ONONAN BABASAEN Gaw. 9:26-31

Babasaen ya inaon ed Saray Gawgawa da ray Apostol

Linmad Jerusalem si Saulo.  Labay toy miolup ed saray disipulod man, balet ag da panisiaan a sakey lan disipulo, tan antakot ira inged sikato.  Kanyan inibaan nen Bernabe ya inyakar ed saray apostol.  Insalaysay tod sikara so impakanengneng nen Saulo ed Katawan tan say impitongtong na Katawan ed sikato nen walad dalan.  Insalaysay to met so sebeg nen Saulo a nampupulong ed Damasco diad ngaran nen Jesus.  Nagmaliw sirin a kaibiba ray Saulo ed Jerusalem, tan agaylay sebeg ton nampupulong diad ngaray Katawan.  Akitongtong met ed saray Judion mansasalitay Grigo tan akisangsangan ed sikara, balet labay dan pateyen.  Nen naamtaan ya na saray agagi, inyakar dad Cesarea, insan da pinapawil ed Tarso.

 Kanyan awalaay kareenan so iglisia ed intiron Judea, Galilea tan Samaria; binmiskeg tan binmaleg lapud tulong na Ispiritu Santo, tan nambilay a sigagalang ed Katawan.
Salita na Katawan.

SALMO RESPONSORIO

Ebat: Idayew ta ka, Katawan, ed baleg ya olupan da ray totoom.

1. Isaklang ko ray insipan kon bagat ed arap da ray mangigagalang ed sika.  Saray mairap-bilay mangan iray labalabay da; saray ondaragod Katawan igalang da.  Onaligwas ira komun ed ando lan ando! E.

2. Amin da ray bansa et nanunotan day Katawan.  Manlapud amin a sokung na mundo onlingaw irad sikato; igalang na amin a katoowan.  Ondakmomod sikato iray amin a totoon mapaatagey; ondakmomod sikato iray amin a totoon manganggay bilay da. E.

3. Saray mantombuk a kailalakan et panlingkuran day Katawan; saray totoo ibaga rad onsoblay a kailalakan so nipaakar ed sikato.  Nibagad saray totoon iyanak ed arapen a panaon; "Inlaban na Katawan iray totoo to." E.

KUMADWAN BABASAEN 1 Jn. 3:18-24

Babasaen ya inaon ed ononan sulat nen Juan

Anak! Ag tayo nepeg so mangaro diad panamegley na salita o balikas labat.  Nepeg ya ipanengneng tayoy tuan panangaro diad panamegley na gawa.

 Saya sirin so pakaamtaan tayon wala tayod katwaan.  Sikato ya met so pakadeenay konsinsia tayod arap na Dios.  No ag itayo padeeney konsinsia tayo, amta tayon baleg so Dios nen say konsinsia tayo, tan kabat ton amin iray bengatla.  Kanyan, inararo, no mareey konsinsia tayo, walay biskeg na linawa tayod arap na Dios.  Awaten tayo ray amin a kerewen tayod sikato, ta oonuren tayo ray ganggan to tan gagawaen tayo ray makapaliket ed sikato.  Sayay ganggan to: nepeg a manisia tayod ngaran na Anak ton Jesu-Cristo, tan manarowan itayo onung na ingganggan nen Cristo ed sikatayo.  Siopamay mangoonur na saray ganggan na Dios, mansiasiansiad Dios tan say Dios so mansiasiansiad sikato.  Diad panamegley na Ispiritu ya inter tod sikatayo, amta tayo a mansiasiansiay Dios ed sikatayo.

Salita na Katawan.

Alleluia
E. Alleluia.  Mambilay kayod siak tan pambilay yo ak ed sikayo, kuay Katawan; mambubungay dakerakel iray sangak. E.  Alleluia.

IBANGHILYO Jn. 15:1-8

Babasaen ya inaon ed masanton ibanghilyo onung ed kinen Juan

Inkuanen Jesus ed saray disipulo to: "Siak so tuan sengeg na ubas, tan si Amak so managtanaman.  Ekalen toy balang sangan ag mambunga tan palinan to so sangan mambubunga, pian lalon ondakel so bunga to.  Malinis ki la lapud salitan imbagak ed sikayo.  Mansiansia kid siak tan mansiansia ak ed sikayo.  Ag makapambungay sanga no ag mansiansiad sengeg.  Ontan met, ag kayo makapambunga no ag kayo mansiansiad siak.
 "Siak so sengeg na ubas, sikayo ray sanga.  Say mansiansiad siak tan siak ed sikato, mambungay dakerakel.  Ta no andi ak, anggapoy nagawaan yo.  Say ag mansiansiad siak, nibantak ed paway tan namagaan a singa sanga.  Natipon tan nibantak ed apoy ira yan klasiy sanga, pian napoolan ira.  No mansiansia kid siak tan mansiansiad sikayo ray salitak, kerew kayo na antokaman a labay yo, et nagamuran yo.  No mambunga kayoy dakel, napagalangay Amak tan napatnagan a disipulo ta kayo."

Ibanghilyo na Katawan.