L’entornu de Sergio Marqués ñegó estos díes qu’ésti nun afala la creación d’un nueu partíu y que nun s’aldericará sobre ello fasta 1999. Pos bien, tamos en condiciones d’asegurar con toa certeza que Marqués, al traviés del so entornu, yá tien llegalizáu un nueu partíu, "UNIÓN DEL PUEBLO ASTURIANO (UPA), pa, si llega’l casu, canalizar asina la so futura aición política.

Al empar, per fontes de la Direición Provincial del MEC sabemos que Rozada, conoceor d’ello, asumió direutamente la responsabilidá de dirixir un nueu ataque políticu escontra Marqués. La táutica consiste en provoca-y al Gobiernu asturianu cuantos conflictos seyan posibles nel mesmu ámbetu d’actuación política escoyíu por Marqués, una llinia conservadora pero pretendíamente asturianista. L’aparatu dirixente del PP inclúi nesa táutica la posibilidá d’algamar en talos conflictos el mayor nivel de tensión sociopolítica posible, inclusu cuandu se trate de custiones que, comu la nuesa llingua, seyan importantes y sentíes pal pueblu asturianu.

Col empiezu’l nueu cursu escolar, el PP yá fizo españar el primer d’esos conflictos programaos. Consiste nun actu d’insumisión al BOPA, reduciendo al mínimu la escolarización de la Llingua Asturiana, comu desplicamos darréu.

En marzu, enantes de la crisis popular, tol grupu parllamentariu del PP aprebó la "Ley de uso y promoción del bable/asturiano", yá espublizada nel BOPA y vixente. Nos artículos 9 y 10 d’esa llei regúlase que "El Principado de Asturias, en el ejercicio de sus competencias, ASEGURARÁ la enseñanza del bable/asturiano (…) y GARANTIZARÁ su enseñanza en todos los niveles y grados, repetando no obstante la voluntariedad de su aprendizaje. En todo caso, el bable/asturiano deberá ser impartido dentro del horario escolar y será considerado como materia integrante del currículo. Los principios anteriores se harán extensivos a la educación permanente de adultos". Esto ye, ACORDIES COLA LLEI, LA TOTALIDÁ DE LOS CIENTROS EDUCATIVOS D’ASTURIES TIENEN D’INCLUYIR NA SO UFIERTA FORMATIVA L’ASIGNATURA DE LLINGUA ASTURIANA COMU MATERIA CURRICULAR, debiendo cuntar cola dotación de profesoráu que fore mester.

Fasta agora’l Gobiernu asturianu nun manifestó si la so intención yera, talo y comu lu obliga la llei, dar cumplimientu a lo anterior; pero sí costa polo menos que nun fexo’l llabor de planificación que yera d’esperar pa ello. Pero, en tou casu, Rozada, controlando direutamente la Direición Provincial del MEC, yá decidió que’l MEC, que nun ye titular de les competencies llingüístiques, pero sí tovía de les educatives, nun va destinar más que 66 enseñantes a la escolarización de la Llingua Asturiana. Pretende asina poner nes manes de Marqués el grave conflictu que supón non sólo incumplir la llei al nun xeneralizase l’asignatura, sinón reducir en más d’un 50% la escolarización del pasáu cursu, privando del so deprendimientu a unos 11.000 escolinos que cursaben la materia.

Rozada, por mediu la Direición Provincial, diz que se sofita en qu’hai un cupu de 66 profesores de Llingua pautáu ente MEC-Madrid y el Gobiernu asturianu. Ello ye falso. Ciertamente, hai años, tres l’entamu la escolarización, ésa foi la cifra d’enseñantes destinaos nun momentu dau a esta escolarización, d’alcuerdu dambes Alministraciones. Pero lo primero, anque menos importante, ye qu’enxamás nun esistió dengún documentu oficial onde constare que sólo debía destinase esi númberu profesores; la esistencia d’esi cupu tamién foi la torpe esculpia que manipuló’l PSOE cuandu gobernaba pa torgar no posible la normalización llingüística na enseñanza; pero nin PSOE nin PP puen poner enriba la mesa un documentu oficial al respeutu. En segundu llugar, y lo que ye definitivo, la llei aprebada pola Xunta Xeneral obliga inescusablemente a qu’esti cursu tolos centros educativos asturianos inxerten necesariamente l’asignatura de Llingua Asturiana na so ufierta formativa. Nin siquier pue ser torga pal so cumplimientu’l fechu de que seya’l MEC el titular de les competencies educatives, porque’l Gobiernu asturianu tien plenes y esclusives competencies en materia llingüística. Lo único que ye preciso desendolcala al traviés d'un reglamentu, comu cualisquier otra llei. Una llei ensin reglamentu ye papel moyao, y esta ye la situación anguañu de la "Llei del Bable".
 

ANDECHA ASTUR denuncia la gravísima situación política que con esti episodiu algama la "vendetta" ente Marqués y Rozada. Sufrimos un Gobiernu asturianu qu’actúa illegalmente al incumplir les sos propies lleis; un secretariu xeneral del PP-Asturies que se cree con bula especial pa crear conflictos de soberanía ente’l Gobiernu asturianu y l’Alministración central; un grupu parllamentariu del PP que fai tolo posible p’asegurar l’incumplimientu d’una llei qu’él mesmu aprebó; una Direición Provincial del MEC convertida nun mecanismu de guerra política; un PP que, otra vegada más, pon el so antiasturianismu penriba de tou mandatu llegal y de tou interés públicu.

Pero, sobro too, sofrimos nueamente una nuea agresión a la nuesa identidá comu pueblu, un agravamientu del conflictu llingüísticu, de la represión cultural que padecen los asturianos. Naide nun lo pue ñegar: ehí tán los 11.000 escolinos a los que se-yos quier torgar qu'afonden nel deprendizaxe de la so llinguael drechu a siguir deprendiendo la so llingua. Ehí tán los munchos miles más d’escolinos a los que se-yos impide qu’entamen a estudiala.

Caberamente, señalamos con murnia, cómu tábemos acertaos cuandu denunciemos comu un grave error políticu’l fechu de que’l PAS pautare col PP esta "Ley de uso", porque afirmábamos, comu se preba agora, que sólo la reconocencia inmediata de la oficialidá de la nuesa llingua garantizaría bramente los drechos llingüísticos del pueblu asturianu. Y porque esta llei ye una llei muerta mentes nun se dicte un decretu que la desencolque y que recueya los pormenores de la so aplicación en ca casu y circustancia, lo que nidiamente, nun va faese, entantu la carencia d'enfotu del PAS y el restu los partíos de la Xunta.