Andecha Astur denuncia'l desdexamientu y desproteición del castru La Campa Torres, y alvierte de la posibilidá d'un desastre comu'l producíu nel de Cellagú, n'Uviéu.
 

ANDECHA ASTUR quier denunciar públicamente'l desdexamientu y desproteición nel que s'afaya'l castru de La Campa Torres. El panorama ye ablayante: valeru de xixilancia, utilización del tarrén pa pación de vaques y caballeríes y esposición contina a cualisquier robu de los esceicionales materiales y yacimientos del Parque Arqueolóxicu, a lo qu'habríe d'amestar la estrema tardanza n'ellaborar un nueu conveniu pa continuar les actuaciones que s'entamaren con anterioridá. Solo la tradicional desidia y falta de sensibilidá, tantu del Ayuntamientu Xixón comu de la Conseyería de Cultura, puen desplicar el desdexamientu y la desproteición de la Campa Torres.

Esti desdexamientu solo pue valorase na so xusta midía si camentamos qu'esta fastera arqueolóxica foi declarada Bien d'interés Cultural en 1994 y que la superficie a protexer ye de 85.000 metros cuadraos, tando obligaos tantu l'Ayuntamientu comu'l Principáu a conservalo y protexelo, sigún los artículos 7 y 8 de Padrimoniu Hestóricu, dixebradamente de les investigaciones que puean llevase a efeutu.

Yá en 1991, cola xida de la firma del conveniu caberu de cooperación ente l'Ayuntamientu y el Ministeriu y la conseyería Cultura pal llamáu proyéutu integral d'actuacion en La Campa Torres, declarase la "esceicional importancia d'esti complexu arqueolóxicu, vinculáu al padrimoniu prerromanu, costituyendo ún de los meyores exemplares de la cultura castreña del noroeste peninsular y esponente del contautu ente'l mundiu indíxena y la romanización" (BOE de 12-6-91). Nun paez que les pallabres se correspuendan colos fechos, sobrotou cuandu ainda ta bien presente la triesti esperiencia de la destruición del castru de Cellagú n'Uviéu.

Cuandu trescurriere más d'un añu dende la fin del citáu conveniu, esperamos que l'Alcalde de Xixón y la Direutora Rexonal de Cultura atopen un fuexu nes sos múltiples y variaes actividaes pa dar puxu d'imediatu a un programa de xixilancia y conservacióndel castru y, dixebradamente d'ello, firmar un nueu conveniu pa la restauración, revalorización, afayamientu pa visites y continuación de les investigaciones en La Campa Torres, pa dar continuidá a les estraordinaries ayalgues atopaes fasta agora (primeros restos d'astures, fíbules, pozos, fornos de fundición, viviendes, cerámiques, etc..), y que tovieren el so aniciu cuandu nel sieglu XVIII, l'arquiteutu Reguera, a istancies de Xovellanos fixere escavaciones p'atopar les Ares Sestianes.

Insistimos, la esperiencia de Cellagú nun pue repetise, y munchu menos por mor de la pasividá de los poderes públicos en La Campa Torres.