Kumaliman Simba ed Ordinarion Panaon (B)
Si JOB, HESUS, tan say IRAP
Say irap nen Job
Si Job so sakey ya toon manbibilay ya maptek tan anggapoy tetel. Say asawa to maararo, pitora so anak ton laki tan talora so anak ton bibii, tan sikatoy mankayaryan ya sankabalgan na dalin. Agton balot inabuso so pakapanyari tan pankanawnawa ya walad sikato: uusaren toy kayamanan para saray mankakaukolan. Anggapon balot so onlad abong to ya ag-nanaitdan.
Balet si Job naitdan ya ambebelat ya irap.
Nantutumbokan ya abalang so pamilya to, saray kakaaro to, say kayamanan tan kayaryan to. Nantutumbokan ya ambebelat ya desiang ya sinmabid sikato. Pinilat-pilat nen Job so kawes to, napakalbo, tan sikatoy nanpikasi, “Angiter so Katawan tan natan binawi to. Nadayew komon so ngaran to!” Sasakey labat so ag abalng ed si Job: say pananisia to ed Dios.
Samay too ya bibirbiren na karaklan ya sankamaongan tan sankamakapanyarian ed amin so mansasakit, tan naitday irap? Anto so ginawa nen Job et sinmabi ya ed sikato? Akin et sikato so apili na Dios ya man-irap?
Akin et manirap ni si Job? Akin et say sakey ya inosente tan toon angapoy kakapuyan ya gagawaen to et manirap? Diad Daan na Sipan, say irap et akasuldong ed panagbilay na sakey a too; say sakey ya toon maniirap et sakey ya toon makasalanan. Sikato ya so ibabaga na saray taloran kakaaro nen Job. Ibabaga dan si Job so makasalanan kanian sikato so maniirap. Nakaukolan ya awaten toy kasalanan ya ginawa to. Andi! Kuanen Job. Inararok so Dios tan saray kakaabay ko, ipasuot nen Job.
Akin et walay irap?
Anggaman agmanisia si Job ya maniirap lapud sikatoy makasalanan, angapo so mattek ya rason ya naiter to no akin et sikato so maniirap. Say tepet to: “Akin et siak ni?” Anggaman anggapoy ebat to, mansiansia ni so pananisia to ed Dios, balet nakalan lay ilalon walay panguman na kipapasen to.
Anggapoy ebat ya naiter nen Job ed arap na irirap ya nalilikna to, anggaman tuan sinmabi so panguman na bilay to lanlamang. Sayan too, si Job, ya nanirap ed arap na Dios so nanermen ya agto kanepegan. Sikato so simbolo para sikatayon amin ed saray manirap ya agda natatalusan no akin. Saray inosenten maniirap.
Kabat tayoy Job; sikato ya maniirap tan manermen ya agtayo amtan no akin. No maminsan, say tepet nen Job et tetepeten tayo met: “Akin et siak ni?”
Say inpanbilay nen Jesus
Nen aneng-neng nen Jesus so irap na too, agton tampol ya tinepet, “Akin ey walay irap?”. Balet sikato so tampol ya anambal tan pinapaabig to ray mansasakit tan maniirap.
Ed diad Ibanghilyo nangelan tayoy inpangaro nen Jesus ed saray maniirap tan mansasakit. Sikaraya so linmad si Jesus. Sikaraya so awi-aiwt da met so tepet no akin et sikara so maniirap. Saksakey so ebat nen Jesus ed sikara: say panangaro na Dios. Sikato ya so rason no akin et linmad dia ed kapegleyan tayo.
Ag inebatan na Ibanghilyo so tepet nipaakar ed say irap. Balet, say inpaneng-neng nen Jesus et bilay ya mangaaro ed saray mansasakit tan maniirap, asray nalalames tan saray manermen. Sikato ya met so kerew ne Jesus ed amin ya disipulo to. Sikato ya so ebat nen Jesus ed tepet na irap ya nalilikna na amin.
Say irap so wadia ya tuan kaiba tayo leleg tayon manbibilay. Ag imbaga nen Jesus ya ekalen toy irap na bilay. No ag ingen say imbaga na Katawa et nakaukolan ya sakbaten tayo so krus tayo… tan diad sayan krus, wadman so Katawan ya kaiba tayo. Say Dios inararo to itayo anggaman sikatayo so maniirap tan mankapkapoy. Inpanengneng nen Jesus so nepeg ya gawaen tayo ed say irap tan saray maniirap: ipaneng-neng tayo so panangaro tan pikakasakey tayo ed saray maneermen, tan maniirap. Tan diad say paniirap tayo, walay ilalo tayon si Jesus so kaiba tayon mansakakbat na krus tayo, kaiba tayoy Jesus ya onlelewa ed ermen tayo., tan mamopunas na sarayan lewa tayo.
Agtayo komon naekalay ilalo, tan panangaro ed Dios.
Amen.
