Pandalepdepan a nanlapud say TEAM MINISTRY na Parokia na Sto. Tomas de Aquino, Mangaldan, Pangasinan, tan insulat nen REB. PADRE FRANCIS C. POSADAS, miembro na abitlan Team Ministry. Say kaiba ra et di REB. PADRE JOHN R. PALINAR (Moderator) tan REB. PADRE. RENE E. MENDOZA (akapeket "attached" ya miembro).


ILUKAS SO PUIRTA PARAD SI CRISTO!

Say Simbaan niletneg 2000 taon lay limbabas, mabilabilay tan umbubulaslas ni. Say  Jubileo o Masanton Taon et sisilibraan ed Simbaan pigay lasos taon lan apalabas tan ed sarayan panaon sisilibraan to kada duamplo tan liman taon tan wala ra met ni ray arum ya  “special” Jubileo ya sisilibraan na Simbaan ed niletneg iran okasyon. Si Jesus inkuanto: “Siak so puirtan dalanen” (Jn 10:7). Sikatoy masanton puirta, “saray matunong labat so makaloob.” (Ps 117:20). Sikatoy “dalan” ya mamaarap ed bilay no lukasan tayoy kapusuan ti met parad sikato tan kaparam tayon too. Sayan salitan “Jubilee” o Jubileo et nanlapud salitan Hebreo “yobel” a say talus to sa saklor na lakin karnero ya ikakanan totot ya sisibukan ya panawag ed saray totoo no igapo so baleg ya fiesta of silibrasyon.

Anto tan so taon na Jubileo?  Antoy kabaliksan ton ya? Sikato yay tawag ed balang sakey ya dalepdepen tan talusan tayo so Misterio na intoo nen Katawan tayon Jesucristo. Ag tayo lilinguanan ya sayDios inaaro to so too, inaro to itayo tan lapud saya si Jesus nagmaliw ya too tan nianak ed pegley tayo duan libon taon lay apalabas. Tandaan tayo sirin ya maaaruan itayo ya singa impangaro nen Cristo ed sikatayo.

Balang sinansakey diad pansilibra na Jubileo, say annibersario na inkianak nen Cristo so tatawagen to itayon mandalepdep nipaakar ed Dios ya sikatoy aro. Say aro  sikatoy mangitonton ya onlad Dios tan walay kareenan ed kapusuan tayo. “Kanyan gawa yod kapara yon too so gabay yon gawaen da met ed sikayo, sikato yay Ganggan tan saray Propetas” (Mt 7:12).

Say Jubileo o Masanton Taon so:

            -Taon ya spiritual ya panagpasimbalo
            -Taon ya naabet tayoy Cristo ya personal
            -Taon ya napno na ag nasabsabaan ya panangaro na Dios ed amin ya totoo.

Akin et Jubileo  na Taon 2000? Makabaliksan ya nonoten so ilalabas na taon ya ongagapo ed amin ya pasen diad taon na insabi nen Cristo diad mundo. Diad igapo tan iloob na balon Millenio, amin ya Cristianos manpaabeba rad Katawan tan nengnengen day sikaran dili no wala ray agawa ran maoges ed panagbilay da. Say pansilibra na sayan Jubileo so paneknekkan na Cristianos ed dad sayan panaon  so pananisiad Dios ya inpakabat nen Cristo, diad ilalo ya minabang ed andi anggaan ya bilay tan parlangen toy panangarod mabiskeg ya panlingkor ed saray agagi. Mainomay so mankomplin nipaakar ed nagagawan maoges ed sayan mundo balet anto ray nagagawam iran  pangkamaongan? Say Jubileo sakey ya okasyon ya say Dios a Katawan tayo itdan to itayoy  pampasimbaloy bilay tayo tan italindeg tayo so pananisia tayo.

Panon ya  saray Cristianos silibraan day Jubileo? Diad sayan taon na Jubileo saray Cristianos iyaalagey day pinasimbalon pakelaw na pananisia kasakbayan ya mangaroy Dios Ama, ya inter toy Anak to, “siopamay manisiad siak sikato et ag nabalang no ad ingen nawalaay bilay ya andi-anggaan (Jn 3:16).”

Anto ray nakaokolan?

        1. Say lanang ya panagapiger na panagbilay na kada Cristiano. Tepeten tayoy sikatayon dili, antoy gagawaen kod sayan panbibilay ko? Panon so panagbilay ko? Natatawag ak kasin Cristiano? Anto ray nagagawak? Panon so panasikasok ed kaparak ya too?

       2. Say maralit o masimoon ya pambabawi, say Dios a Katawan tayo ag tayo natilaan, balang sinansakey ed sikatayo so mambabawi . say liket na kada Jubileo et say liket ed pambabawi ed saray kasalanan tan say liket ta ipawil tayod Dios.

      3. Say mabiskeg ya panpasimbaloy panagbilay.

Antoy nagamoran ya “indulgencia” ed say taon na Jubileo? Say indulgencia et say pamerdona na Dios diad saray dusan temporal (makamundo) lapud inpakasalanan ya aperdona lara. Say Jubileo et taon na gracia diad masimoon ya panpasimbalo. Saray gawaen pian nagamoran so saray indulgencia, ya nitanda ed Bull of Indication ed sayan taon na Jubileo so saray ongguendan:

       1. Say pangawat na Sacramentoy confesar, ya sikatoy mangitonton ed petepeteg  ya pansalat (conversion) na puso.

       2. Masanton Communion

       3. Panliber ed saray Simbaan ya abitlan laen  odino panggaway Pilgrimage
      
       4. Saray Dasal

       5. Say ibisita ed Simbaan  (Diad  Vicario I:  Diad St. John the Evangelist Parish, Dagupan City; Vicariate II: Diad Epiphany of our Lord Parish, Lingayen, Pangasinan, Vicario III: Diad  Our Lady of the Most Holy Rosary Parish Manaoag; Diad Vicario IV: Diad St. Dominic Parish, San carlos City).

       6. Saray gaway panangasi

Say getma na sayan Jubileo et malinlinew ya inpatalus.

Balang sakey ed sikatayo et nengnengen tayoy manonan getma na sayan Jubileo, say pamabiskeg na pananisia tan ibilay so inkacristiano tayo. Say tandaan na balang sinansakey ed sikatayo:

       1. Amtaen tayon maong so Dios Ama. Anak, tan Espiritu Santo, ontan met si Virgen Maria ya Ina na Manadondon. Agtayo naaro so arum ya too no agtayo kabat. Kanian manggawa na sipan ya personal ya:
              a. manbasa tayoy salitay Dios, amin tayon Cristianos so pasimbaloen tayoy kuli tayo manbasay Biblia.
              b. Paaralemen tayoy pakatalus tayod  Catolican Doctrina diad panaral tayoy catekismo na Catolicon Simbaan.
              c. Diad pibiang tayod saray Liturgia say Masanton Misa

       2. Ibilay so Pananisia:
              a. Diad macristianon seseg ed  panagbilay tayo, diad familia tayo, diad sociedad, diad pankikimeyan tayo, tan diad Simbaan tayo.
              b. Diad gaway panagasi o panagaro, say pananisia ya anggapoy maong ya gawa et inatey.
              c. Ibagat irad Dios sa saray irirap ya pitekep tayod inpansakbat nen Cristo na Cross.