ONONAN BABASAEN Gaw. 4:8-12

Babasaen ya inaon ed Saray Gawgawa da ray Apostol

Napnoy Ispiritu Santo ya inmebat si Pedro, "Sikayon manoley tan mamatakken na baley, no say labay yon tepeten ed sikami natan et say nipaakar ed kamaungan ya agawad sayan lopuy tan no panoy inyabig to, nepeg yo ya amtaen tan amin a totood Israel, a manalalagey yan tood arap yo tan nagnap so inyabig to, lapud pakayari na ngaran nen Jesu-Criston taga Nazaret.  Impasak yod krus, balet say Dios pinaoli tod bilay.  Si Jesus so labay ya ibaga na Masanton Sulat nen inkuanto, 'Say baton impasen yon andi-kakanaan, sikayo ran karpintiro, nagmaliw lamlamang a sankakanaan a bato.'  Diad sikato labat so pakalmoay kilalaban, ta anggapoy arum a ngaran ya inter na Dios ed saray katoowan diad intiron mundo a nepeg tayon kilabanan."
Salita na Katawan.

SALMO RESPONSORIO

Ebat: Say baton imbantak na saray karpintiro, nagmaliw a sankakanaan a bato.

1. Misalamat kayod Katawan, ta sikato et maung, tan andi-anggaan so panangaro to.  Maung ni so manmatalek ed Katawan, nen say manmatalek ed too.  Maung ni so manmatalek ed Katawan, nen say manmatalek ed saray totoon pangulo.

2. Idadayew ta ka, Katawan, lapud dinengel mo ak, tan initdan mo ak na pananalo.  Say baton impasen ya andi-kakanaan na saray karpintiro nagmaliw lamlamang a sankakanaan a bato.  Ginawa ya na Katawan; makapakelkelaw a nengnengen! .

3. Bendisionan komuy Dios so onsabid ngaran na Katawan!  Manlapud Timploy Katawan bibindisionan mi ka!  Idadayew ta ka, Katawan, lapud dinengel mo ak, tan initdan mo ak na pananalo.  Misalamat kayod Katawan, ta sikato et maung, tan andi-anggaan so panangaro to.

KUMADWAN BABASAEN 1 Jn. 3:1-2

Babasaen ya inaon ed ononan sulat nen Juan

Nengneng yo so ontan lan panangaroy Ama ed sikatayo!  Diad kabaleg na panangaro to atawag itayon anak na Dios--tan saya et tua.  Ag itayo kabat na sankamundoan, ta say sankamundoan ag to akabat so Dios.  Inararon anak sikatayo natan so anak na Dios, balet aliwa nin malinew no antoy pagmaliwan tayo.  Anggaman ontan, amta tayo a diad ipawil dia nen Cristo, magmaliw itayon singa sikato, ta nanengneng tayo diad dilin inkasikato.
Salita na Katawan.

Alleluia
E. Alleluia.  Siak so maung a pastol, kuay Katawan; kabat ko ray karnirok tan kabat da ak. E.  Alleluia.

IBANGHILYO Jn. 10:11-18

Babasaen ya inaon ed masanton ibanghilyo onung ed kinen Juan

Inkuanen Jesus: "Siak so maung a pastol.  Say maung a pastol isaklang toy bilay to para saray karniro.  Say mimiupa ya aliwan pastol et ombatik no nanengneng ton nitan lay asod katakelan.  Ibatikan to ray karniro lapud mimiupa labat, tan ag to kayaryan iray karniro.  Kanyan sibaren tan buyaken na asod katakelan iray karniro.  Ombatik ta mimiupa labat tan anggapoy panagkawanan tod saray karniro.  Siak so maung a pastol.  Kabat ko ray karnirok tan kabat da ak, a singa say Ama kabat to ak tan sikatoy kabat ko.  Tan isaklang koy bilay ko para saray karniro.  Wala ni ray arum a karnirok ya andi rad sayan koral.  Nakaukolan ya ipitipon ko met ira, Dengelen da met so bosis ko tan diad onya, magmaliw a saksakey so poluk tan saksakey met so managpastol.
 "Inaro ak na Ama lapud saya, ta isaklang koy bilay ko pian nabawik lamet.  Anggapoy makaekal na bilay ko, balet isaklang kon manlapud siak a dili so bilay ko.  Walay pakayarik a mangiter tan mamawiy bilay ko.  Ingganggan nen Amak yan gawaen ko."

Ibanghilyo na Katawan.