Circular Letter of Archbishop Oscar V. Cruz, JCD, DD to be read from the Pulpit on the occasion of the Eucharistic Celebration AM 12 February, Saturday and on AM and PM 13 February 2000, Sunday
SAY PANBISITA NA "RELICS" NEN SANTA TERESA DEL NINO JESUS ED ARKIDIOSIS NA LINGAYEN-DAGUPAN
17-18 PEBRERO 2000
"Siopamay ag onabuloy a pasakop ed Panariay Dios a singa sakey ya ogaw, ag balut makaloob ed Panariay Dios" (Luke 18:17)
Say aro tan kareenan nen Kristo!
Saray ogogaw, ya tuan dakerakel ni so pankaukolan da, tan ababagien ni ira, isasaral day talek tan ilalo ra ed saray ateng da. Tan saray ateng, ya apanuy panangro tan agaylay panagalwar da para say kamaungan na saratan ya anak da, so mabulbolos tan mansiansia ran mangaasikaso ed saman ya talek tan ilalo na saray anak da.
Diad pamibirbir nen Kristo ed say inkayano tan say panmamatalek na saray anak ya ogoguw ed saray ateng da, so mangibabaga ed sikatayo ya nakaukolan tan nepeg ya magmaliw itayon singa sarayan ogugaw diad panamegley na pangiter tayoy talek tan ilalo ed say Dios. Tan say Dios Ama a wala ed tawen so agto tayo paulyan onung ed say madibinon panamalsa tan panangaro to natan, diad ontumbok ya panaon tan diad isabi na Panarian to.
Walay sakey ya madre a Carmelite ya nanbilay a sipapano ed sayan “maispiritual ya inkaogaw” --- pananisian siiga ogaw tan panangaro ed say Dios – a sikatoya lanti so angawit ed sikato ed Inkasanta. Lapud saya sikato so matalungaring ed amin ya mundo Katoliko, tan lapud satan, nawalaan so dakel a karaklan a Kristiano ya mandeboto ed sikato.
Sikato so man-ngaray “ Santa Teresa del Nino Jesus”, odino natatawag met na Santa Teresa ed Lisieux” odino “Bulaklak ya Melanting”. Sikato so inatey nen mantaoy 24 labat nen 1897. Sikato so nagmaliw a Santa na Dios nen 1925, tan binirbir a Maestra na Simbaan nen 1997, tan natan sikato so inbawag a “Santa na Balon Milenio”.
Mapalpalar so Arkidiosis tayo lapud sayan panbisita na saray “relics” to dia ed Parokia na Santa Teresa ed Dagupan City. Sayan bengatla so sankaonaanan ya nagawa diad Arkidiosis tayo, diad Pilipinas tan ontan met ed amin ya Asia.
Say mablin “relics” to ya inkarga ed marakep ya pananginan so onsabi no 17 Pebrero 2000 , ed oras na 9:00 AM, a manlapud Diosis na San Fernando (La Union). Sikatoy onpikal dia no 6:00 AM no 18 February 2000 a mamaarap ed Diosis na Iba, Zambales.
Leleg ton manayam dia, walaray nagawan Misa tan mantutumbokan ya panagpikasi tan panangigalang ed saray “relics” to. Tan sikato so bantayan na saray manuoley , a kaiba ray miembro na Knights of Columbus.
No wala komun so pankanawnawa yo, onla kayo tan mikasakey kayon miolop ya mangabet, mangigalang tan mangipatnubang ed si Santa Teresita del Nino Jesus. Lapud say pikakasi to ed arap na Ama, sikatayo komon so mas lalon onasingger ed say Dios, tan balang sinansakey.
Say bendision na Dios so wala ed sikayo!
Salamat ed say maong ya inpantalineng yo.
Lawas matua para sikayo ed Kristo,
(SGD) +OSCAR V. CRUZ, DD
Arsobispo
9 Pebrero 2000
