SIMBA NA IMPANIRAP NA KATAWAN
(DOMINGO DE RAMOS)
16 ABRIL 2000
Ononan Babasaen Isa. 50:4-7
Babasaen ya inaon ed libro na propita Isaias
Imbangat na Katawan a Dios ed siak so salitaen ko, pian napabiskeg ko so linawa na toon mapaga. Kapag kabwasan iitdan to ak na pilalek ya ondengel ed ibangat to. Say Katawan initdan to ak na pakatalus, et ag ak linmaban ed sikato odino inarawian ko. Intaryak so beneg ko ed saray nansiplat ed siak. Ag ko ra binaat nen pinabaingan da ak, nen binagut da ray balbas ko tan nilulukdaan day lupak. Balet ag ak nasakitan na saray panamabaing da lapud tutulongan ak na Katawan a Dios. Pinakapal koy lupak pian nitepel ko ra. Amtak ya ag ak napelag ed kababaingan.
Salita na Katawan.
Ebat sa Salmo Sal. 22:7-8/16-17/18-19/22-23
E. Dios ko, Dios ko, akin et inkaindan mo ak?
1. Luludlureyen ak na amin da ray makanengneng ed siak; dilat-dilatan tan mameyengpeyeng ira. Kuanda, "Nanmatalek kad Katawan, Akin et ag to ka ilaban? No talagan inaro to ka, akin et ag to ka tulongan?" E
2. Aliktub ak na saray totoon maoges, singa ra olup na saray ason ondodoklus ed siak; bibingkasen da ray limak tan saray salik. Nengnengnengen tan molmolagatan ak na saray kalaban ko. E.
3. Pampapalaranan da ray kawes ko tan panaapagan da. Ag mo ak aarawian, O Katawan! Ganatan mo pa so pangilaban ed siak. E.
4. Ibagak ed saray kadalaan ko no anto ray ginagawam; idayew ta kad ulopan da: "Idayew yoy Katawan, sikayo ran aripen to! Itanduro yo, sikayo ran kabyangay boleg nen Jacob; E.
Kumadwan Babasaen Fil. 2:5-11
Babasaen ya inaon ed sulat nen Pablo ed saray taga Filipos
Nepeg yon aligey ogali nen Cristo Jesus: Anggaman a walad sikatoy inka-Dios, ag to impasoot a mansiansian kaparay Dios. Nilakseb to ingen so inka-Dios to, tan inala toy kipapasen na aripen nen nagmaliw a too. Nampaabeba tan maonur ya anggad pateyan, anggad ipapatey ed krus. Kanyan say Dios intanduro to ed sankatageyan, tan initdan toy ngaran a matalonggaring nen say dinan man a ngaran. Diad ontan, amin da ray apalsan walad tawen, diad mundo tan dalem na dalin ontalimukor iran mangigalang ed ngaran nen Jesus. Ibawag met ed satan na amin a katoowan a si Jesu-Cristo sa Katawan. Lapud saya, say Dios Ama so nagalang.
Salita na Katawan.
Birsikulo Kasakbayay Ibanghilyo
Sir Cristo nagmaliw a maonur para sikatayo ya anggad patey ed krus. Kanyan say Dios intanduro to ed sankatageyan, tan initdan toy ngaran a matalonggaring nen say dinanman a ngaran.
Ibanghilyo Mar. 14:1-15:47
Say Impanirap nen Katawan tayon Jesu-Cristo onung ed kinen Marcos
Duay agew labat la natan kasakbayan na Pista na Paskua tan pista na Tinapay ya Anggapoy Libadura. Saray manonan papari tan saray iskriba manaanap iray pankanawnawan mangerel a maamut ed kinen Jesus, insan da pateyen. Balet inkuanda, "Ag tayo pateyen legan na pista, ta ag la pigan manggolo ray totoo."
Si Jesus walad abung nen Simon ya akating, diad Betania. Nen mangakan, inmasingger so sakey a biin sankaawit toy botilyan alabastro a napnoy mabmablin pabalingit a ginawad puron nardo. Binetag toy sangab na botilya, insan to inkalbod olo nen Jesus imay pabalingit. Asanukan iray arum a totoon wadman tan inkuandad sakey tan sakey, "Akin et dinarak yan pabalingit? Inlako la komun na masoluk a talon lasus a dinario, insan inter ed saray mairapbilay so nanlakoan!' Ontan lay impambalaw dad samay bii.
