6 Pebrero, 2000
KUMALIMAN SIMBA NA ORDINARION PANAON
Ononan Babasaen
Job 7:1-4,6-7
Inkuanen Job, “Say bilay na too singa pinasoot a panaglingkur na sondalo, singa bilay na pinasyan panagtrabaho, singa sakey ya aripen a pampilpilalekan toy ambetel a siroman; singa sakey a kumikimey a mantatalaran na upa to. Binulan-bulan ya anggapoy kabaliksay bilay ko; nilabi-labi ya ontan lay paneermen ko. No ondokul ak lan onogip, andokorokey so labi; pigar-pigar ak a sanlabi ya anggad palbangon.
Onlalabas iray agew ko ya anggapoy ilalok, maples ya onlalabas nen say panaglaga na makinan gawaay abel. Nadnunot mo, O Dios, a singa labat ingas so bilay ko; nansamput lay liket ko.”
Ebat a Salmo
Sal. 147:1-2.3-4.5.6
Ebat: Idayew yoy Katawan a mamapaabig na saray nanaandiaybiskeg na linawa.
Idayew yoy Katawan
Maung so mankantay pangidayew ed Dios tayo; maabig tan makapaliket so pangidayew ed sikato.
Say Katawan ipapaalagey to lamet so Jerusalem; papapawilen to ray Israelitan nibantak ed sananey a bansa. Ebat.
Papaabigen to ray nanaekalay biskeg na linawa tan berberen to ray sugat da.
Inggetar toy bilang da ray bitewen tan tatawagen to rad kangaranan da. Ebat.
Matalonggaring tan makapanyari so Katawan tayo; ag nasukat so kakabatan to.
Itatanduro to ray mapaabeba, balet ibabasig tod dalin iray totoon maoges. Ebat.
Kumadwan Babsaen
1 Cor. 9:16-19. 22-23
Anggapoy kanepegan kon mampasirayew makasengeg labat ed pampupulong koy Maung a Balita! Ta ingganggan ak a manggawad saya, et pakaskasi ak no ag ko ipulong so Maung a Balita! No pinilik yan kimey, walay ilaloan kon tumang. Balet gagawaen ko yan pangonur kod sakey a ganggan, ta nipia yan kimey ed siak. Anto siriy tumang ko? Say tumang ko say pankanawnawak a mangipulong ya anggapoy intiron kanepegan a para siak diad pampupulong koy Maung a Balita.
Bolus ak tan anggapon balut so mangaariped siak, balet papaaripen ak ed amin a too, pian dakel so natanggoyur kod pananisia.
No kaibak iray makapoy mampapakapoy ak met a singa sikara, pian natanggoyur ko ra. Mipapara ak ed amin a totoo diad amin a kipapasen da, pian nilaban ko ray arum ed sikara diad anggan anton pamakaaran.
Gagawaen ko yan amin makasengeg ed Maung a Balita, pian makapinabang ak met ed saray bindision to.
Alelluia. Siak so dalan, say katwaan, tan say bilay, kuay Katawan; anggapopy toon makaolad Ama no ag diad panamegley ko.
Alleluia. Jn. 14:6
Ibanghilyo
Mar. 1:29-39
Kasiput dad sinagoga, tinmuloy iran tampol ed abung di Simon tan Andres. Kaiba ra met si Santiago tan si Juan. Akarokul so biin katolangan nen Simon, tan napepetang. Kanyan kasabi nen Jesus, imbaga ra yan tampol ed sikato. Dinago nen Jesus ed donokulan to, binembenan tod lima, insan inibaan ton binmangon. Nakal so petang to, tan nansirbid sikara.
Kaselek na agew, inyakar na saray totoo ed kinen Jesus iray amin a mansasakit tan saray inaaponan na saray dimonyo. Dinmagop iray amin ya ombaley ed arap na saman ya abung. Amayamay iray pinapaabig ton manliliknay nambabangil a sakit tan pinapaekal to ray dakerakel a dimonyo. Ag to pinapaesel iray dimonyo, lapud kabat da no siopay Jesus.
Diad ontumbok ya agew, ambilonget ni nen binmangon si Jesus. Linmad sakey a mareen a pasen tan nampikasid man. Balet inanap nen Simon tan saray kakaiba to si Jesus. Nen nalmo ra inkuantod sikato, “Anapen kay amin a totoo”.
Balet inmebat si Jesus, “Onla ti met a mampulong ed saray kaliber-liber a pasen, ta sikato yay makasengeg na inakaran ko dia.”
Niliber toy intiron Galilea a nampupulong ed saray sinagoga tan nampapaway na saray dimonyo.