Saray Babasaen
Kumaduamplo tan Sakey a Simba na Ordinarion Panaon (B)
27 Agosto 2000

Babasaen ya inaon ed libro na Josue

Tinipon nen Josue ed Sikem iray amin a totood tribu na Israel.  Tinawag to ray mamatakken, saray pangulo, saray huis, tan saray opisial na Israel, tan pinmarontal irad arap na Dios.  Inkuanen Josue ed amin da ray totoo, "No ag yo labay a panlingkuran so Katawan, mampili kayo natan no siopay panlingkuran yo, saray diriyos ya inggagalang na saray lalaki yo ed Mesopotamia odino saray diriyos da ray Amorreo a panaayaman yo natan so dalin da.  Para say siak tan say pamilyak, panlingkuran mi so Katawan."

 Inmebat iray totoo, "Ag min balut taynan so Katawan pian makapanlingkur kamid arum a diriyos!  Say Katawan a Dios tayo et inekal tod inkaaripen ed Egipto iray lalaki tayo tan pati sikatayo, tan anengneng tayo ray milagron ginagawa to.  Inyarawi to itayod kaatapan ed anggan iner a nila tayo diad amin a bansan dinadalan tayo.  Kanyan manlingkur kami met ed Katawan; sikato so Dios tayo."

Salita na Katawan.
 

Ebat: Tawayan tan nengneng yo so kaabigay Katawan.

1. Misalamat ak lawas ed Katawan; ag ak ontondan mangidayew ed sikato.  Idayew koy Katawan lapud saray ginagawa to; ondengel tan manggayaga komun iray maniirap! E.

2. Say Katawan iimanoen to ray matonung, tan dedengelen to ray tawag da; balet sumpad saray managgaway kaogsan, kanyan no ompatey ira, sigput la ran nalingwanan. E.

3. Saray matonung ontatawag irad Katawan, et dedengelen to ra; iyaagel to rad amin a gunigon da.  Say Katawan maasinger ed saray nanaekalay biskeg na linawa; ilalaban to ray sigput a naandiay ilalo. E.

4. Amayamay iray gunigon a paniirapay toon matonung, balet say Katawan ilalaban tod amin a gunigon to; aasikasoen a maung na Katawan; anggapoy pokel ton napoter. E.

5. Pateyen na kaogsan iray totoon maoges; nadusa ray mamobusol ed saray matonung.  Ilaban na Katawan iray totoo to; ag nadusa ray papaiyagel ed sikato. E.
 

 
Babasaen ya inaon ed sulat nen Pablo ed saray taga Efeso

Manoonuran kayo ta sikato yay pakanengnengan na pangigagalang yod Cristo.

 Bibii, toluk kayod kaasawaan yo, a singa katotoluk yod Katawan.  Ta say laki et pangulo na asawa to, a singa si Cristo et pangulo na iglisia.  Si Cristo met so Manangilaban na iglisia a laman to.  Kanyan no panoy itotoluk na iglisia ed Cristo, ontan met a saray bibii nepeg day ontoluk diad amin a bengatla ed saray kaasawaan da.
Lalaki, aro yoy kaasawaan yo, a singa panangaro nen Cristo ed iglisia.  Inter ton para iglisia so bilay to.  Ginawa to ya pian napasanto toy iglisia, kasumpal ton linisan diad panamegley na danum tan salita, pian niparontal tod sikaton dili so iglisia-marakep, anggapoy mansa o komanet to, masanto, malinis, tan anggapoy pakabalawan.  Nepeg ya aroen na lalaki so kaasawaan da a singa panangaro rad laman dan dili.  Anggapoy toon bosulen toy laman ton dili.  Ingen, pakanen tan pablien to, a singa gagawaen nen Cristo ed iglisia; ta kabyangan itayo na laman nen Cristo.  Onung na ibabagay Masanton Sulat, "Lapud saya, taynan na laki so ama tan ina to, tan iyamung toy asawa to, tan magmaliw iran saksakey a laman."  Walay baleg a katwaan ya ipapaamta na sayan partiy Masanton Sulat, tan amtak a say kipapasen nen Cristo tan say iglisia so kipaakaran to.

Salita na Katawan.

Alleluia
E. Alleluia.  Bindisionan komuy Dios so arin onsasabid ngaray Katawan!  Kareenan ed dalin tan galang ed tawen!  E.  Alleluia.
 

Babasaen ya inaon ed masanton ibanghilyo onung ed kinen Juan

Nadngel ya na saray disipulo to tan dakel iray nankuan, "Mairap yan bangat!  Siopa kasiy makatalus ed saya!"
 Balet amta nen Jesus a ngoro-ngoro ray disipulo to nipaakar ed saya, kanyan kuantod sikara, "Onsawa ki la kasid siak lapud sayan bangat?  Anto kasi no nanengneng yoy Anak na Too ya ompawil ed nanlapwan to?  Say Ispiritu so mangiiter na bilay; ag ya nagawaay too.  Ispiritu tan bilay iray sinalitak ed sikayo.  Balet wala rad sikayoy ag manisia."  (Ta gendat lan kabat nen Jesus no siopa ray ag manisiad sikato, tan no siopay mantraidor ed sikato).  Intuloy nen Jesus ya inkuan, "Sikato yay makasengeg no akin et imbagak ed sikayo ya anggapoy makaragod siak no ag iyasingger na Ama."

 Lapud saya, dakel ed saray disipulo toy tinmaynan, tan ag la ra akiolup ed sikato.  Kanyan tinepet nen Jesus ed saray labinduan disipulo, "Labay yo met so ontaynan?"

 Inmebat si Simon Pedro, "Katawan, siopay laen mi ni?  Walad sika ray salitan mangiiter na bilay ya andi-anggaan.  Manisia kami tan amta mi a sikay Masanto na Dios."

Ibanghilyo na Katawan.

LAPAG A PIKAKASI

P - Say Ama inter tod sikatayo so mismon Anak to ya tua-toan kakanen tan iinomen ed sayan altar.  Nayarian tayoy onkerew ed sikato na saray nakaukolan tayo diad panamegley nen Cristo, say sobol na balon bilay. Say ebat tayo: KATAWAN, DENGEL MOY PIKAKASI MI.

C - Para Santo Papa, saray Obispo, papadre, tan arum ni ran man-miministro na misterioy eucharistia;  mikasi itayo. (E)

C - Para pikakabat tan pakanengneng ed pakapangilaem na kakanen ed arum ya pasen ya mankaukolan;  mikasi itayo. (E)

C - Para saray kumakansion, saray tumutogtog, saray gumagaway kansion ya ontutulong ira ya mamarakep tan mamaliket ed pangidayew ed Dios;  mikasi itayo. (E)

C - Para mabetbet tan masimoon ya pakapangawat na Laman tan dala na manangilaban tayo;  mikasi itayo.  (E)

C - Para saray maniinagem, saray nagogonigon, saray napapaolian ya ugugao, saray akasagmak na makapasinaguem ya inkagawa tan para saray kimey tan getma na parochia tayo;  mikasi itayo. (E)

P - Dios na dalin tan tawen, itekep mi ray pikakasi mi ed intencion na entiron simbaan ya atagano tan akapikasakey ed Anak mo ya manbilay tan manari ed ando lan ando.