KUMANEM A SIMBA NA ORDINARION PANAON
Ononan Babasaen
Lev. 13:1-2,44-46
Say Katawan inter tod kindi Moises tan Aaron ira yan tontonen. No say sakey a too et agiri odino apelsaan odino alanokan a nayarin magmaliw a singa sakit a kating, iyakar ed kinen Aaron odino diad sakey ed saray paparin anak to. Say pari sintinsiaan ton marotak imay too, lapud samay kating a walad olo to.
Say toon walay kating ed laman to nepeg a mankawes na apilatpilat, ag mansagaysay, sakuban toy kapalduan lupa to ed bandad leksab, tan oneyag, “Marotak, marotak!” Mansiansian marotak legan a walay sakit to, tan nepeg a manayam ya arawid saray totoo, diad paway na kampo.
Ebat a Salmo
Sal. 32:1-2/5/11
Ebat: Sikay piregan ko, Katawan, no wala ak ed gunigon, et panoen mo ak na gayagay kilalaban.
Maliket iray totoon apirdonan la ray kasunsumlang da tan apaandi la ray kasalanan da.
Maliket so too a say Katawan et ag to aakusaen a nanggaway kaogsan tan anggapod puso to so antokaman a panamalingo. Ebat.
Insan impatwak iray kasalanan kod sika; ag ko inyamut iray maoges a ginagawak.
Ginetmak ya ipatwak irad sika, et pinirdonam ya amin iray kasalanan ko.
Sikayo ran totoon matonung, manliket tan manggayaga kayo, lapud saray ginagaway Katawan! Iyeyag yoy liket yo!
Kumadwan Babasaen
1 Cor. 10:31-11:1
Mangan kayo man odino oninom, o anggan antoy gawaen yo, gawa yon amin a pakagalangan na Dios. Mambilay kayo ya aliwan sikayoy panlapwan na pankasalanay siopaman – saray Judio, saray Grigo, o saray kabyangay iglisia na Dios. Gawa yoy gagawaen ko; papaliketen koy amin a katoowan tan ag ko nununotey pankaabigan ko, no ag say pankaabigan na amin pian nilaban ira.
Alleluia. Say salitam, O Katawan, et katwaan; pasanto mo kami pa diad panamegley na katwaan. Jn. 17:17
Ibanghilyo
Mar. 1:40-45
Walay sakey a lakin akating a linmad kinen Jesus, tinmalimukor ed arap to tan akikasi. Inkuanto, “No labay mo, nayarian mo ak a paabigen.”
Akasian nen Jesus kanyan inyonat toy lima to, diniwit to, tan inkuanto, “Labay ko. Abig ka la!” Diad saman a bekta nakal so kating to tan inmabig. Pinaonlan tampol nen Jesus kayari ton binilin a maung, “Ag mo yan balut ibabalitad anggan siopa. Lakad pari tan paneng-neng ka, insan ka mangibagat onung ed Ganggan nen Moises, pian napaneknekan ed balang sakey ya inmabig ka la.”
Linma may laki, balet imbabalita tod amin a pasen so agawad sikato. Diad karakel na angibalitaan to , si Jesus ag la makaonlan maparontal ed anggan anton baley. Nanaayam la sirin ed saray pasen ya ag natotoowan, tan diman la dinadagoy totoon nanlapud amin a lugar.
