KUMAPITON SIMBA NA ORDINARION PANAON
Ononan Babasaen Isa. 43:18-19, 21-22, 24-25
Babasaen ya inaon ed libro na propita Isaias
Say Katawan kuanto, “Ag kayo manmamatalek ed saray agawgawad imbeneg a panaon, odino pinunot iray agawa nen saman ni. Talaranan yoy gawaen kon balo a bengatla. Nagagawa la-nanengneng yo la natan! Manggawa ak na dalan ed kalawakan tan itdan ta kayo na saray sobul diman. Sikaray totoon ginawak a para siak, mankanta ra na saray dayew ko! Balet sinmawa kad siak nen saman, Israel; ag mo ak inggalang. Say agawa ingen et siak so impansakbat mo lapud saray kasalanan mo; pinakesaw mo ak lapud saray kaogsan a ginagawam. Anggaman ontan, siak so Dios a mamipirdonad saray kasalanan mo, et onyay gagawaen ko lapud inka-Dios ko. Ag ta ka singilen ed saray kasalanan mo.”
Salita na Katawan.
Ebat a Salmo Sal. 41:1-2/3-4/12-13
E. Katawan, paabig mo pay kamarerwak, ta nankasalanan ak ed sika.
Maliket iray totoon maaro ed saray mairap-bilay; tulongan ira na Katawan no nagugunigon ira. Iyagel ira na Katawan tan pansiansiaen to ran mambilay; pagmaliwen to ran maliket diad tapew na dalin; ag to ra paolyan a napelag ed pakayari na saray kalaban da. Ebat.
Say Katawan tulongan to ra no mansasakit ira tan paabigen to ra. Inkuanko, “Katawan, nankasalanan ak ed sika; kasian mo ak pa tan paabig mo ak.” Ebat.
Naamtaan ko a pakaliliketan mo ak, no ag ak taloen na saray kalaban ko. Tulongan mo ak, ta gagawaen koy kaptekan; panayamen mo ak ya ando lan ando ed kawalaan mo. Idayew yoy Katawan a Dios na Israel! Idayew yo ya anggad angga! Amen! Amen! Ebat
Kumadwan Babasaen 2 Cor. 1:18-22
Babasaen ya inaon ed kumadwan sulat nen Pablo ed saray taga Corinto
Bangta matoor so Dios, say salita mid sikayo aliwan “Andi” tan “On.” Ta say Anak na Dios a si Jesu-Cristo ya impulong mi di Silvano tan Timoteo et aliwan “On” natan et kabebekta “Andi,” no ag ingen sikatoy “On” na Dios, ta sikatoy pakasumpalay amin a sipay Dios. Sikato yay makasengeg a diad panamegley nen Jesu-Cristo, nayarian tayon ibagay “Amen” a pamagalang tayod ibagay “Amen” a pamagalang tayod Dios. Ta say Dios so mamapaelet na pikakasakey mi tan sikayo ed Cristo. Say Dios met so amilid sikami. Sikato met niy ananda a kayaryan to kami, tan angiter na Ispiritu Santo ed puso mi, a kaletay panumpal tod saray sipan tod sikami.
Salita na Katawan.
Alleluia 1 Sam. 3:9; Jn. 6:69
E. Alleluia. Mansalita ka, O Katawan; onderengel so aripen mo! Walad sika ray salitan mangiinter na bilay ya andi-anggaan. E. Alleluia.
Ibanghilyo Mar. 2:1-12
Babasaen ya inaon ed masanton ibanghilyo onung ed kinen Marcos
Kalabas na pigaran agew, pinmawil si Jesus ed Capernaum. Kinmayat so balita a sinmempet ed abung. Ontan lay karakel na dinmadago, kanyan napnoy totoo so anggad pati arapay abung. Nen mampupulong si Jesus ed sikara na nipaakar ed Maung a Balita, wala ray sinmabin totoo. Kaiba ray sakey a paralitikon nilibit na apatiran totoo. Balet lapud karakel na totoo, ag da niasingger ed kinen Jesus imay mansasakit. Kanyan binongawan day atep ya apetekan nen Jesus, insan da inyabeba may paralitikon walad dokulan. Anengneng nen Jesus so pananisia ra, kanyan inkuantod samay paralitiko, “Anak ko, apirdona la ray kasalanan mo.”
Wala met diman iray akayorung a pigaran iskriba tan inkuandad kanunotan da, “Akin et ontan so panagsalita to yan too? Sumpad Dios tay ibabaga to! Siopay makapirdona na kasalanan no ag say Dios labat?”
Amtan tampol nen Jesus so wala kanunotan da, kanyan inkuantod sikara, “Akin et ontay walad kanunotan yo? Dinay lalon mainomay ya ibagad sayan paralitiko: say pangibagay, ‘Apirdona ray kasalanan mo,’ o say pangibagay ‘Alagey ka, alam so dokulan mo tan manakar ka?’ Paneknekan kod sikayo sirin a say Anak na Too et walay pakayari tod tapew na dalin a mamirdonay kasalanan.” Inkuantod satan ed samay paralitiko, “Kuankod sika, alagay ka, alam tay dokulan mo, tan sempet ka la!”
Naimatunan dan amin ya inmalagey, inala toy dokulan to, insan la linman tampol. Agaylay pankelaw na amin a totood man tanindayew day Dios. “Ag kami ni akanengneng na onya!” kuanda.
