KUMAWALON SIMBA NA ORDINARION PANAON (B)

Ononan Babasaen Os. 2:14, 15, 19-20

Babasaen ya inaon ed libro na propita Oseas

Inyakar ko lamet ed kalawakan yan bii; diman ko pandaleman na panangarok pian napapawil kod siak.  Ebatan to ak diman a singa samay ginawa to nen malangwer ni, sanen sikatoy pinmaway a nanlapud Egipto.  Israel, pagmaliwen ta ka ya asawak; siak so matwa tan matoor ed sika; ipanengneng kod sikay ag mangoman a panangarok tan panangasik tan pagmaliwen ta kan kayaryan ko ya anggad angga.  Tooren koy sipan ko tan kayaryanen ta ka, tan birbiren mo ak a Katawan.
Salita na Katawan.



Ebat a Salmo Sal. 103:1-2/3-4/8, 10/12-13

E. Maaro tan mapangasi so Katawan.

Kamarerwak, idayew moy Katawan!  Sigput ya inkatook, idayew moy masanton ngaran to!  Kamarerwak, idayew moy Katawan, tan ag mo lilingwanan so ontan lan panangasi to.  Ebat

Papaandien ton amin iray kasalanan ko tan papaabigen ton amin iray sakit ko.  Iyaagel to ak ed lobuk, tan ibibindision tod siak so panangaro tan panangasi.  Ebat

Maaro tan mapangasi so Katawan, aliwan maipapasnuk tan napno na ag mangoman a panangaro.  Ag to itayo dudusaen onung ed kanepegan tayo, odino babalesen onung ed saray kasalanan tan kaogsan tayo.  Ebat

No panoy kaatagey na tawen manlapud dalin, ontan met so kabaleg na panangaro tod saray mangigagalang ed sikato.  No panoy kaarawiy bokig ed abalaten, ontan met so kaarawiy impangekal tod sikatayo na saray kasalanan tayo.  No panoy panangasi na ama ed saray anak to, ontan met so pangakasiy Katawan ed saray mangigagalang ed sikato.  Ebat


Kumadwan Babasaen 2 Cor. 3:1-6

Babasaen ya inaon ed kumadwan sulat nen Pablo ed saray taga Corinto

Kapara mi kasi ray arum a totoo a nakaukolan mi ni ray sulat na rikomindasion a para sikayo o manlapud sikayo?  Sikayon dili so sulat mi a nikorit ed puso mi a nayarin amtaen tan basaen na balang sakey.  Malinew a sikayo so sulat nen Cristo ya impawit ed panamegley mi.  Aliwan tinta so impangisulat ed saya, no ag ingen say Ispiritu na mabilay a Dios; tan aliwan diad tapew na baton tapyak so angisulatan, no ag ingen diad pusoy katoowan.
Ibabaga mi ya, ta manmamatalek kamid Dios diad panamegley nen Cristo.  No diad sikamin dili labat, ag mi nipasen a nagnap so pakayari mid sayan gawa; manlalapud Dios so antokaman a pakayari mi.  Sikatoy angiter ed sikami na pakayari min manlingkur ed balon sipanan, say sipanan ya ag inletneg ed nisulat a ganggan, no ag ingen diad Ispiritu.  Ta patey so iter na nisulat a ganggan, balet bilay so iter na Ispiritu.
Salita na Katawan

Alleluia Jn. 1:14, 12
E. Alleluia.  Nagmaliw a too so Salita na Dios tan akiayam ed sikatayo.  Inter tod saray angawat ed sikato so pankanepegan a magmaliw iran anak na Dios.  E. Alleluia.


Ibanghilyo Mar. 2:18-22

Babasaen ya inaon ed masanton ibanghilyo onung ed kinen Marcos

Aminsan, manaayuno ray Pariseo tan saray disipulo nen Juan a Managbinyag.  Wala ray totoon linmad kinen Jesus tan tinepet da, “Manaayuno ray disipulo nen Juan a Managbinyag; ontan met na saray disipulo da ray Pariseo.  Balet akin et ag manaayuno ray disipulom?”
Inmebat si Jesus, “Napanayuno yo kasi ray mibabansal leleg a kaiba ra niy nubio?  Ambegyan kaiba ra niy nubio, ag ira makapanayuno.  Balet onsabiy agew ya ontaynan lay nubio; sikato lad satay panayuno ra.
“Anggapoy mangisakab na balon abel ed daan a kawes.  Ta no onyay gawaen to, samay balon abel ya insakab et lalon pabalegen to ni may botaw na daan a kawes.  Anggapo met so toon mangikargay balon alak ed pananginan a katat a dagdaan la.  Ta no onyay gawaen to, say balon alak pilaten toy pananginan a katat, et nadarak so alak tan say pananginan.  Kanyan say balon alak nepeg ya ikargad balon pananginan!”

Ibanghilyo na Katawan.