ONONAN BABASAEN Gaw. 2:1-11

Babasaen ya inaon ed Saray Gawgawa da ray Apostol

Nen sinmabiy agew na Pinticostic, nantitipon ed sakey a pasen iray amin a mananisia.  Kabebekta, nadngel day sakey ya ungol a nanlapud tawen.  Singa siplug na maksil a dagem, tan pinano toy intiron abung a kawalaan da.  Insan anengneng day singa ra dilan apoy a binmuyak tan balang sakey ed sikara so dinapoan na sakey a dila.  Apano ra na Ispiritu Santo tan nansasalita ray nandoroman salita, onung ed inter ed sikara na Ispiritu.

Wala ray Judion nanlalapud amin a bansa ed intiron mundo, a manaayam ira natan ed Jerusalem tan totoo ran manangigalang ed Dios.  Nen nadngel da may ungol, nantitipon iray amayamay a totoo.  Nikelawan ira, ta nadngel dan saray nandoroman salita ra et sasalitaen da ray mananisia.  Diad mapalalon pankelaw da inkuanda, "Aliwa tan taga Galilea ya amin ira yay mansasalita?  Akin et saray dilin salita tayoy narerengel tayon sasalitaen da?  Taga itayo Partia, Media, tan Elam; taga Mesopotamia, Judea, tan Capadocia, taga Ponto tan Asia; taga Frigia tan Pamfilia, taga Egipto tan saray pasen ed Libia a nasasakopay Cirene, taga Roma ray arum ed sikatayo: saray Judio tan saray Hintil a naayat ed Judaismo.  Wala ni rad sikatayoy taga Creta tan Arabia.  Anggaman ontan, diad saray dilin salita tayo, narerengel ti ran sasalitaen da ray makapakelkelaw a gawgaway Dios!"

Salita na Katawan.

SALMO RESPONSORIO

Ebat: Katawan, papaway mo pay Ispiritum, tan pasimbalom pay tapew na dalin.

1. Idayew moy Katawan, O kamarerwak! O Katawan a Dios ko, agaylay talonggaring mo!  Katawan, amayamay iray pinapalsam a bengatla!  Say dalin napno na saray pinalsam. E.

2. No ekalen moy ingas mo, ompatey ira tan ompawil irad dabuk a nanlapwan da, Balet no itdan mo ra na ingas mo, napalsa ra; papasimbaloen moy bilay na dalin. E.

3. Mansiansian anggad angga komuy kagalangan na Katawan!  Panliketan komun na Katawan iray ginagawa to!  Pakaliketan to komuy kantak ta manlalapud sikato so gayagak. E.
 

KUMADWAN BABASAEN 1 Cor. 12:3-7, 12-13

Babasaen ya inaon ed ononan sulat nen Pablo ed saray taga Corinto

Ag nikuan na siopaman a toon ag iwawanwan na Ispiritu Santo, "Katawan si Jesus."

 Nandoromay langkap a maispiritu, balet saksakey ya Ispiritu so mangiiter ed saraya.  Nandoromay panaglingkur, balet saksakey a Katawan so panlilingkuran.  Nandoromay pakayari ed panagkimey, balet saksakey so Dios a mangiiter ed balang sakey na pakayarin mankimey.  Say kiwawalay Ispiritu nipapatnag ed balang sakey diad nandoroman nengneng, a para kaabigan na amin.

Si Cristo et singa sakey a laman ya amayamay so kabyangan to; anggaman a titibokeley nandoroman kabyangan, saksakey ni lamlamang yan laman.  Ontan met ya amin tayo, Judio man o Hintil, aripen man o andi, bininyagan itayo na saksakey ya Ispiritu, tan nagmaliw itayon sakey a laman.  Pinainom itayo met ya amin ed saksakey ya Ispiritu.

Salita na Katawan.

Sikuinsia
 

 Gala, Ispiritu, gala!  tan manlapud tawen isinag mo pay madibinon liwawa!
 Gala, Ama na saray mairap-bilay!  Gala, sobul na saray palangkap na Dios!  Gala, liwawa na kapusoay katoowan!

 Sikay sankamaungan ed saray manangimasamit; Alay liket na kamarerwan mangawat ed sika; Sikay masamit a gayaga ed dalin aya;
 Diad kimey mi, inawa kan masamit; Makaroyroyon betel ed kaptangan; Talek ed pegley na segsegang.

 O sankasantosan a Liwawa, Sinag ka pad kapusoan da ra yan mananisia, tan panom pa ray kamarerwa ra.

 No anggapoy pananulong mo, anggapoy kamaungan a nagaway too; kasalanan labat so nasumpal to.

 Paabig mo pa ray sugat mi, pasimbalom pay biskeg mi; Diad inkamagaan mi ipelag mo pay oran.  Saray kasalanan mi pay orasan.

 Palemek mo pay anawet a puso tan linawa; Tonaw mo pay kinmigtel, papetang moy ambetel; Iwanwan mo pa ray onsisian ed sika.

 Diad saray mananisiam ya ondadakmomo tan manmamatalek lawas ed sika, iter mo pay palabom a pitora.

 Diad saray maung a mananisia, itdan mo pa ray tumang; Katawan, itdan mo pa ray kilalaban; Itdan mo pa ray gayagan andi-anggan.  Amen.  Alleluia.

Alleluia
E. Alleluia.  Gala, Ispiritu Santo, ta panom pay kapusoan da ray mananisiam, tan paliub mo pad sikara so apoy na panangarom.  E.  Alleluia.

IBANGHILYO Jn. 20:19-23

Babasaen ya inaon ed masanton ibanghilyo onung ed kinen Juan

Diad labi to man ya agew na Simba, nantitipon iray disipulo.  Akatalak iray puirtay abung a nantitiponan da, lapud takot dad saray Judio.  Sinmabiy Jesus tan nanalagey ed pegley da.  Inkuantod sikara, "Say kareenan komun so walad sikayo!" Kayari to yan imbaga, impanengneng tod sikara iray lima tan diking to.  Malikeliket iray disipulo diad impakanengneng dad Katawan.  Inkuan lamet nen Jesus ed sikara, "Say kareenan komun so walad sikayo!  Imbaki ak na Ama, ontan met ya ibaki ta kayo."  Kapangibaga tod saya, iningasan to ra tan kuanto, "Awat yoy Ispiritu Santo.  Siopamay toon pirdonaen yo ray kasalanan to, napirdona ra; siopamay toon ag yo pirdonaen iray kasalanan to, ag ira napirdona."

Ibanghilyo na Katawan.