Lo que vien darréu ye un de los primeros comunicaos onde desplicábemos que yera lo que taba faciendose pa impidir esa españolada. La idega ye que quien tea dalguna iniciativa, o cenciellamene quiera amestase a les organizaciones que se pronunciaren públicamente sobro ello, vos pongais en contautu con nós en:
Por ciertu, yá son 18 el númberu d'organizaciones posicionaes al respeutu, delles tan sinificatives comu la CSI o'l SUATEA
Un saludu a tol mundiu
DIEZ ORGANIZACIONES DEFENDEN QUE
L’IES Nº 7 SE NOME "ANDRÉS SOLAR SANTURIO"
NOMALU "EMILIO ALARCOS" SEDRÍA
UNA AGRESIÓN A ASTURIES
ANUNCIEN MOVILIZACIONES
La decisión del Conseyu Escolar del IES nº 7, de Xixón, de proponer a l’alministración el nome de "Emilio Alarcos" comu nome oficial del IES ye una agresión a tolos asturianos.
Al señor Alarcos nun se-y puen ñegar los sos méritos comu profesor ya investigador nel ámbetu la filoloxía española. Pero tol pueblu persabe que non sólo nun manifestó una actitú respetuosa pa con Asturies, que lu acoyó afayaízamente, sinón que quixo ser ún de los más emperruñaos enemigos de tolo que costitúi la basa la nuesa identidá cultural, especialmente de la nuesa llingua.
Les diez organizaciones embaxu firmantes camentamos que’l centru tovía tien la oportunidá d’iguar el problema creáu, reconsiderando la decisión tomada. Y ye d’esperar que, en casu contrariu, l’equipu direutivu, dau’l so importante papel nel procesu la decisión, sepia asumir la so condición de responsable del conflictu creáu, presentando entós una dimisión que toos sabríen comprender.
Pidímos-y al IES una rectificación. Tamién pidimos al Conceyu y al MEC qu’informen negativamente la esbilla d’esi nome, poniéndo-y al IES el nome de "Andrés Solar Santurio", perqueríu escritor xixonés, yá fallecíu, defensor de la llingua y cultura d’Asturies.
Porque ye evidente que la decisión del Conseyu Escolar nun valió más que pa encetar el clima de convivencia propiu d’un centru educativu. Ello ye la meyor preba de que tamos delantre d’una decisión que convién reconsiderar y camudar. Tampocu nun ye d’estrañar que la situación seya bien gafienta al alcordase de cómu la direición del centru nun quixo proponer hai tiempu un nome oficial, cuandu l’alumnáu fexo una fuerte campaña pa pone-y precisamente’l nome d’Andrés Solar.
Un centru d’enseñanza, públicu y asturianu nun pue cayer nel error de convertir la so identidá nominal nun emblema antiasturianu y, con ello, nun actu permanente de provocación a los ciudadanos. Tien de ser coherente y respetuosu cola identidá del so pueblu.
Poro, son agora diez organizaciones les qu’asumen la vindicación fecha hai un tiempu por Andecha Astur. Dientru poco sumaránse a ella más grupos y ye firme’l compromisu de toos ellos d’entamar llueu movilizaciones pa evitar l’agresión a Asturies que della xente pretende.
Organizaciones firmantes: ANDECHA ASTUR – ANDECHA MOCEDÁ – IZQUIERDA ASTURIANA (IAS) – IZQUIERDA NACIONALIEGA D’ASTURIES (IAS) – MOCEDAES NACIONALIEGUES – XUNTA MOZA – CORRIENTE SINDICAL D’IZQUIERDA MOCEDÁ (CSI) – REMANECER – AYDA – LA FONTE’L CAI
ANDECHA ASTUR
c-lletronicu: andecha@asturies.org