KUMALIMAN SIMBA NA KUARESMA
9 ABRIL 2000
Ononan Babasaen Jer. 31: 31-34
Babasaen ya inaon ed libro na propita Jeremias
Say Katawan kuanto, "Onsabiy panaon a baloy pisipanan kod saray totood Israel tan saray totood Juda. Aliwan singa samay impisipanan kod saray lalaki ra nen intabin ko ran impaway ed Egipto. Aliwa ran matoor ed saman a sipanan, anggaman ya alimbawak so sakey ya asawan laki ed sikara. Onya so pisipanan kod saray totood Israel: Iyan kod sikaray ganggan ko tan isulat kod kapusoan da. Siak so magmaliw a Dios da, tan sikara so totook. Anggapod sikaray nepeg a mangibangat ed kabansaan to na nipaakar ed pangamta ed Katawan, ta nakabatan da ak ya amin, abeba may atagey so kipapasen da. Pirdonaen ko ray kasalanan da tan ag ko la nunoten iray ginawa ran kaogsan. Siak, say Katawan, so nansalita."
Sikato yay Salita na Katawan.
Ebat a Salmo
E (10) Gawam pan malinis so pusok. O Dios.
Kasian mo ak pa, O Dios
lapud ag mangoman a panangarom;
ponasan mo pa ray kasalanan ko,
lapud daakan a panangasim!
Orasan mo ak pad amin a kaogsan ko
tan linisan mo ak pad amin a
kasalanan ko!
E. Gawam pan malinis...
O Dios, gawam pan malinis so pusok;
itdan mo ak pay balo tan matoor
ya ispiritu.
Ag mo ak pa patataynanen ed arap mo;
ag mo pa eekalen ed siak so
masanton ispiritum.
E. Gawam pan malinis....
Ipawil mo pad siak so gayagay
panangilaban mo,
tan gawam pa mabulos so
linawak ya ontulok ed sika.
Ibangat kod satan iray ganggan mo ed saray
makasalanan,
et ompawil irad sika.
E. Gawam pan malinis....
KUMADWAN BABASAEN Heb. 5:7-9
Babasaen ya inaon ed sulat ed saray Hebreo
Nen manbibilay ed tapew na dalin si Jesus, inakis tan ineyag toy impankerew tan impan-pikasi tod Dios a makapangilaban ed sikato ed patey. Lapud nagnap a mapaabeba, dinengel na Dios. Anggaman ya Anak na Dios, naaral toy ononur diad panamegley na impanirap to. Nen agawa lan nagnap, nagmaliw ya andi-anggaan a Manangilaban na amin daray mangonur ed sikato.
Sikato yay Salita na Katawan.
Birsikulo Kasakbayay Ibanghilyo Jn 12:26
No labay yoy manlingkur ed siak, kuay Katawan, tombuk kayod siak, ta no iner so kawalaan ko diman met so kawalaan na aripen ko.
IBANGHILYO Jn. 12:20-33
+Babasaen ya inaon ed masanton ibanghilyo onung ed kinen Juan
Grigo ray arum ed saramay linmad Jerusalem ya angigalang ed Dios nen Pista. Inasinggeran day Felipe a taga Betsaida, Galilea, tan kuandad sikato, "Kaaro, labay min napinengnengay Jesus."
Imbaga nen Felipe yad kinen Andres, insan ira linman dua tan imbaga rad kinen Jesus. Inmebat si Jesus ed sikara, "Sinmabi lay oras a napagalangay Anak na Too. Ibagak ed sikayoy katwaan: no ag napelag ed dalin so sakey a bokel na trigo tan ompatey, mansiansian saksakey. Balet no ompatey , manbungay dakel. Say toon inaro toy bilay to naandid sikato, say too balet a mamosul ed bilay tod sayan mundo, mansiansiay bilay to ya anggad angga. Siopamay manlingkur ed siak, nepeg to ak a tombuken, ta no iner so kawalaan ko diman met so kawalaan na aripen ko. Pagalangan na Amak so siopaman a manlingkur ed siak."
"Nagugunigon ak natan; anto kasiy ibagak? Ikuanko kasi, 'Ama, ilaban mo ak ed oras na panliknak na kairapan?' Andi, ta say panliknak na kairapan so inakaran ko dia. Ama, pagalangan moy ngaran mo!"
Insan walay bosis a nanlapud tawen a kuanto, "Pinagalangan ko la, tan pagalangan ko lamet."
Nadngel ya na saray totoon wadman tan kuanda, "Kinmarul!" Inkuan balet na saray arum, "Akisalitay sakey ya anghil ed sikato!"
Balet inkuanen Jesus ed sikara, "Imparengel yan bosis lapud sikayo, aliwan lapud siak. Panaon lan nasintinsiaay sankamundoan. Nibantak la natan so manoley na sayan mundo. No nibitin ak la, natanggoyur kon onsingger lad siak ya amiy totoo." (Imbaga to yan pangipanengneng toy klasi na ipatey to.)
Sikato yay ibanghilyo na Katawan
