SARAY BABASAEN
FIESTA NA SANTISSIMA TRINIDAD
18 June 2000
ONONAN BABASAEN Deut. 4:32-34, 39-40
Babasaen ya inaon ed libro na Deuteronomio
Inkuanen Moises ed saray totoo: "Osisa yo so apalabas, say panaon kasakbayan na inkianak yo, manlapud impamalsay Dios ed too diad tapew na dalin. Sukimat yo so intiron mundo. Wala la kasi so agawa nen saman a matalonggaring a singa saya? Wala la kasi so akadngel na singa onyan agawa? Wala la kasi ray totoon siansin nambilay a singa sikayo kayariy impakadngel dad dios ya akisalitad sikara manlapud apoy? Wala la kasi so dios a sinali toy linman angalad arum a bansa na saray totoo tan impagmaliw to ran dilin totoo to, a singa ginawad sikayod man ed Egipto na Katawan a Dios yo? Anengneng na dilin mata yo so impangipapakana tod baleg a pakayari to tan say biskeg to; impapadalan to ray salot tan bakal, nanggagawa na saray milagro, saray pakelaw, tan saray makapataktakot a bengatla. Kanyan natan tandaan yo tan ag yon balut lilingwanan a say Katawan ed Dios ed tawen tan diad dalin. Anggapoy arum a dios. Onur yo ray amin a ganggan to ya inter kod sikayo natan, et maung ya amin so pansumpalan yo tan saray kabyangay boleg yo. Mansiansia kayon manayam ed dalin ya iter ed sikayo na Katawan a Dios yo tan kayaryan yo ed anggad angga."Salita na Katawan.
SALMO RESPONSORIO
Ebat: Maliket iray totoon pinili na Dios a kayaryan to!
1. Tua ray salita na Katawan, tan napanmatalkan ya amin iray gawgawa to. Inaroy Katawan so katonungan tan say kaptekan; say mundo napno na ag mangoman a panangaro to. E.2. Pinalsa na Katawan iray katawenan diad panamegley na ganggan to; pinalsa toy agew, bulan, tan saray bitewen diad panamegley na salita to. Nen nansalita, apalsay mundo; nen nangganggan, linmesay amin a bengatla. E.
3. Imanoen na Katawan iray mangigagalang ed sikato, saray manmamatalek ed ag mangoman a panangaro to. Ilalaban to rad patey, pambibilayen to ra no panaoy eras. E.
4. Say Katawan so paniilaloan tayo; sikatoy mananulong tan manangyagel tayo. Maliket itayo lapud sikato, manmamatalek itayod masanton ngaran to. E.
KUMADWAN BABASAEN Rom 8:14-17
Babasaen ya inaon ed sulat nen Pablo ed saray taga Roma
Anak na Dios iray amin ya itotonton na Ispiritu na Dios. Ta say Ispiritu ya inter na Dios ed sikayo et ag to kayo gawaen ya aripen tan pagmaliwen a matakot, no ag ingen pagmaliwen to kayon anak na Dios tan tulongan to itayon ontawag ed Dios na "Ama! Ama mi!" Say dilin Ispiritu, a kaiba toy Ispiritu tayo, so mamaneknek a sikatayo ray anak na Dios. Et natan ta anak itayo lay Dios, mananawir ti la na Dios tan kaiba tin mananawir si Cristo. Ta no minabang itayod kairapan to, minabang itayo met ed kagalangan to.
Salita na Katawan.
Alleluia
E. Alleluia. Nagalang komun so Ama, say Anak, tan say Ispiritu Santo: say Dios natan, nen saman, tan naani. E. Alleluia.IBANGHILYO Mat. 28:16-20
Babasaen ya inaon ed masanton ibanghilyo onung ed kinen Mateo
Linma ra may labinsakey a disipulo ed Galilea, diad palandey ya imbilin nen Jesus a laen da. Nen anengneng day Jesus inggalang da, anggaman a wala ni raymanduaruwad sikara. Inmasingger si Jesus tan inkuantod sikara, "Niiter lad siak so amin a pakayari dimad tawen tan diad dalin. Kanyan, laka yod saray katoowan ed amin a bansa tan gawa yo ran disipulok. Binyagan yo ra diad ngaray Ama tan diad Anak tan diad Ispiritu Santo, tan ibangat yo ran mangonur ed amin ya ingganggan kod sikayo. Tan tandaan yo! Siak, ibaan ta kayo lawas anggad pansamput na panaon.
Ibanghilyo na Katawan.