CASU NICOLASA.
La Xueza ye quien pide desplicaciones a los sindicatos SOMA y CCOO, y eso nun ye denguna "estupidez"
 

En declaraciones espublizaes el miércoles caberu, el responsable estatal de Seguranza Llaboral de CCOO afirmó que "los sindicantos nun xestionamos los fondos de les empreses pa los planes de seguranza nin recibimos dineru dalu pal so desendolque", acutando amás de "estupideces por desconocencia del procedimientu" les declaraciones acabantes d'Andecha Astur en rellación col tercer cabudañu de la traxedica del Pozu Nicolasa.

La xueza de Mieres, encargada de les actuaciones xudiciales del casu Nicolasa, requirió al SOMA y CCOO pa que remitan la documentación rellativa a les partíes presupuestaries del Pozu Nicolasa a ellos asiñaes en conceutu de seguranza demientres l'añu 1995, añu del acidente, too ello a peticiónde los lletraos que representen a Andecha Astur. Calificar d'estupidez el tresvase de fondos de seguranza a los sindicatos equival a descalificar los determinos de la titular del xulgáu, darréu que la solicitú d'Andecha foi atendía pola Xueza. Acullá d'estos insultos, lo que tienen de faer CCOO y SOMA ye retrucar a la petición del xulgáu ensin vagar, pa non aumentar ainda más el retrasu nel esclariamientu de los fechos, retrasu que, de toa miente, propiciaren ellos mesmos al desentendese xudicialmente del casu. La permanente actuación d'Andecha Astur obligólos a organizar una protesta -dempués de tres años de folganza- que tien munchu d'hipocresía. Abaste dicir, arriendes d'ello, que foi'l nuesu asesor xurídicu quien hebio d'orientalos nel so día sobro la marcha de les actuaciones

Pel restu, si solicitemos a la xueza tala documentación, ello ye por mor de les contines declaraciones que, en público y privao, rialicen destacaos cargos públicos, rellacionando los fondos de seguranza minera cola financiación inregular de los sindicatos. D'ente estes declaraciones destacamos les rializaes por Antón Saavedra ya Iñaki Anasagasti.

Saavedra acuso a les cúpules d'UGT y CCOO d'achantar frente a l'alta siniestrabilidá minera por sacar porgüeyu de les inversiones pa formación y seguranza, en declaraciones de fecha 18-4-96, qu'al nun ser sofitaes por IU orixinaren el so pasu al Grupu Mistu de la Xunta Xeneral del Principáu. Pel so llau, Anasagasti, en nome del PNV, acusó tamién a los sindicatos de financiación illegal al traviés de los fondo destiano a la Fundación pa la Formación Continua (Forcem), en declaraciones de fecha 24 d'abril de 1996.