Balet inkuanen Jesus, "Paolyan yon bukor! Akin et balbalawen yo? Maabig tan marakep yan ginawa tod siak. Ta kaiba yo lawas iray mairap-bilay tan nayarian yo ran tulongan ed angan anton oras a labay yo. Balet ag yo ak lawas kaiba. Ginawa na sayan bii so anggaay nayarian to. Kinalboan toy laman ko na pabalingit a pangiparaan na pangipompon ed siak. Natan, tandaan yo ya! Inerman ed sankamundoan so pangipulongay Maung a Balita, nasalitay ginawa to yan bii a pakanudnunotan ed sikato."
Si Judas Iscariote, sakey ed saray labinduan disipulo, linmad saray manonan papari a mitongtong na nipaakar ed pangyawat tod kinen Jesus ed sikara. Makaliliket iran maung nen nadngel day imbaga nen Judas tan insipan dan itday kuarta. Kanyan ginapoan nen Judas so mananap na pankanawnawan mangyawat ed kinen Jesus.
Diad ononan agew na Pistay Tinapay ya Anggapoy Libadura, a sikato met so panagpatey na saray kilaw a karniro ya onkanad Paskua, tinepet da ray disipulo ed kinen Jesus, "Iner so labay mon pangiparaanan miy panganan moy Paskua?"
Imbaki nen Jesus so duaran disipulo to tan binilin to ra, "Laka yod siudad. Naabet kid may sakey a lakin sankasakbat toy samboyug a danum. Tombuk yod looban ton agung. insan ikuanyod akanabung a patetepet na Maistro: 'Iner so kawalaay kuarton panganan ko tan saray disipulok na Pandem na Paskua?' Itoro tod satan so sakey a maawang a kuarto ed tagey, a wala la ray ikanan kagawaan ya akaparaan. Iparaan yod may pandeman tayo."
Pinmikal ira may disipulo, linma rad siudad, tan amin ira may imbaga nen Jesus ed sikara arumog da. Kanyan imparaan day Pandem na Paskua.
Nen labi la, sinmabiy Jesus tan saray labinduan disipulo to. Nen wala rad lamisaan a mangakan, inkuanen Jesus, "Kuankod sikayo: sakey ed sikayo ran karongok natan so mantraidor ed siak."
Agoloy kalakal da ra may disipulo kanyan nansosoblay iran nantepet, "Siak kasi, Katawan?"
Inmebat si Jesus, "Sakey ed sikayon labindua, say kabansag kon mangisawsaw na tinapay ed aralem a plato. Ompatey so Anak na Too, onung na ibabagay Masanton Sulat, balet kaskasian so toon mantraidor ed Anak na Too! Magmaung ni komun ya ag la nianak!"
Nen peles dan mangakan, angalay tinapay si Jesus. Kasumpal ton akisalamat ed Dios, pinipisag to, insan to inter ed saray disipulo to tan kuanto, "Ala yo ya; sikato yay laman ko."
Insan inala toy kupa, tan kasumpal ton akisalamat ed Dios, inter tod sikara. Inminom ira ya amin. Inkuanen Jesus ed sikara. Inminom ira ya amin. Inkuanen Jesus ed sikara, "Sikato yay dalak a mamaneknek ed impisipanay Dios, say dalak ya onterter para saray amayamay a totoo. Kuankod sikayo ya ag ak la oninom na sayan tabul na ubas, anggad agew na iyinom ko na balon tabul na ubas ed Panariay Dios."
Anganta ray sakey ya imno, insan ira linma ed Palandey na Kaolibaan.
Inkuanen Jesus ed sikara, "Ibatikan tan taynan yo ak ya amin, ta ibabagay Masanton Sulat, 'Pateyen na Dios so pumapastol et nataytayak iray karniro.' Balet kayari na iyolik ed bilay, onaan ta kayon onlad Galilea."
