Fiesta na Transpigurasyon na Katawan
6 Agosto 2000

ONONAN BABASAEN Dan. 7:9-10, 13-14

Babasaen ya inaon ed libro na propita Daniel
 
Nen onnenengneng ak, nilira iray trono.  Inmirung ed sakey a trono imay mambibilay ya anggad angga.  Singa poti na yilo so kawes to, tan singa puron abel a lana iray buek to.  Manliub so trono ton nilirad saray apoy a dalig, tan panlalapwan na managagos ya apoy.  Libo-libon totooy wadman a manlilingkur ed sikato, tan manalalagey ed arap to iray milyon a totoo.  Ginmapo la so bista, tan alokasan iray libro.

 Legan na sayan pasingayew ed labi, anengneng koy singa sakey a too.  Onsisingger ed siak, ya aliber na saray lorem, tan linmad samay mambibilay ya anggad angga tan niparontal ed sikato.  Naitdan imay too na pakaoley, kagalangan, tan pakayari na ari, pian makapanlingkur ed sikato iray totoo ed amin a bansa ya anggan antoy kolor na baog da tan salita ra.  Mansiansia so pakaoley to, tan ag mangangga so panarian to.
Salita na Katawan.

SALMO RESPONSORIO

Ebat: Ari so Katawan, say sankatageyan ed intiron dalin.

1. Ari so Katawan! Manggayaga ka, O dalin! Manliket kayo, amin yon isla na saray dayat! Aliber na saray lorem tan kabilongetan so Katawan; maptek tan matonung so panooley to. E.

2. Natotonaw a singa ispirma iray kapokdulan ed arap na Katawan, diad arap na Katawan na intiron mundo.  Ibabawag na katawenan so inkatonung na Katawan, tan nanenengneng na amin a katoowan so kagalangan to. E.

3. Makapanyarin-amin a Katawan, sikay manooley ed intiron mundo; matalonggaring kan tuloy nen saray diriyos. E.

KUMADWAN BABASAEN 2 Ped. 1:16-19

Babasaen ya inaon ed kumadwan sulat nen Pedro

Nen impaamta mid sikayoy nipaakar ed pakayari tan say ipawil na Katawan tayon JesuCristo, ag mi inagamil iray andi-kakanaan a tongtong na saray totoo.  Naimatunan miy atagey a kipapasen to nen inter na Dios Ama ed sikato so dayew tan kagalangan.  Manlapud Sankatageyan a Kagalangan, walay bosis a nikuan ed sikato, "Sikato yay inararok ya Anak a pakaliliketan ko!"  Nadngel mi yan bosis nanlapud tawen, ta kaiba to kami ed masanton palandey.

Kanyan lalon binmiskeg so pananisia mid impulong na saray propita.  Pankaabigan yo no imanoen yo ya, ta aliling toy lamparaan ya onsisindag ed kabilongetan, anggad isabiy Agew tan ibutay ed puso yo na kabontatalad kabwasan.
Salita na Katawan.

Alleluia
E. Alleluia.  Sikato yay inararok ya Anak a pakaliliketan ko-- dengel kayod sikato.  E.  Alleluia.

IBANGHILYO Mar. 9:2-10

Babasaen ya inaon ed masanton ibanghilyo onung ed kinen Marcos

Intagar nen Jesus iran talo labat di Pedro, Santiago, tan Juan, insan tinmakdang ira ed atagey a palandey.  Nen wadman ira, naimatunan da a naoman so nengneng nen Jesus.  Sinmilesileng tan pinmotipoti so kawes to; anggapoy pumepesak a makapapotiy kawes a singa poti to.  Insan anengneng na sarayan taloran disipulo si Elias tan si Moises a mitotongtong irad kinen Jesus.  Inkuanen Pedro ed kinen Jesus, "Maistro, maung a wadya itayo.  Manggawa tayoy taloran ayaman: sakey so para sika, sakey so para si Moises, tan sakey so para si Elias."  Lapud baleg a takot da ra may taloran disipulo, ag amta nen Pedro so ibabaga to.

Walay lorem a linmesa tan tinarungan to ra.  Insan walay bosis a nanlapud lorem a kuanto, "Sikato yay inararok ya Anak--dengel kayod sikato!" Kabebekta linmingaw ira may disipulo ed kaliber-liber, et anggapo lay anengneng da no ag si Jesus labat.

Nen onlalasur ira nanlapud palandey, binilin ira nen Jesus ya ag dan balut ibabalita so anengneng da, anggad ag ni inmolid bilay so Anak na Too.

 Inonur day bilin to, balet nantetepetan ira no antoy kabaliksan na kiolid bilay.

Ibanghilyo na Katawan.