Kumasyam a Simba
na Ordinarion Panaon (B)
Ononan Babasaen
Deut. 5:12-15
“Ngilinan moy Agew na Panagpainawa tan ipasen mon masanto, onung na ingganggan ko, siak a Katawan a Dios mo, ed sika. Anem agew a makapankimey ka, balet say kumapiton agew et sikatoy agew na panagpainawa a nisaklang ed siak. Diad sayan agew anggapoy toon mankimey: sika, saray anak mo, saray aripen mo, saray ayep mo, odino saray sangkailin manaayam ed bansam. Nepeg a mampainawa iray airpen mo a singa pamapainawam. Nunot mo ya aripen ka nen saman ed Egipto, tan siak a Katawan a Dios mo et impaway ta kad man diad panamegley na baleg a pakakarik tan biskeg ko. Kanyan igaganggan ta kan ngilinan mo so Agew na Panagpainawa.
Ebat a Salmo
Sal. 81
Ikanta yoy gayaga ed Dios, a mananulong tayo.
Igapo yoy mankanta tan paknul yo ray pandirita: manogtog kayoy marakep ed saray arpa tan saray lira.
Sibuk yoy trumpita a pangipakabat na pista, no balo so bulan tan no tulaw.
Sikato yay ganggan ed Israel, sikato yay bilin na Dios nen Jacob.
Ingganggan to ya ed saray totood Israel nen dinogpaan toy dalin na Egipto.
Narerengel koy bosis ya ag ko kabat a kuanto, “Inekal kod takeb yo iray kairapan a sasakbaten yo.
Tinmawag kayod siak nen nagugunigon kayo, et inlaban ta kayo.
Nepeg ya ag kayo mangigalang ed sananey a dios.
Siak so Katawan a Dios yo ya angipaway ed sikayod Egipto.
Kumadwan Babasaen
2 Cor. 4:6-11
Say Dios ya angibaga, : Ompaway a manlapud kabilongetan so liwawa!” et sikato lamlamang so angiwandag na liwawad saray puso mi, pian nakabatan miy kagalangay Dios a mandarlang ed lupa nen Cristo.
Balet sikamin walay maispiritun kayamanan et singa kami saray bangan lopuk, pian nipanengneng a say Dios, aliwan sikami, so kawalaay sankatageyan a pakayari. Biek-taa-biek so pakagogoloan mi, balet ag kami natalo; no maminsan manduaruwa kami, balet ag kami nanaekalay ilalo. Dakel iray mamapasegsegang ed sikami, balet ag kami nanaandiay kaaro; tutumbaen da kami no maninsan, balet ag kami nalalausan. Lawas min awit ed laman mi so patey nen Jesus., pian say bilay to et nanengneng ed laman mi. Lawas maatap so bilay mi lapud kinen Jesus, pian say bilay to et nanengneng ed laman min ompatey.
Alleluluia. Saray karnirok derengelen day bosis ko, kuay Katawan; amtak ira tan totombuken da ak.
Ibanghilyo
Mar. 2:23-3:6
Aminsan ya Agew na Panagpainawa, ondaralan ed katrigowan si Jesus tan saray disipulo to. Nen manaakar ira, nanaala ra may disipulo to na bungay trigo. Kanyan saray Pariseo inkuan dad kinen Jesus, “ Nengneng moy gagawaen da ra tay disipulom. Sebel itan no Agew na Panagpainawa!”
Inmebat si Jesus, “ Ag yo ta nin balut abasa so ginawa nen David nen si Abiatar so Pangulon Pari? Nen si David tan saray kakaiba to et narasan ira tan anggapoy naakan da, linmoob irad abung na Dios tan kinan day tinapay ya imbagat ed Dios. Onung ed Ganggan say pari labat so nayarin mangan na sayan tinapay, balet kinan nen David tan initdan to ni ra may kakaiba to.”
Insan kuanen Jesus, “ Say Agew na Panagpainawa so niletneg a pankaabigay too; say too ag pinalsa a para Agew na Pangpainawa. Ontan sirin, say Anak na Too so Katawan na anggan Agew na Panagpainawa.”
Nen pinmawil si Jesus ed sinagoga, walad may lakin aparalisis so sakey a lima to. Wala ra met dimay totoon labay dan akusaen si Jesus, kanyan siniim da no mantambal kasi ed Agew na Panagpainawa. Inkuanen Jesus ed samay lakin aparalisis so lima to, “Gala diad arap.” Insan to tinepet ed saray totoon wadman, “Antoy nayarin gawaen no Agew Na Panagpainawa, onung ed Ganggan? Say panggaway maung, o say panggaway maoges? Say panambut na bilay, o say pamatey ed sakey a too?”
Balet anggapoy eseesel da. Legan a neneng-nengen nenJesus iray totood kaliber-liber to, akapasnuk; balet nantaruk na ermen so pasnuk to, lapud kinaawet na puso ra. Inkuantod samay laki, “Iyonat moy limam.” Inyonat ton may lima to, tan inmabig ed saman a bekta. Pinmaway ira may Pariseo tan akitongtong iran tampol ed sray disipulo nen Herodes, tan nampapaknaan da a pateyen si Jesus.
