ONONAN BABASAEN 2 Ar. 4:42-44

Babasaen ya inaon ed kumadwan libro na saray Arari
 
Walay toon sinmabin nanlapud Baal-salisa.  Inawitan toy Eliseo na duamplon tinapay a ginawad ononan inani a sibada ed saman a taon, tan pigaran kapanggetel a dawa a nikargad sako.  Imbaga nen Eliseo ed samay aripen to ya ipakan to ya ed saray propita, balet inmebat imay aripen, "Onduga ya kasin kanen na sanlasus a totoo?"
Inmebat si Eliseo, "Isaklang mod sikara, ta imbagay Katawan a mangan ira, et wala niy nakeraan."  Kanyan samay aripen insaklang tod sikara, et angan iran amin tan wala niy akeraan onung na imbagay Katawan.

Salita na Katawan.

SALMO RESPONSORIO

Ebat: Papakanen itayo na limay Katawan; iiter ton amin iray nakakaukolan tayo.

1. Katawan, idayew ka na amin a pinalsam, tan pisalamatan ka na amin a totoom.  Salitaen day kagalangay panarian mo tan ibaga ray pakayarim. E.

2. Amin iray mabilay a bengatla onnenengneng iran mailalod sika, tan iitdan mo ray pambilay no nakaukolan da.  Iitdan mo ran amin na daakan tan pepeneken mo rad pankaukolan da. E.

3. Say Katawan matonung ed amin a gagawaen to, tan mapangasid amin a kimey to.  Asingger ed amin da ray ontatawag ed sikato, saray tua so itatawag dad sikato. E.

KUMADWAN BABASAEN Ef. 4:1-6

Babasaen ya inaon ed sulat nen Pablo ed saray taga Efeso

Siak, sakey a priso lapud panlilingkur kod Katawan, kekerewen kod sikayo a mambilay kayo onung ed manepeg ya anawagay Dios ed sikayo.  Lawas maoyamo, mapaabeba, tan maanos kayo komun.  Ipanengneng yoy maanos kayo komun.  Ipanengneng yoy panangaro yo diad pantetepelan yo.  Gawa yoy anggaay nayarian yo a pansiansiaey pankakasakey a manlalapud Ispiritu, diad panamegley na kareenan a mamapasakey ed sikayo.  Walay saksakey a laman tan saksakey ya Ispiritu; ontan met a walay saksakey ya ilalon anawagay Dios ed sikayo.  Walay saksakey a Katawan, saksakey a pananisia, tan saksakey a binyag; walay saksakey a Dios tan Ama na amin a katoowan.  Sikatoy Katawan na amin, mankikimey ed amin, tan walad amin.

Salita na Katawan.

Alleluia
E. Alleluia.  Nagmaliw a too so Salita na Dios tan akiayam ed sikatayo.  Inter tod saray angawat ed sikato so pankanepegan a magmaliw iran anak na Dios.  E.  Alleluia.

IBANGHILYO Jn. 6:1-15

Babasaen ya inaon ed masanton ibanghilyo onung ed kinen Juan

Binmasil si Jesus ed biek na Dayat na Galilea (o Dayat na Tiberias).  Dakerakel iray totoon tinmombuk ed sikato, lapud anengneng da ray makapakelaw a ginagawa to diad impamaabig tod saray mansasakit.  Tinmatdang si Jesus tan saray disipulo tod nipokdul a pasen, tan diman ira inmirung.  Asingger lad saman so Pista na Paskua da ray Judio.  Tinmangway Jesus tan anengneng toy amayamay a totoo ya ondaragod sikato.  Tinepet tod kinen Felipe, "Iner so panaliwan tayoy ipakan tayod sarayan totoo?"  (Tinepet ya nen Jesus, ta labay ton subokey Felipe, balet diad tuay tua amta la nen Jesus so gawaen to.)

Inmebat si Felipe, "Anggan mambiliy duan lasus a dinarion tinapasy so saliwen, siansian ag ni naapisay eges dan amin."

Sakey ed saray disipulo, si Andres ya agi nen Simon Pedro, inkuantod kinen Jesus, "Wala diay sakey ya ogaw a laki a nambaloy limaran tinapay tan duaran sira.  Balet piga la ya ed sayan karakel na totoo?"

 "Payorung yo ray totoo, "inkuanen Jesus ed sikara.  (Marikarikad saman a pasen.)  Inmirung ya amin iray totoo, et sakey a liman libo la ray lalaki.  Inala nen Jesus so limaran tinapay, tan nen kasumpal ton akisalamat ed Dios, imbunog tod saray totoon akayorung.  Ontan met so ginawa tod saramay sira, tan namperan angan iray totoo.  Nen napnapsel la ran amin inkuanen Jesus ed saray disipulo to, "Tipon yoy amin a kera, pian anggapoy nadarak."  Tinipon da ra, tan labinduan tiklis so apano ra na kera-derad saramay limaran tinapay a kinay totoo.

Diad impakanengneng na saray totood sayan milagron ginawa nen Jesus, inkuanda, "Sikato yan tua may Propita ya onsabid sankamundoan!"  Lapud alikas nen Jesus a ngalngali ran pasooten ya alaen tan gawaen dan ari, linmimut lamet tan linman nambukbukor ed nipalandey a pasen.

Ibanghilyo na Katawan.