Inkuanen Pedro ed sikato, "Anggan taynan da kan amin, ag ta kan balut taynan!"
Inmebat si Jesus, "Tandaan mo ya! Kasakbayay pidwan ikukaok na lalung ed sayan labi, mamitlon ibagam ya ag mo ak kabat."
Lalon makmakpel ya inmebat si Pedro, "Ag kon balut ibagan ag ta ka kabat, anggan kaiba ta kan pateyen da!"
Onya met so imbaga na amin da ray arum a disipulo.
Linma rad pasen a manngaray Getsemani. Inkuanen Jesus ed saray disipulo to, "Yorung kayo dia, legan kon mampikasi."
Intagar to ra balet di Pedro, Santiago, tan Juan. Insan agunigon a maung tan apagaan tan kuantod sikara, "Agaylay ermen ko tan ngalngalik la ipatey. Dia kayo tan mampuyat kayo."
Kaarawi toy daiset, dinmakmomod dalin tan nampikasi a no nayari ag la komun onsabid sikatoy oras na kairapan. Inkuanto, "Ama, O Ama! Nayarian mon gawaey amin a bengatla. Ipaliis mo pad siak yan kupay kairapan. Balet aliwan say linawak, no ag ingen say linawam, so nasumpal."
Pinawil to ra may taloran disipulo, tan asabian to ran akaogip. Inkuantod kinen Pedro, "Akaogip ka, Simon? Ag mo ta nayariay mampuyat na saksakey oras? Mampuyat tan mampikasi kayo, pian ag kayo napelag ed tukso, Sipaparaan so ispiritu, balet makapoy so laman."
Inmarawi lamet a nampikasi, tan inolit to may kerew to. Pinawil to lamet iray disipulo to tan asabian to ran akaogip, ta mapalaloy pakakaogip da. Ag da amtay iyebat dad sikato.
Diad pitlon impawil to inkuantod sikara, "Akaogip tan mamapainawa kayo nin anggad natan? Duga la tan! Sinmabi lay oras a niawat so Anak na Too ed lima da ray makasalanan. Bangon kayo, ta onla itayo la. Nengneng yo, wadya lay toon mantraidor ed siak!"
Mansasalita niy Jesus nen sinmabi si Judas a, sakey ed saray labinduan disipulo. Kaiba to ray totoon sankaawit da ray ispada tan saray pekpek. Sarayan totoo imbaki na saray manonan papari, saray iskriba, tan saray mamatakken na baley. Samay traidor initdan to ray kakaiba to na pakabirbiran da: "Say anguban ko sikato man to aanapen yo. Erel yo tan no awiten yo, bantayan yon maung."
Kasabi nen Judas, dinago ton tampol si Jesus tan inkuanto, "Maistro!" insan to inanguban. Kanyan inerel day Jesus tan binembenan day malet. Balet walay sakey ed saray manalalagey diman ya inoyus toy ispada to tan sinigbat toy aripen na Pangulon Pari, et apingolan. Inkuanen Jesus ed sikara, "Akin et sankaawit yo ray ispada tan saray pekpek a mangerel ed siak? Tulisan ak sirin? Inagew-agew ak a nambabangat ed Timplo tan wadman kayo met, balet ag yo ak inerel. Balet nakaukolan a nasumpal so ibabagay Masanton Sulat."
Nagsibatik ya amin iray disipulo tan tinaynan day Jesus.
Sakey a balolakin akakolibemben labat na oles so tinmombuk ed kinen Jesus. Siningkat na saray totoo balet akaokpus, insan binmatik a labus-lakseb ta atilak to la may kolibemben to.
Inyakar day Jesus ed abung na Pangulon Pari, a nantitiponan da ray manonan papari, saray mamatakken na baley, tan saray iskriba. Tinmombuk si Pedro ed kinen Jesus, balet walad bandad arawi. Tinmuloy ya anggad solar na Pangulon Pari, inmirung diman a kaiba to ray guardia, tan akidangdang. Ginawa na saray manonan papari tan amin a kabyangay Sanidrin so anggaay nayarian da a mananap na ipakasalanan dad kinen Jesus, pian napapatey da. Balet anggapoy narumog da. Dakel iray tasin nantila sumpad kinen Jesus, balet ag nantutukoyay salita ra.
