Ononan Babasaen
Gaw. 10:25-26,35-35,44-48

Babasaen ya inaon ed Saray Gawgawa da ray Apostol
 

Kasabi nen Pedro, inabet nen Cornelio, nandakmomod saliyan nen Pedro tan inggalang to. Balet pinaalagey nen Pedro. "Alagey ka," inkuanto, " ta too ak met labat a kaparam."

Insan nampaliwaway Pedro: "Natan ko la atebek ya anggapoy lalabien na Dios. Pakaliketay Dios so siopaman a walay takot ed sikato tan manggaway inkatonung, anggan antoy bansa to."

Nen mansasalita niy Pedro, linmeksab so Ispiritu Santo ed amin da ray onderengel na salita. Mankelaw ira may mananisian Judio a kakaiba nen Pedro, ta inter met na Dios ed saray Hintil so panangaron Ispiritu Santo. Ta arengel da a saray Hintil et mansasalita ray nandoroman salita tan mangidadayew irad Dios. Kanyan inkuanen Pedro, "Singa sikatayo met, inawat na sarayan totoo so Ispiritu Santo. Siopa niy manebel a sikaray binyagan ed danum?" Ingganggan to sirin a binyagan irad ngaran nen Jesu-Cristo. Kasumpal to ya, kinerew dan manayam nid may Pedro na pigaran agew.

Sikato yay Salita na Katawan.

Ebat a Salmo
Sal. 98: 1/2-3/34

E. Say Katawan impaamta tod saray bansa so manangilaban a pakayari to.

Kantaan yoy balon kanta so Katawan; nanggagaway makapakelkelaw iran bengatla!
Lapud dilin pakayari tan masanton biskeg to, sikatoy analo.

Imbawag na Katawan so impanalo to; impaamta tod saray totood Israel,
a katekep toy ag mangoman a panangaro tan say inkatoor tod sikara.

Anengneng na amin a katoowan so impanalo na Dios tayo.
Mankanta kayod liket ed Katawan, amin yon walad mundo; idayew yo diad panamegley na saray kanta
tan saray maliket ya eyag!

Kumadwan Babasaen
1 Jn. 4:7-10

Babasaen ya inaon ed ononan sulat net Juan
 

Inararo, manaarowan itayo, ta say aro manlalapud Dios. Siopamay mangaaro et anak na Dios tan kabat toy Dios. Siopamay ag mangaaro et ag to kabat so Dios, ta aro so Dios. Onyay impangipanengneng na Dios na aro tod sikatayo: imbaki tod mundo so bogbogtong ya Anak to, pian nawalaan itayoy bilay ed panamegley to. Sayay labay kon ibaga a panangaro: aliwan say panangaro tayod Dios, no ag ta say panagaro na Dios ed sikatayo nen imbaki toy Anak ton nibagat a makapaandi na kasalanan tayo.

Sikato yay Salita na Katawan.

Alleluia
Jn. 14:23
Alleluia. No aroen ak na siopaman, unoren to ray salitak;
sikatoy aroen na Amak tan onla kamin manayam ed sikato.
Alleluia.

Ibanghilyo
Jn. 15:9-17

Babasaen ya inaon ed masanton ibanghilyo onung ed kinen Juan
 

Inkuanen Jesus ed saray disipulo to: "No panoy panangaroy Ama ed siak, ontan met so panangarok ed sikayo; mansiansia kayod arok; singa siak, oonuren ko ray ganggan nen Amak, kanyan mansiansia ak ed aro to.

Imbagak ira yad sikayo, pian niwala ed sikayo so liket ko, tan nayadyari so liket yo. Sikato yay ganggan ko: manaarowan kayo a singa panangarok ed sikayo. Anggapoy toon babaleg so panangaro tod saray kakaaro to nen say toon mangibagat na bilay to para sikara. Kakaaro ta kayo, no onuren yo ray ganggan ko. Ag ta ki la ipapasen ya aripen natan, ta ag kabat na aripen so gagawaey katawan to. Ipapasen ta ki lan kakaaro, lapud impaamtak ed sikayo ray amin a nadngel kod Amak. Ag yo ak pinili; pinili tan tinoro ta kayon onla tan manbungay maando. Diad ontan, iter na Ama so amin a bengatlan kerewen yod ngaran ko. Saya sirin so ganggan kod sikayo: manaarowan kayo."
 

Sikato yay ibanghilyo na Katawan.

---