Noticies José Luis Montes, responsable d’enseñancia na FSA, y Manuel Fernández de la Cera, diputáu del PSOE, acaben d’acusar al PP y a Sergio Marqués de desendolcar una política dañible pa la enseñancia pública y pa la cultura de la nación asturiana.
ANDECHA ASTUR creye que la política’l PP y les sos esgayadures nesta estaya carauterízase por un mayor xorrecimientu porcentual de les inversiones na enseñancia privada que na pública. Y pola supresión d’ufierta formativa na enseñancia pública mentres ca vegada s’autoriza más ufierta na privada, sobro too en formación profesional. Per otru llau, el procesu de tresferencies educatives, talo y comu se plantega na tresferencia de partíes presupuestaries, nun abasta pa financiar un sistema educativu de calidá, supón una renuncia a necesidaes de financiación inñegables y ye una clara ofensa analizando cuantitativa y cualitativamente les tresferencies n’otros pueblos del Estáu. No que cinca a la so política cultural, ésta sólo tien un criteriu definíu: l’antiasturianu, torgar la presencia normalizada de la nuesa cultura y, especialmente, de la nuesa llingua.
Por embargu, ANDECHA ASTUR denuncia qu’esta política
del PP y les sos esgayadures son la continuación lóxica de
la qu’entamó’l PSOE. Ye una demostración del mayor cinismu
políticu que quienes foron Direutor Provincial d’Educación
y Conseyeru d’Educación col PSOE apaezan agora comu valedores de
lo público y lo asturiano, acusando al PP esautamente de lo qu’ellos
mesmos escomencipiaron. El PSOE fizo’l llabor puercu de reducir a lo mínimo
la red pública, despidió interinos, implantó la movilidá
foncional y territorial, recortó presupuestos na pública,
aumentó la financiación de la
privada, tapeció dafechu el diseñu del mapa escolar
y l’entamu les tresferencies, torgó la correcha escolarización
del asturianu y l’asturianización de los currículos, ñegó
a la comunidá educativa’l drechu a la negociación,… El llabor
desendolcáu por Montes y de la Cera nesos cargos foi una dura agresión
pal pueblu asturianu, pa la so enseñancia pública y la cultura’l
país, comu se demostró ca vegada que tuvimos que salir a
la cai,
poniéndomos frente a ellos a defendelo.
PSOE y PP defenden un modelu social básicamente
paecíu: un estáu’l bientar de lo más ruín,
una enseñancia privada fuertemente financiada pol Estáu pa
les clases meyor asitiaes, un sistema educativu públicu subsidiariu
pa les clases más necesitaes. Defenden un mesmu "Principado": una
tierra sometía nel enriedu autonómicu, a la cultura y a la
llingua española.
Xixón, 5 de xineru de 1999
Noticies
c-lletronicu: Andecha@lettera.net