Say Pangurus

Diad ngaray Ama, tan Anak tan say Espiritu Santo. Amen.

Say Ama Mi

Ama mi a wala ed tawen, nagalang so ngaran Mo, onsabiy panarian Mo, onorey linawam, diad dalin a onung ed tawen.

Say kanen min inagew-agew, iter mo ed sikami ed agew aya. Paandian Mo ray kasalanan mi, onung na panamaandi miy kasalanan day akapankasalanan ed sikami; tan ag mo kami iter ya onabuloy ed tukso, ilaban Mo kami ingen ed mauges.

Say Ave Maria

Ave Maria, napno ka’y grasya. Say Katawan so wala ed sika. Bendita kad biin amin tan bendito so bungay eges mon si Jesus.

Santa Maria, Inay Dios, pikasi mo kami ya managkasalanan, natan tan naani ed oras na ipatey mi. Amen.

Say Nagalang

Nagalang so Dios Ama, Dios Anak tan Dios Espiritu Santo.
Unong ed gapo, natan tan lawas ed ando lan ando. Amen.

Gloria

Nagalang so Dios ed sankatageyan tan diad dalin kareenan ed saray totoon maong ya inpanlinawa. Idayew mi Ka. Itandoro mi Ka. Dakmomoan mi Ka. Igalang mi ka. Misalamat kamid Sika, lapud matalonan galang Mo.
O Dios a Katawan, mangatatawen ya Ari, Dios Aman makapanyarin amin.
O Jesucriston Katawan, bogbogtong ya Anak.
O Dios a Katawan, Corderoy Dios, Anak na Ama, ya mamaandi kasalanany talba, kasian Mo  kami.
Sika ya mamaandi kasalanany talba, kasian Mo kami. Sika ya mamaandi kasalanay talba, akom pa ray pikakasi mi.
Sika a manyorong ed kawanay Ama, kasian Mo kami. Ta Sikan bokor so masanto, Sikan bokor so Katawan, Sikan bokor so sankatageyan, O Jesucristo, a katekep Moy Espiritu Santo, ed galang na Dios Ama. Amen.

Manisia Ak

Manisia ak ed Dios a makapanyarin amin, manamalsay tawen tan dalin.

Manisia ak ed Hesukriston Anak Ton bogtong, a Katawan tayo. Tinmoo ed gaway Espiritu Santo tan inyanak nen Virgen Maria. Inpapairap nen Poncio Pilato, inpasak ed Krus, inatey tan inkotkot. Inmakseb ed saray inatey. Diad komatlon agueo inmolin binmilay. Tinmokotok ed taoen tan manyorong ed kawanay Ama. Onla dia lamet a mangokom ed saray mabilay tan inatey.

Manisia ak ed Espiritu Santo. Sisiaen ko met so Santa Iglesia Katolika, say  pannanabangan day sasantos, say panamaandiy kasalanan, say kiolid bilay na laman, tan say bilay ya ag naandi. Amen.