"Nevez-amzer ar brezhoneg" d'an 22 a viz Meurzh e Roazhon : A-enep spered strizh ar Jakobined Evit al liested sevenadurel hag an doujañs kenetre ar pobloù

Pezh a fell da bobloù ar Rannvroioù-se eo e vefe ar galleg ul liamm evit komz etreze, ur yezh kenlodennet. Kement-mañ gant ma vefe anavezet d'o yezhoù ha d'an dud a gomz anezhe un dinentez par d’an hini a vez gant ar galleg hag ar c'hallegerien, ha gant ma vefe ivez skoazellet an derc'hel hag an diorren d'o yezhoù dezhe er vuhez sokial ha foran.
Na mui na mez.
Gant ar youl kreñv-mañ da zerc'hel da liested ar yezhoù, hag a zo modern-tre, e tiskouez ar pobloù-se e nac'hont kabestr ar vistri. Fellout a ra dezhe kaout ur bed liesdoare da vevañ ennañ, ur bed a beoc'h, leizh a ijin, doujus ouzh disheñvelded ar re all ha n'eo ket ur bed gant ar bec'h etre an dud hag al lakaat maez ar jeu da lezenn-stur.
Evit kas war-raok ha difenn ar menozioù hollvedel-mañ, a dalv kement en Aljeria lec'h m'emañ gwasket sevenadur ar Verbered hag e Bro Frañs, ' en em gavo miliadoù a Vretonezed hag a Vretoned, asambles gant kantadoù a dud o tont eus Rannvroioù all, sevenadurioù disheñvel enne. evit manifestiñ e Roazhon d'an 22 a viz Meurzh, diwar galv Kuzul Sevenadurel Breizh, Unvaniezh ar Gelennerien Brezhoneg, Diwan, Div Yezh ha Dihun,

Unvaniezh Demokratel Breizh (UDB) a c'halv holl demokrated Breizh da zont da vanifestiñ d'an 22 a viz Meurzh e Roazhon evit lakaat war wel eo e Breizh e ranker stourm war an dachenn bolitikel evit kaout an diskoulmoù ret da zerc'hel bev ar brezhoneg ha reiñ lañs d'hor sevenadur ha d'hor yezh, a zo int-i ul lodenn eus glad an denelezh. O vezañ n'eo ket eus tu Pariz e klaskint penn da gudennoù kelennadurezh hor yezh, evel m'eo bet kadarnaet, nevez zo, gant Kuzul ar Vonreizh hag ar C'huzul- Stad, eo e Breizh e ranker divizout ha kaout ar galloudoù rekis evit en ober. N'eo nemet gant an emrenerezh e c'hellimp stummañ ar Frankizoù da gaout evit hor sevenadur hag hor yezh. Ar brezhoneg yezh ofisiel e Breizh, evel m'emañ evit ar galleg ? Da sitoianed Breizh eo da zivizout ar pezh a fell dezhe kaout evit o yezh en o bro.