ONONAN BABASAEN Exo. 24:3-8

Babasaen ya inaon ed libro na Exodo
 

Linmay Moises ed saray totoo tan sinalita tod sikaray amin ya ingganggan tan imbilin na Katawan, et amin da ray totoo nankakasakey iran inmebat, "Gawaen mi ray amin ya imbaga na Katawan."  Insulat nen Moises ya amin iray ganggan na Katawan.  Diad ontombuk a kabkabwasan, si Moises angipaalagey na altar ed alusadsar na palandey tan angilira na labinduan bato, sakey a bato so para kapag sakey ed saray labinduan tribu na Israel.  Insan angibaki na saray tobun-balon lalaki tan angisaklang irad Katawan na saray bagat a popoolan tan pigaran baka a bagat a para kareenan.  Inala nen Moises so kapaldua na dala na saramay ayep tan inkarga tod saray palanggana, insan to insisibo ed altar.  Insan to inala so libro na sipanan, tan maksil ton imbasa ed saray totoo.  Inkuanda, "Onuren mi so Katawan tan gawaen mi ray amin ya ingganggan to!"

 Insan inala nen Moises imay dala a walad saray palanggana tan insisibo tod saray totoo.  Inkuanto, "Sikato yay dala a mamaelet na impisipanan na Katawan ed sikayo nen inter tod sikayo ra yan amin a ganggan.

Salita na Katawan.

SALMO RESPONSORIO

Ebat: Alaen koy kupa na kilalaban, tan tawagan koy ngaran na Katawan.

1. Antoy nayarian kon ibales ed Katawan lapud saray amin a kaabigan tod siak?  Mangyakar ak ed Katawan na bagat ya alak, a pisalamat kod impangilaban tod siak. E.

2. Agaylay sakit ed Katawan so ipatey na siopaman ed saray totoo to! Siak so aripen mo, Katawan; lilingkuran ta kan singa impanlingkur nen inak.  Impaliis mo ak ed patey. E.

3. Itdan ta kay bagat na pisasalamat tan mampikasi ak ed sika.  Diad tipon da ray amin a totoom, iter kod sikay insipan kod sika. E.

KUMADWAN BABASAEN Heb. 9:11-15

Babasaen ya inaon ed sulat ed saray Hebreo
 

Sinmabi lay Cristo a Pangulon Pari na saray maung a bengatlan wadya la ra.  Lalon matalonggaring tan lalon nagnap niy panlilingkuran ton tulda ya ag ginaway too, labay ton ibaga, aliwan kabyangan na sayan mundon pinalsa.  Amimpinsan a linmoob ed Sankasantosan a Pasen si Cristo, tan duga la man.  Aliwan dala na saray kanding tan saray kilaw a baka so inawit ton ibagat no ag ingen say dilin dala to, tan lapud saya inggamuran to itayoy karondon ya andi-anggaan.  Say dala na saray kanding tan saray bakan kalakyan tan say dapul na pinoolan a bakan kilaw iwalsik irad totoon nipasen a marotak tan, diad ontan, nipasen iran malinis, onung ed ganggan.  Lapud tua ya, lalon dakel niy nagawaay dala nen Cristo!  Diad panamegley na andi-anggaan ya Ispiritu, imbagat tod Dios so sikaton dili ya anggapoy tilul.  Linisan na dala to so konsinsia tayo tan ekalan to na saray andi-kakanaan a gawgawa, pian nalingkuran tayo so Dios a mabilay.

 Kanyan si Cristo so manamegley na balon sipanan, pian natawir na saray tinawag na Dios so andi-anggaan iran bindision  ya insipan to.  Nagawa ya lapud walay inatey ya amaandiy kasalanan da ray totoo nen wala ni rad silong na onaan a sipanan.

Salita na Katawan.

Alleluia
E. Alleluia.  Siak so mabilay a tinapay a nanlapud tawen, kuay Katawan; mambilay ya anggad angga so mangan na sayan tinapay.  E.  Alleluia.

IBANGHILYO Mar. 14:12-16, 22-26

Babasaen ya inaon ed masanton ibanghilyo onung ed kinen Marcos
 

Diad ononan agew na Pistay Tinapay ya Anggapoy Libadura, a sikato met so panagpatey na saray kilaw a karniro ya onkanad Paskua, tinepet da ray disipulo ed kinen Jesus, "Iner so labay mon pangiparaanan miy panganan moy Paskua?"

 Imbaki nen Jesus so duaran disipulo to tan binilin to ra, "Laka yod siudad.  Naabet kid may sakey a lakin sankasakbat toy samboyug a danum.  Tombuk yod looban ton abung.  Insan ikuanyod akanabung a patetepet na Maistro: 'Iner so kawalaay kuarton panganan ko tan saray disipulok na Pandem na Paskua?' Itoro tod satan so sakey a maawang a kuarto ed tagey, a wala la ray ikanan kagawaan ya akaparaaan.  Iparaan yod may pandeman tayo."

 Pinmikal ira may disipulo, linma rad siudad, tan amin ira may imbaga nen Jesus ed sikara arumog da.  Kanyan imparaan day Pandem na Paskua.

 Nen peles dan mangakan, angalay tinapay si Jesus.  Kasumpal ton akisalamat ed Dios, pinipisag to, insan to inter ed saray disipulo to tan kuanto, "Ala yo ya; sikato yay laman ko."
 Insan inala toy kupa, tan kasumpal ton akisalamat ed Dios, inter tod sikara.  Inminom ira ya amin.  Inkuanen Jesus ed sikara, "Sikato yay dalak a mamaneknek ed impisipanay Dios, say dalak ya onterter para saray amayamay a totoo.  Kuankod sikayo ya ag ak la oninom na sayan tabul na ubas, anggad agew na iyinom ko na balon tabul na ubas ed Panariay Dios."
 
Anganta ray sakey ya imno, insan ira linma ed Palandey na Kaolibaan.

Ibanghilyo na Katawan.