UNAAN A SIMBA NA KUARESMA (B)
12 MARCH 2000
ONONAN BABASAEN
Gen. 9:8-15
Babasaen ya inaon ed libro na Genesis.
Inkuan na Dios ed kinen Noe tan saray anak ton lalaki, "Misipanan ak ed sikayo tan saray kabyangay boleg yo, tan diad amin a mabilay a pinalsa-saray manok, saray ayayep-amin da ray kaiba yon pinmaway ed biong. Diad sarayan balikas misipanan ak ed sikayo: Isipan ko ya ag lan balut deralen na delap iray amin a mabilay a pinalsa. Ag lan balut deralen na delap so dalin. Niay pakanengnengan na sayan andi-anggaan a pisipanan kod sikayo tan amin da ray mabilay a pinalsa: paletawen kod lorem so bunlalakaw. Sikato yay tanda na impisipanan kod mundo. Kapag sakuban koy tawen na lorem tan onletaw so bunlalakaw, nanunotan koy sipan kod sikayo tan diad amin ya ayayep ya ag lan balut deralen na delap iray amin a mabilay."
SALMO RESPONSORIO
Katawan, katekep na aro tan katwaan so pangiwawanwan mo ed saray manusumpal na impisipanan mo.
Ibangat mo pad siak so linawam; ipaamtam ed siak, O Katawan. Ibangat mo ak pan mambilay onung ed katwaan mo, ta sikay Dios a Manangilaban ko. E.
Katawan, nunot mo pay panangasim tan say ag mangoman a panangarom ya abayag mo lan impanengneng. Lapud ag mangoman a panangarom tan kaabigan mo, Katawan, nunot mo ak pa! E.
Matonung tan maung so Katawan, kanyan ibabangat tod saray makasalanan so dalan a nepeg dan tombuken. Itotonton to ray mapaabeba ed maptek a dalan, tan ibabangat tod sikaray linawa to. E.
KUMADWAN BABASAEN
1 Ped. 3:18-22
Babasaen ya inaon ed ononan sulat nen Pedro
Ta inatey si Cristo ya amimpinsan para saray kasalanan, say anggapoy kasalanan para saray makasalanan, pian niasingger to itayod Dios. Inatey onung ed laman tan pinaolid bilay onung ed ispiritu. Onung ed maispiritun kipapasen to, linmad saray aprison ispiritu tan pinulongan to ra. Sikara ya may ispiritu ya ag tinmoluk nen say Dios et inanosan to ran inalagar ya ompawil ed sikato, diad saramay agew a gagawaen nen Noe so biong. Lapud tulong na saman a biong, walwalorn totoo so nilaban ed danum. Sayan danum aliling toy binyag a mangilaban ed sikayo natan. Say binyag et aliwan panlinis na dotak na laman, no ag ingen say sipan ed Dios a nanlapud sakey a malinis a konsinsia. Ilaban kayoy binyag diad panamegley na inkiolid bilay nen Jesu-Cristo, a linmad tawen tan manyodyorung ed nikawanay Dios. Manooley diman ed saray anghil tan saray mangatatawen a pakayari tan pakaoley.
Birsikulo Kasakbayay Ibanghilyo
Aliwa labat a tinapay so pambilay na too, no ag pati amin a salitan ibabalikas na Dios.
IBANGHILYO
Mar. 1:12-15
Babasaen ya inaon ed masanton ibanghilyo onung ed kinen Marcos
Kasumpal na sayan agawa, say Ispiritu pinaonla tod kalawakan si Jesus. Nanayam diman ya apataploy agew tan legan tod man, tinutukso nen Satanas. Wala met irad may ayayep ya atap, balet nanlilingkur iray anghil ed sikato.
Nen apriso lay Juan, linmay Jesus ed Galilea tan nampupulong na Maung a Balitan nanlapud Dios. Inkuanto, "Sinmabi la so nigetar a panaon tan asingger lay Panarian na Dios! Pansibkelan yo la ray kasalanan yo, tan manisia kayo lad Maung a Balita!"
.
