ONONAN BABASAEN Gaw. 3:13-15,17-19Babasaen ya inaon ed Saray Gawgawa da ray Apostol
Inkuanen Pedro ed saray totoo: “Say Dios di Abraham, Isaac, tan Jacob, say Dios na saray lalaki tayo so angiter na sankatageyan a kagalangan ed Aripen ton si Jesus. Balet impalima yod saray manoley tan ag yo binirbir ed arap nen Pilato, anggaman a labay to la komun ya ibolus. Impolisay yo so Masanto tan Matonung tan say managpatey na too la laingen so kinerew yon nibolus. Kanyan pinatey yoy Manamalsay bilay, balet say Dios pinaoli tod bilay. Sikami ray tasi ed sayan agawa.
“Natan sirin, agagi, kabat kon sikayo tan saray manoley yo et ag yo amtay ginawa yod kinen Jesus. Balet diad sayan ginawa yo, sinumpal na Dios so abayag lan imbaga to, diad panamegley da ray propita, a manirap so Cristo to. Kanyan magbabawi kayo la tan pawil kayo lad Dios, pian naponas iray kasalanan yo.”
Sikato yay Salita na Katawan.
Ebat a Salmo
E. Katawan, osdungan mo kami pa.Ebatan mo ak pa, no ontawag ak ed sika,
O Dios a manangyagel ko!
Tinulongan mo ak nen nagugunigon ak.
Kasian mo ak pa natan tan dengel moy pikakasik!Tandaan yo a say Katawan pinili
ton kayaryanto so toon matonung,
tan dedengelen to ak no ontatawag ak ed sikato.Mapangasin osdungan mo kami pa, O Katawan!
Say liket ya inter mod siak
et baleg ni nen say liket da anggaman
a daakan so pilak tan alak da.No ondokul ak, mareen so pakaogip ko,
ta sika labat, Katawan, so mangyaarawid
siak ed kaatapan.
KUMADWAN BABASAEN 1 Jn. 2:1-5
Babasaen ya inaon ed ononan sulat nen Juan.
Anak ko, isulat ko ya pian ag kayo manggaway kasalanan. Balet no walay mankasalanan, walay matonung a Jesu-Cristo a mangipipikasid sikatayo ed Ama. Si Cristo et nibagat a pakapaandian na saray kasalanan tayo, tan aliwa lambengat a saray kasalanan tayo, no ag ingen pati saray kasalanan na sankamundoan.
No onuren tayo ray ganggan na Dios, andi-duaruwad satan a kabat tayoy Dios. No ibagay sakey a too, “Kabat koy Dios,” balet ag to onuren iray ganggan na Dios, matila tan a too. Anggapo met so katwaan ed sikato. Balet siopamay toon mangoonur na salitay Dios, talagan ayadyariy panangaro tod Dios. Dia tayo naamtaan a wala tayo ed Dios.
Sikato yay Salita na Katawan.Alleluia
E. Alleluia. Katawan a Jesus, gawam pan malinew so salitam ed sikami; gawam pan manliub ed panangaro so puso mi no mansalita ka.
E. Alleluia.IBANGHILYO
Babasaen ya inaon ed masanton ibanghilyo onung ed kinen LucasImbalita met na saramay duaran disipulo so agawad dalan, tan say impakabirbir dad Katawan nen pinisag toy tinapay.
Nen pantotongtongan da ya, biglan manalalagey si Jesus ed pegley da. Inkuantod sikara, “Say kareenan komun so walad sikayo.”
Diad kelaw tan takot da, abaloan dan anyani so nanenengneng da. Balet inkuantod sikara, “Akin et napapagaan kayo? Akin et manduaruwa kayo ni? Nengneng yo pa ray yay limak tan saray salik, pian napamintuan yo a siak a dili ya. Diwit yo ak, pian manisia kayo, ta say anyani anggapoy laman tan pokel to, balet nanenengneng yon walad siak ira ya.”
Kapangibaga to ya, impanengneng tod sikara iray lima tan sali to. Nen ag ni ran siansia anisia lapud liket tan kelaw da, tinepet tod sikara, “Wala diay nakan?” Initdan day sakey a tegteg na siran inkalut. Inala to, tan kinan to a sankanengneng da.
Insan inkuantod sikara, “Sikara yay sinalitak ed sikayo nen kaibiba ta kayo ni. Imbagak ed sikayon nepeg a nasumpal ya amin iray nisulat nipaakar ed siak diad Ganggan nen Moises, diad saray sulat da ray propita, tan diad saray Salmo.”
Insan nilokasan toy muling da, pian natalusan day Masanton Sulat. Inkuantod sikara, “Onyay nisulat: nakaukolan a manirap so Cristo tan onolid bilay ed kumatlon agew, tan diad ngaran to, say pagbabawi tan say kapirdona na saray kasalanan et nepeg a nipulong ed amin a bansa, manlapud Jerusalem. Sikayoy tasi ed sarayan bengatla.”
[ home ] [ saray babasaen ] [ say panmutektekan ] [ pikakasi ] [ saray dasal tan rito ] [ saray fiesta na simbaan ]
[ liturgical calendar ] [ dasal ed labi ] [ liturgy of the hours ] [ kankanta ]
[ liturgical notes ] [ tan arum nira ] [ saray balbalita ]