KUMAPAT A SIMBA NA KUARESMA (B)
2 Abril 2000
ONONAN BABASAEN
2 Awa. 36:14-17, 19-23
Babasaen ya inaon ed kumadwan libro na Saray Awaran
Saray pangulo na Juda, saray papari, tan saray karaklan et ag da tinoor so Dios, ta inalig da ray kaogsan da ray bansan walad kaliber-liber da diad impangigalang dad saray talintaoy diriyos. Diad onya, dinotakan day Timplo a pinasanto na Katawan. Intuloy na Katawan a Dios na saray lalaki ra so angibaki na saray totoon mamasakbay ed sikara, lapud labay ton niagel iray totoo to tan say Timplo to. Balet niludludrey da ray totoon imbabaki na Dios, ag da dinengel iray salita to, tan inelek-elekan da ray propita to. Diad kaonuran, ontan lay pasnuk na Katawan ed sikara kanyan ag la ra makapaliis.
Kanyan imbaki na Katawan so ari na Babilonia ya ondogpad sikara. Pinapatey na ari iray tobun-balon lalaki a taga Juda, anggan diad Timplo. Anggapoy panangasi to ed anggan siopa, malangwer may matakken, laki may bii, mansasakit may maksil so laman. Say Dios impalima to ran amin ed sikato.
Pinoolan toy Timplo tan say siudad, pati saray palasio to tan saray kayamanan to, insan inggeba to ray padir na siudad. Siopaman ya apaliisan toy patey et inawit ira nen Nabucodonosor ed Babilonia, tan diman to ra inaaripen, pati saray kabyangay boleg da, ya anggad inkiletneg na impirio na Persia. Sikato yay impakasumpal na samay impasakbay na Katawan diad panamegley nen propita Jeremias: "Magmaliw ya andi-kabaliksan a pitomploy taon so dalin, pian nasalatan iray ag angilinan ya Agew na Panagpainawa."
Nen ononan taon na panooley ed Babilonia nen Impirador Ciro na Persia, imbaga na Katawan ed sikato a mangipaakseb na sakey a ganggan, paisulat to, insan to paibasay maksil ed inerman a pasen ed impirio. Agawa ya pian napatwa so imbaga na Katawan diad panamegley nen propita Jeremias.
"Sikato ya so ganggan nen Ciro ya Impirador na Persia. Say Katawan a Dios na Tawen ginawa to ak a manoley ed intiron mundo tan ingganggan to ak a mamaalagey na sakey a timplo to diad Jerusalem na Juda. Amin yo sirin a totoo na Dios, pawil kayo lad Jerusalem. Mila komun ed sikayo so Katawan a Dios yo."
Sikato yay Salita na Katawan.
Ebat a Salmo
Sal. 137:1-2/3/4-5/6
Ebat. Ag ko la komun nigalaw so dilak, no nalingwanan ta ka.
Diad gilig na saray ilog ed Babilonia inmiirung kami; mannangis kamin akanunot dimad ed Sion.
Insasabit mi ray arpa mi ed saray asingger a kiew a sansi.
Impankanta kami na saray anakep ed sikami; inkuandaa paliketen mi ra:
"Manganta kayoy nipaakar ed Sion."
Panoy panganta mi ed Katawan diad sananey a bansa?
Ag ak lan balut komun makatogtog na arpa, no nalingwanan ta ka, O Jerusalem!
Ag ak lan balut komun makakanta, no ag ta ka nanunnunotan,
No ag ta ka nanunotan a sankabalgan a liket ko!
KUMADWAN BABASAEN
Ef. 2:4-10
Babasaen ya inaon ed sulat nen Pablo ed saray taga Efeso.
Ag nasabsabaan so panangasiy Dios tan ontan lay kabaleg na panangaro tod sikatayo. Anggaman ya inatey ti la lapud kasusumlang tid ganggan, binilay to itayo a kaiba tiy Cristo. Nilaban kayo lapud baleg a panangaroy Dios. Diad pikakasakey tid Cristo Jesus, binilay to itayo a kaiba nen Cristo tan impiolup to tayod sikato a manoley ed katawenan. Ginawa to ya pian nipanengneng tod arapen a panaon so ag nabilang a kayamanay panangaro tod sikatayo, diad panamegley nen Cristo nilaban kayo la diad panameegley na pananisia. Impangaroy Dios yan kilalaban , ag nanlapud sikayon dili. Kanyan anggapoy nipasirayew na anggan siopad sikayo, ta ga nanlapud gawgawa yo. Say Dios so Manamalsa tayo, tan diad pikakasakey tid Cristo Jesus pinalsa to itayo a manggaway maung iran gawa a say Dios imparaan to la ran sumpalen tayo.
Sikato yay Salita na Katawan.
Birsikulo Kasakbayay Ibanghilyo
Jn. 3:16
Diad ontan lan panangaroy Dios ed sankamundoan, inter tod sikatayo so alenleneg ya Anak to, pian nawalaay andi-anggaan a bilay iray manisiad sikato.
IBANGHILYO
Jn. 3;14-21
+Babasaen ya inaon ed masanton ibanghilyo onung ed kinen Juan
No panoy impangibitin nen Moises na samay gansan oleg ed kalawakan, ontan met a nakaukolan a nibitin so Anak na Too, pian nawalaan na bilay ya andi-anggaan so siopaman a manisiad sikato. Ta diad ontan lan panangaroy Dios ed sankamundoan inter toy bogbogtung ya Anak to, pian siopamay manisiad sikato et ag nabalang no ag ingen nawalaay bilay ya andi-anggaan. Ta say Dios ag to imbakiy Anak to a manusa, no ag ingen mangilaban, ed sankamundoan.
Ag nadusa so manisiad Anak, balet asintinsiaan lan nadusa so ag manisia, lapud ag anisia ed ngaran na bogbogtong ya Anak na Dios. Onyay impakaawat day sintinsian dusa: sinmabiy silew ed mundo, balet say kabilongetan so inaroy totoo, aliwan say silew, lapud maoges iray gawa ra. Siopamay maoges iray gawa to bosulen toy silew tan ag ondagod silew, ompano napatnagan so kagagawa to. Balet siopamay mambilay onung ed katwaan, onsinger ed silew tan diad ontan napatnagan a katotoluk ed Dios iray gagawaen to.
Sikato yay ibanghilyo na Katawan.