Insan wala ray inmalagey a nantila sumpad kinen Jesus. "Nadngel min inkuanto, 'Gebaen ko yan Timplo a ginaway too, insan kayariy taloy agew mangipaalagey ak na sananey ya aliwan ginaway too.' " Balet anggan sikara ag da napantutukoyay salita ra.
Inmalagey so Pangulo Pari ed arap dan amin, tan tinpet tod kinen Jesus, "Anggapoy iyebat mod sayan ipapakasalanan dad sika?"
Balet marereen si Jesus tan ag balut inmesel. Tinepet lamet na Pangulon Pari ed kinen Jesus, "Sika so Cristo ya Anak na Galgalangen a Dios?"
"Inmebat si Jesus, "On, siak, tan nanengneng yoy Anak na Too ya akayorung ed nikawanay Dios a Makapanyarin-amin. Nanengneng yo met naani ya onsasabin walad saray lorem na tawen!"
Piniliat na Pangulon Pari so kawes to tan inkuanto, "Ag tayo la nakaukolay arum ni ran tasi! Nadngel yoy kaogsay salita tan sumpad Dios! Antoy kuanyo?"
Nankakasakeyan dan amin a si Jesus et nepeg a pateyen.
Ginapoan na saray arum a nilulukdaan si Jesus tan pinerengan da. Kinakabil da tan kuanda, "Ibagam pa no siopay angabil ed sika?" Inala na saray guardia, insan da met tinatampal.
Wadman niy Pedro ed solar nen sinmabi so bii a sakey ed saray katulong na Pangulon Pari. Nen anengneng toy Pedro a mandarangdarang, kinonineng ton maung tan kuanto, "Kaiba ka met nen Jesus a taga Nazaret."
Balet imbori nen Pedro tan inkuanto, "Ag ko amta...ag ko natatalusan itay ibabagam!" Insan linmad puirtay solar. Diad saman a bekta kinmukaok so sakey a lalung.
Anengneng lamet na samay biin igaganggan tan kuanto ed saray wadman "Sayan too sakey ed sikara!" Balet imbori lamet nen Pedro.
Ag abayag, inkuan lamet na saramay wadman ed kinen Pedro, "Ag mo nibori a sakey kad sikara, lapud taga ka met Galilea."
Balet nansamba lay Pedro a kuanto, "Nitay Dios, anggan dusaen to ak no mantitila ak! Tua ya ag ko kabat itay toon ibabaga yod sika!"
Diad saman a bekta, kinmukaok lamet so lalung. Insan anunotan nen Pedro may sinalita nen Jesus ed sikato, "Kasakbayan a pidwan ikukaok na lalung, ibori mo ak a mamitlo!" Inmakis na ampaipait si Pedro.
kasabiy kabwasan, nantitipon a namplano ray manonan papari, saray mamatakken na baley, saray iskriba, tan saray arum ni ran kabyangay Sanidrin. Binalur day Jesus, insan da inyakar ed kinen Pilato. Tinepet nen Pilato ed kinen Jesus, "Sikay ari da ray Judio?"
Inmebat si Jesus, "Sika lan dili so mangibabaga."
Amayamay iray ipapakasalanan na saray manonan papari ed kinen Jesus, kanyan tinepet nen Pilato lamet, "Akin et ag ka onebat? Nadngel moy ontan lan karakel na ipapakasalanan dad sika!"
Ag lan balut inmebat si Jesus, kanyan agaylay pankelaw nen Pilato.
Kapag Pista na Paskua, mangibolus si Pilato na siopaman a prison kerewey karaklan. Diad saman a panaon walay sakey a lakin manngaray Barabbas a walad prisowan. Kaiba to ray totoon akapatey nen walay golon sumpad gobirno. Nen nantitipon sirin iray totoo tan kinerew dad kinen Pilato ya ibolus toy sakey a priso, tinepet tod sikara, "Labay yon ibolus kod sikayoy ari da ray Judio?" Ta kabkabat nen Pilato ya inyawat na saray manonan papari si Jesus ed sikato, lapud pakakaibeg da.
