Asumpal so "ARCHDIOCESAN
YOUTH DAY" celebration nen 2-5 Mayo 2000, dia ed Parokia na St.
Vincent Ferrer, Bayambang, Pangasinan. Dakerakel ya kalangweran so dinmagop
ed sayan bekta lapud masulek iran duan libo ya delegado. Balbaleg ya pisasalamat
ed say Parokia nan San Vincente Ferrer ya ipapangulo ra di REB. PADRE MANUEL
BRAVO, tan say kaiba ran pari si REB. PADRE VICENTE NACOR, tan amin ya
parokiano ra ed say agaylay dakep tan maukuksey ya silibrasyon.
Say ama nen Reb. Padre
Manuel Bravo so anggapo la rad sayan bilay. Say bangkay da so wala ed Binmaley,
Pangasinan. Say tolor et nagawa no Sabado. Ipikasi tayo ra.
Nansulat si REB. PADRE
SANTIAGO FRIAS ed linkur yo. Sikara so wala ed America la. Abayag iran
nanlingkur diad Arkidiosis tayo. Ingen walay impawit dan litrato ra.
Guapo
tan mataraki si Padre. Sikara so sinmempet ya nabakasyon ya agano
nen Marso 2000. Mapalar kamin akaiba ra ed sakey ya misa. Mabet-bet iran
man-e-mail tan manbabasa na say "Idayew so Ngaran na Katawan!". Agusgustuan
da met iray nipaakar ed saray "Panmutektekan tan Pandalepdepan". Salamat
Padre ed saray sulat yo! High Tech so kamera da di Padre. Nayarin ipawit
yo may retrato tayo pian naipublish tayo dia?
Asumpal met la so "Summer
Apostolate Program" na saray seminarista na Arkidiosis tayo. Say pansampot
ya aktibidad da et say "Agape" (sakey ya panlilimog da ya man-evaluate
tan manpainawa kasumpal na program) ya agawa ed parokya na Senor Divino
Tesoro, Buenlag, Calasiao, Pangasinan. Mabolbolos to ran inawat di REB.
PADRE ANTHONY LAYOG, Kura Paroko. Ed saman ya bekta, wadman met ira di
REB. PADRE OLIVER E. MENDOZA, Pastoral Director na Arkidiosis, si REB.
PADRE ROY C. VILLAMIL, lapud walay party met lanti! Say sakey ya inimbitaan
na seminarista ya mansalita et si REB. PADRE CAMILO NATIVIDAD, sakey ed
saray unaan ya angipangulo nen 1968 na sayan ulopan na seminarista.
Nen 5 Mayo 2000, angipaway
si Arsobispo Oscar V. Cruz, DD na sakey ya "Statement
of Grave Concern" nipaakar ed say kipapasen na say bansa tayo. Sikato
ya so binasa ed pigaran parokia na Arkidiosis nen 6-7 Mayo 2000.
Wala ray pigaran
agagi ya papari so binmisita diad Pangasinan. Sikara di san-agi ya REB.
PADRE PERPETUO tan REB. PADRE RAFFY MACARANAS so linma dia ed Pangasinan,
tan sikaray linmad baley dan Malasiqui ta lapud inpatey nen bai ra. Agawa
so Misan ponpon nen 14 Mayo, Agew na saray Ina.
Ontan met di REB. PADRE
PETER AQUINO so akabisita ra tan sikara met so maliket ya akikasakey ed
saray agagi ra tan kakanayon da ed Mangaldan. Nen sakey ya labi, 17 Mayo,
Mierkoles, si Padre Peter so angumbida ed sakey ya pandem diad abong da
ed Navaluan. Sianong! Agaylay samit tan nanam so inparaan da. Wadman
ira di REB. PADRE ENING DE VERA tan di MSGR. SEGUNDO GOTOC, parehon "retired"
ya papari ya kabaleyan nen Padre Peter. Wadman iran malikeliket di REB.
PADRE ARTURO AQUINO tan di REB. PADRE POL CALICDAN, ed Diosis na Urdaneta,
malet ya kakaaro nen Padre Peter. Ag la langula nanaandi iray papari ed
College Seminary a di REB. PADRE ROY VILLAMIL (ag balot nanaandi no
onya ran bekta), REB. PADRE ALLAN MORRIS T. ABUAN, REB. PADRE FERDINAND
GUIANG tan di REB. PADRE OLIVER E. MENDOZA. Siempre met, anggan atrasado
la lawari, wadman met so Pastoral Team Member na St. Thomas Aquinas Parish,
si REB. PADRE FRANCIS POSADAS. Maliket so inpankakasakey na amin. Salamat
Padre Peter ed say inkapari yon mabulbolos yon inbiang tan iiter ed sikamin
amin! Sikara di Padre Peter et wala ra ed New Jersey, USA.
[ home
] [ saray babasaen ] [
say panmutektekan ] [ pikakasi ]
[ saray dasal tan rito ] [ saray
fiesta na simbaan ]
[ liturgical
calendar ] [ dasal ed labi
] [ liturgy of the hours ] [
kankanta ]
[
liturgical notes ] [ tan
arum nira ] [ saray balbalita
]