ONONAN BABASAEN 1 Ar. 19:4-8

Babasaen ya inaon ed ononan libro na Saray Arari
 
Si Elias nanakar a sanagew ed kalawakan.  Tinmonda tan inmirung ed silong na sakey a kiew tan labay to la komun so ompatey.  Nampikasi, "Alablabas la ya, Katawan.  Babawim lay bilay ko, ta singa ak met la lamlamang inatey!"

 Dinmokul ed silong na kiew, insan akaogip.  Kabebekta diniwit na anghil tan kuanto, "Bangon ka, ta mangan ka."  Ninmengneng ed kaliber-liber, et anengneng tod olowan to so sakey a tinapay tan sakey a garapon na danum.  Angan tan inminom, insan dinmokul lamet.  Pinmawil imay anghil na Katawan tan pinidwa ton binangon, insan kuanto, "Bangon ka, ta mangan ka; no ag ka mangan nairapan kad panakar mo."  Binmangon si Elias, angan tan inminom; angiter ed sikato na biskeg imay tagano diad impanakar to na apataplon agew tan apataplon labi ya anggad Sinai, say masanton palandey.  Nampalabas diman na labi ed dalem na sakey ya ongib.

Salita na Katawan.

SALMO RESPONSORIO

Ebat: Tawayan tan nengneng yo so kaabigay Katawan.

1. Misalamat ak lawas ed Katawan; ag ak ontondan mangidayew ed sikato.  Idayew koy Katawan lapud saray ginagawa to; ondengel tan manggayaga komun iray maniirap! E.

2. Ibaan yo ak a mangitandurod Katawan; mankakasakey itayon mangidayew ed ngaran to!  Nampikasi ak ed Katawan et inebatan to ak, inekal ton amin iray takot ko. E.

3. Onsisingger ed sikato ray napapairap, et magayaga ra; ag iran balut nabaingan.  Ontatawag ed sikato iray doroka, et eebatan to ra; ilalaban to ra ed amin a gunigon da. E.

4. Say anghil na Katawan babantayan to ray mangigagalang ed Katawan tan iyaagel to rad kaatapan.  Nengneng mon dili so ontan lan kaabigay Katawan.  Maliket iray totoon onsasalimbeng ed sikato. E.

KUMADWAN BABASAEN Ef. 4:30-5:2

Babasaen ya inaon ed sulat nen Pablo ed saray Efeso

Ag yo papaermenen so Ispiritu Santo na Dios, ta sikatoy tanda na pankayaryar Dios ed sikayo; sakey met a kaletan na pakarondon yo no onsabiy niganan Agew.  Ekal yo lad bilay yoy sakit na linawa, alabas a pasnuk tan bosul.  Ag ki la maneeyagan, mamapapaogesan, o maniirapay linawa.  Ingen, mankakasiyan tan manaarowan kayo tan mampipirdonaan kayo, a singa impamirdonay Dios ed sikayo diad panamegley nen Cristo.

 Alig yo so Dios, bangta anak to kayon inararo.  Mambilay kayon maaro a singa si Cristo; lapud panangaro tod sikatayo, inter ton para sikatayo so bilay to, sakey ya ambalingit a bagat tan rigalo makapaliket ed Dios.

Salita na Katawan.

Alleluia
E. Alleluia.  Ipapasen ta kayon kakaaro, kuay katawan, ta impaamtak ed sikayo iray amin ya imbagad siak na Amak.  E.  Alleluia.

IBANGHILYO Jn. 6:41-51

Babasaen ya inaon ed masanton ibanghilyo onung ed kinen Juan

Ngoro-ngoro ray Judio ed kinen Jesus lapud samay imbaga ton sikatoy tinapay a nanlapud tawen.  Kanyan inkuanda, "Ag ta sikato ya may Jesus ya anak nen Jose?  Kabat ti ray atateng to! Panoy pangibabaga to natan a nanlapud tawen?"

 Inmebat si Jesus sirin ed sikara, "Ag kayo ngoro-ngoro.  Anggapoy makaragod siak no ag iyasingger na Ama ya angibakid siak.  Diad kaonuran ya agew paolien kod bilay so ondagod siak.  Insulat na saray propita, 'Tan nabangatan iran amin na Dios.'  Ondadagod siak so balang sakey ya onderengel tan manaaral ed Ama.  Ag to kabaliksan yan wala lay akanengneng ed Ama.  Say nanlapud Dios labat so akanengneng lad Ama.  Ibabagak ed sikayoy katwaan: say manisia walay bilay ton andi-anggaan.  Siak so tinapay na bilay.  Angan na manna ed kalawakan iray lalaki yo, et siansian inaatey ira.  Balet ag ompatey so siopaman a mangan ed sayan tinapay a linmeksab a nanlapud tawen.  Siak so mabilay a tinapay a linmeksab a nanlapud tawen.  Mambilay ya angi-angga so siopaman a mangan ed sayan tinapay.  Say tinapay ya iter kon makapangiter na bilay ed sankamundoan et say laman ko."

Ibanghilyo na Katawan.

---