Andecha Astur urxe a l'aprebación pol Parllamentu Asturianu de la Llei de Padrimoniu Hestóricu y pidi la paralización de toles actividaes incontrolaes y l'incautamientu de lo materiales afayaos

 El conflictu esistente anguañu cola xida de l'apaición del fósil de dinosauriu en Noreña, pon de nueu n'evidencia la llaguna llegal y la situación d'indefensión na que s'alcuentra tol padrimoniu hestóricu asturianu, a falta d'una llei que regule la so proteición, estudiu y custodia, asina comu les responsabilidaes de les estremaes istituciones implicaes.

A estes altures y inxustificable dafechu que la Llei de Padrimoniu Hestóricu, que foi almitía atrámite'l pasáu 7 de xunetu (dempués de 12 años d'"estatutu d'autonomía" ensin llexislar un res al respeutu) s'alcuentre anguañu "aparcada", pesia cuntar col consensu parllamentariu, nun teniendo sos "señoríes" de la Xunta Xeneral intención aparente d'igualo nun futuru prósimu.

Comu consecuencia d'esta incapacidá y dexadez de los parllamentarios de la Xunta Xeneral, ta viviéndose n'Asturies una situación caótica dafechu no que cina al padrimoniu hestóricu, na que se producen destruiciones de castros enteros (comu fo'l asu de Cellagú), dexense otros desprotexíos dafechu y a merdé del espoliu (La Campa Torres), y continúen produciéndose robos de toa mena nel nuesu padrimoniu hestóricu, esistiendo un auténticu "mercadillo" y múltiples "colleiciones particulares" en manes de toa mena d'aficionaos a l'arqueoloxía, la paleontoloxía o simplemente curiosos.

Ello asina, Andecha Astur desixe a la Xunta Xeneral l'aprebación darréu de la Llei de Padrimoniu Hestóricu, atalantando que pesia ser enforma deficiente n so redaición actual, siempres ye más positiva que continuar con esti vacíu llegal que permite tantu abusu.

Asina mesmu, y comu medía preventiva y n'evitación de robos, "estravíos", tresllaos caprichosos ya inclusu enfrentamientos ente ayuntamientos, Conseyería de Cultura y Universidá, procédase a la paralización imediata de toles actividaes incontrolaes y al incautamientu de los materiales afayaos.

Nesti sen, consideramos que ye urxente un control estrictu del fósil de dinosauriu de Noreña y evitar el so treslláu a la Universidá de Sabadell al oxetu d'evitar, comu llamentablemente suel pasar col nuesu padrimoniu hestóricu y artísticu, acabe perdiéndose la propiedá o'l rastru de tala pieza, apaeciendo nel meyor de los casos en cualisquier muséu de cencia natural, nun nueu espoliu al nuesu padrimoniu que permite que tantísimos materiales hestóricos y artísticos asturianos s'alcuentren estraos per tol mundiu, perdiendo'l pueblu asturianu de mena inremediable la so propiedá y esfrute.