Balet saray manonan papari sinogsogan da ray totoo a kerewen dad kinen Pilato ya ibolus toy Barabbas, aliwan si Jesus. Tinepet lamet nen Pilato ed saray totoo, "Anto sirin so gawaen kod sayay toon tatawagen yoy ari da ray Judio?"
Ineyag dad sikato, "Ipasak mod krus!"
"Akin, antoy ginawa ton maoges?" tinepet nen Pilato.
Lalon inkasikasil dan ineyag, "Ipasak mod krus!"
Labay nen Pilato a paliketen iray totoo, kanyan imbolus tod sikara si Barabbas. Impapasiplatan toy Jesus, tan inyawat ton ipasak ed krus.
Si Jesus inyakar na saray sondalo ed dalem na palasioy gobirnador, tan tinawag da ray arum a kakaiba rad batalyon. Sinolungan day Jesus na granatin kawes, nanliken iray sanga-sangan masabit tan ginawa ran singa korona, insan da inyan ed olo to. Inggagalang dad satan a kuanda, "Andokey komun so bilay na Ari da ray Judio!" Pinapaspas day olo to tan nilulukdaan da, insan ira nantatalimukor a mangigalang ed sikato. Kasumpal dan niludlurey, nilakseb da may granatin inkawes dad sikato tan insolung da may dilin kawes to. Insan da impaway ya ipasak ed krus.
Nabet dad dalan so sakey a lakin manngaray Simon, a nanlapud bario ya oonlad siudad, tan pinasoot dan impasakbat ed sikatoy krus nen Jesus. Si Simn taga Cirene tan ama di Alejandro tan Rufo. Inyakar day Jesus ed pasen a manngaray Golgota a kabaliksan toy "Pasen na Lapis-lapis na Olo." Initdan dad may Jesus na alak a nilaukay mira, balet ag to ininom. Impasak dad krus, tan inapag da ray kawes to kayari ran nampapalaranan, pian naamtaan da no dinay betang na sakey tan sakey ed sikara. Alas nuibid kabwasan nen impasak dad krus. Nisulat so impakasalanan dad sikato: "Say Ari da ray Judio." Insan da impasak a kaiba nen Jesus so duaran tulisan ed sansakey a krus, diad nikawanan tan nikawigi to.
Si Jesus pineyeng-peyegan tan pinapabaingan na saray totoon onlalabas: "Aha, aliwa tan sika may maneral na Timplo, insan mo ipaalagey ed loob na taloy agew? Epas kad tan ed krus tan ilaban moy laman mon dili!"
Onton met, niludlurey na saray manonan papari tan saray iskriba. Inkuandad sakey tan sakey, "Inlaban to ray arum, balet ag to nilaban so laman ton dili! Onepas na natan ed krus so Cristo ya ari na Israel, pian nanengneng mi tan panisiaan mi la!"
Niludlurey met na saramay duaran nipasak ed krus, a singa sikato.
Nanlapud alas dosi ed kaagewan, say intiron dalin binnilonget ed loob na taloy oras. Diad alas tris, inmeyag si Jesus na makmaksil, "Eloi, Eloi, lema sabachtani? a labay ton ibaga, "Dios ko, Dios ko, akin et inkaindan mo ak?"
Nadngel ya na saray arum a wadman tan inkuanda, "Dengel yo, tatawagen toy Elias!" Batik so sakey ed sikara tan angalay ispongha. Impasepsep tod anakseng ya alak, insan to inyan ed ngoroy tiken. Impasopsop tod kinen Jesus tan kuanto, "Alagar kayo! Nengnengen tayo pa no onsabiy Elias a mangyepas ed sikato ed krus!"
Inmeyag na maksil si Jesus, insan inatey.
Diad saman a bekta, apaldua so kurtina ed Timplo, manlapud tagey ya anggad saloy. Naimatunan na samay sondalon kapitan a manaalagey ed arap na krus no panon so ineyag tan impatey nen Jesus. "Tuan Anak na Dios yan too!" inkuanto.