ONONAN BABASAEN Prob. 9:1-6

Babasaen ya inaon ed libro na Saray Probirbio
 
Say kakabatan amaalagey na abung to tan nanggawa na pitoran lusek to.  Amatas na ayep a para pista, nilaokan toy rikado so alak, insan to insaklang so lamisaan.  Imbaki to ray katulong ton bibii ya onla rad sankatageyan a pasen ed baley ta ibando ra: "Loob kayo, sikayon totoon anggapoy amta!"  Insan diad toon makulang-kulang kuanto, "Gala dia, mangan kad kakanen ya imparaan ko tan inom kad alak a tinimplak.  Taynan moy olupan da ray totoon anggapoy amta, tan mambilay ka.  Mankurang kad dalan na pakaamta."

Salita na Katawan.

SALMO RESPONSORIO

Ebat: Tawayan tan nengneng yo so kaabigay Katawan.

1. Misalamat ak lawas ed Katawan; ag ak ontondan mangidayew ed sikato.  Idayew koy Katawan lapud saray ginagawa to; ondengel tan manggayaga komun iray maniirap! E.

2. Igalang yoy Katawan, amin yon totoo to; saray matoluk ed sikato et walay amin a nakakaukolan da.  Anggan saray lion nanaandian iray nakan tan nanaerasan ira, balet ag onkukulang ed antokaman a maabig iray mangoonur ed Katawan . E.

3. Gali dia, anak, tan dengel yo ak, ta ibangat ta kayo a mangigalang ed Katawan.  Labay yon maliket so pambilay yo?  Labay yon andokey tan maaligwas so pambilay yo? E.

4. Ag kayo sirin mansasalitay maoges tan ag kayo mantitila.  Arawian yoy kaogsan tan manggawa kayoy kamaungan; pampilalekan yod intiron puso so kareenan. E.

KUMADWAN BABASAEN Ef. 5:15-20

Babasaen ya inaon ed sulat nen Pablo ed saray taga Efeso

Apiapiger yoy panagbilay yo.  Mambilay kin singa saray makabat, aliwan singa saray makulang-kulang.  Anamut yoy pankanawnawa yon manggaway kamaungan, ta maoges so kiwas na bilay diad sarayan agew.  Nepeg ya aliwa kayon singa saray makulang-kulang, no ag ingen talusan yo no antoy labay na Katawan a pagawad sikayo.
Ag ki mambuebuek na alak, ta manderal labat ed sikayo; pampelengan yo ingen so kapano yoy Ispiritu.  Mantotongtong kayod panamegley na saray salmo, imno, tan diniriyos a kanta.  Kantaan yoy imno tan salmo so Katawan, tan impapusoy pangigalang yod sikato.  Lapud amin a bengatla, misalamat kayo lawas ed Dios Ama, diad ngaran na Katawan tayon Jesu-Cristo.

Salita na Katawan.

Alleluia
E. Alleluia.  Say Ama na Katawan tayon Jesu-Cristo et lokasan to komun iray mata na kapusoan tayo, pian nanengneng tayo so inkatalonggaring na ilalo ya inkatawagan tayo.  E.  Alleluia.

IBANGHILYO Jn. 6:51-58

Babasaen ya inaon ed masanton ibanghilyo onung ed kinen Juan

Inkuanen Jesus ed saray totoo: "Siak so mabilay a tinapay a linmeksab a nanlapud tawen.  Mambilay ya andi-angga so siopaman a mangan ed sayan tinapay.  Say tinapay ya iter kon makapangiter na bilay ed sankamundoan et say laman ko."

 Lapud saya, ginmapoy ampetang a sangsangan da ray Judio.  "Panoy pangiter to yan too na laman to a kanen tayo?" tinepet da.

 Inkuanen Jesus sirin ed sikara, "Ibabagak ed sikayoy katwaan: no ag yo kanen so laman tan inomen so dala na Anak na Too, ag kayo nawalaay bilay ed sikayon dili.  Siopamay mangan na laman ko tan oninom na dalak, walay bilay ton andi-anggaan tan paolien kod bilay diad kaonuran ya agew.  Ta say laman ko et petepeteg a kakanen, tan say dalak et petepeteg ya iinomen.  Siopamay mangan na laman ko tan oninom na dalak, manayam ed siak tan manayam ak ed sikato.  Say mabilay ya Ama so angibakid siak, tan mambilay ak lapud sikato.  Ontan met a siopamay mangan ed sika, mambilay lapud siak.  Sikato ya sirin so tinapay a linmeksab ed tawen.  Siopamay mangan ed sayan tinapay mambilay a magnayon.  Doma yad samay inaakan ed kalawakan na saray lalaki yo, ta siansian inaatey ira."

Ibanghilyo na Katawan.