ed sikara. Lapud impatey tod krus, pinatonda toy kolkolay duaran bansa, pinapawil to ran duad Dios, tan impankasakey to rad saksakey a laman.  Linma diay Cristo tan impulong toy Maung a Balitan mangiiter na kareenan ed amin a Katoowan-diad sikayo ran Hintil ya arawid Dios, tan diad saray Judio, ya asingger ed Dios.  Lapud si Cristo, Judio  man o Hintil itayo, makaasingger tin amin ed Ama diad panamegley na sakey ya Ispiritu.

Sikato yay Salita na Katawan

Alleluia
E. Alleluia.  Mansalita ka,  O Katawan; onderengel so aripen mo!  Walad sika ray salitan mangiiter na bilay ya andi-anggaan.  E.  Alleluia.

IBANGHILYO                         Mar. 6:30-34

Babasaen ya inaon ed masanton ibanghilyo onung ed kinen Marcos

Pinmawil iray apostol ed kinen Jesus tan insalaysay dad sikatoy amin a ginagawa tan imbangat da.  Diad gaway karakel na totoon onsasabi tan onsisiput, ag naarap nen Jesus tan saray disipulo to so mangan.  Kanyan kuantod sikara,  “Onla tayod sakey a pasen a pakapambukbukoran tayo, ta pian makapampainawa kayoy daiset.”  Nambaloto ran linmad sakey a pasen ya ag natotoowan.

Anggaman ontan, dakel iray akaimanod itaynan da tan abirbir da ra.  Kanyan saray totoon nanlapud amin a baley mambabtik iran linmad lugar ya arapen nen Jesus tan saray disipulo to, ta akaona ni ran sinmabid man.  Kasakbit nen Jesus, anengneng toy dakerakel a totoo.  Kaskasian to ra, ta singa ra karniron anggapoy pastol.  Binangatan to ra sirin na nambabangil a bengatla.

Sikato yay ibanghilyo na Katawan.