Kumatlon Simba na Kuaresma (B)
Ononan Babasaen
Exo. 20:1-17
Babasaen ya inaon ed libro na Exodo
Say Dios nansalita a kuanto:
“Siak so Katawan a Dios yo ya angipaway ed sikayod Egipto ya akaaripenan yo.”
“Ag mo igagalang iray arum a diriyos; siak labat so igalang mo.
“Ag mo igagawaay sikan dili na talintao odino antokaman a kaolibay na bengatlan walad tawen odino walad tapew na dalin odino bengatlan walad danum diad dalem na dalin. Ag ka ondadakmomo odino mangigagalang ed saraya, ta siak, say Katawan a Dios mo, et maimon ak. Dusaen ko ray mamosul ed siak tan saray kabyangay boleg da ya anggad kumatlo tan kumapat a kailalakan. Balet aroen ko ray nilibon kailalakan na saray mangarod siak tan mangonur na saray ganggan ko.
“Ag mo ikakanad maoges iran getma so ngaran ko a Yahweh a Dios mo, ta dusaen koy siopaman a mangikanad ngran ko diad andi kakanaan a pamaakaran.
“Ngilinan moy Agew na Panagpainawa tan ipasen mon masanto. Anem agew a makapankimey ka, balet say kumapiton agew et agew na panagpainawa a nisaklang ed siak. Diad sayan agew nepeg ya anggapoy toon mankimey: sika, saray anak mo, saray aripen mo, saray ayayep mo, odino saray sangkailin manaayam ed bansam. Diad loob na anemiran agew siak a Katawan et pinalsak so tawen tan dalin. Saray dayat tan amin a logan da, balet diad kumapiton agew nampainawa ak. Sikato yay makasengeg a siak a Katawan et binindisionan koy Agew na Panagpainawa tan ginawak a masanto.
“Igalang moy amam tan say inam, pian andokey so pambilay mo ed dalin ya iter kod sika.
Ag ka mamapatey.
Ag ka mikakaloguran.
Ag ka mantatakew.
Ag ka mantitila no mantasi ka sumpad kaparam a too.
Ag mo iibegan so abung na kaparam a too; ag mo iibegan so asawa to, saray aripen to, saray baka to, saray asno to, odino antokaman a kayaryan to.”
Sikato yay Salita na Katawan.
Ebat a Salmo
Sal 19:7/8/9/10
Ebat: Katawan, walad sika ray salita a mangiiter na bilay ya andi-anggaan.
Ayadyari so ganggan na Katawan; papasimbaloen toy biskeg na too.
Napanmatalkan iray ganggan na Katawan; mangiiter ira na kakabatan ed saray anggapoy amta.
Maptek iray ganggan na Katawan, tan pagagayagaen day puso.
Matunong iray ganggan to, tan liliwawaan day pakatalus.
Maung so pangigalang ed Katawan; mansiansia ed anggad angga.
Matonung so pananisiay Katawan, tan maptek lawas.
Pampilpilalekan nen say sankaabigan a balituk; masamsamit nen say sankapuroan a dilo.
Kumadwan Babasaen
1 Cor 1:22-25
Babasaen ya inaon ed ononan sulat nen Pablo ed saray taga Corinto
Saray Judio pilalek da ray milagro a pamaneknek, tan say Grigo aanapen da so kakabatan. Balet no nipaakar ed sikami, ipupulong miy Cristo a nipasak ed krus, sakey a bangat a diad saray Judio et pakatumbaan tan diad saray Hintil et anggapoy kabaliksan. Balet diad saray tinawag na Dios, Judio o Grigo man ira, si Cristo so pakayari tan kakabatan na Dios. Ta say singa kakulang-kulang na Dios et makabat nen say kakabatay too, tan say singa kakapoyay Dios et mabiskeg nen say biskeg na too.
Sikato yay Salita na Katawan.
Birsikulo Kasakbayay Ibanghilyo
Sal. 61:10,12
O Dios, gawam pan malinis so pusok; ipawil mo pad siak so gayagay panangilaban mo.
IBANGHILYO
Jn. 2:13-25
+Babasaen ya inaon ed masanton ibanghilyo onung ed kinen Juan
Asingger lay Paskua a Pista da ray Judio, tan linmay Jesus ed Jerusalem. Anengneng tod dalem na Timplo ray totoon manlalakoy baka, karniro, tan malapati, tan saray akayorung a mansasalat na kuarta. Nanggaway siplat a lobir insan to pinapapaway iray totoo, a pati saray baka tan karniro ra. Imbubuyandak toy kakuartaan da ray managsalat na kuarta tan imbabalintuag toy amin a lamisaan da. Kuantod saray managlakoy malapati, “Ipaway yo dia ra tan! Ag yo gagawaen a tindaan so abung na Amak!” Anunotan na saray disipulo so walad Masanton Sulat: “Say panangisakit kod abung mo et singa manliub ya apoy ed pusok.”
Dinmago sirin iray Judio ed sikato tan tinepet da, “Anton milagro so nipanengneng mod sikami a mamaneknek na pankatonungan mon manggawad saraya?”
Inmebat si Jesus, “Igeba yo ya Timploy Dios, insan ko ipaalagey ed loob na taloy agew”.
Inkuan na saray Judio, “Anto, ipaalagey mod loob na taloy agew? Nipaalagey yan Timplo ed loob na apataplo tan anem a taon!”
Balet say labay ya ibaga nen Jesus a Timplo et say laman to. Kanyan nen inmolid bilay si Jesus, anunotan na saray disipulo to yan imbaga to. Anisia ra sirin ed Masanton Sulat tan diad saray salita nen Jesus.
Nen Pistay Paskua, walad Jerusalem si Jesus. Dakel so anisiad sikato diad impakanengneng day makapakelaw iran milagro a ginagawa to. Balet ag inmatalek nen Jesus so sikaton dili ed sikara, lapud kabat ton amin iray totoo. Ag la nakaukolan ya ipaamta na siopaman ed sikato no antoy inkatoo na anggan siopa, ta kabat to so walad puso na too.
Sikato yay Ibanghilyo na Katawan.
