Comu usuarios de RENFE, sabemos que nos trenes de cercaníes que circulen per Asturies tán apaeciendo dende hai unos díes cartelos publicitarios de la ONCE escritos en catalán. Nun podemos entender talu fechu más que comu una falta respetu a tola xente asturiano.

    Comu ciudadanos asturianos y comu nacionalistes, semos dafechu respetuosos cola identidá cultural y llingüística de tolos pueblos y persabemos la importancia que la llingua propia tien na vida d’una comunidá. Naide meyor que los asturianos pa pescancialo, un pueblu con una llingua a la que se-y ñega la reconocencia oficial.

    Precisamente por eso, pola nuesa condición de pueblu sometíu a la indigna ñegación de la so identidá llingüística, ye polo que costitúi una clara ofensa qu’una empresa comu la ONCE inxerte nos trenes publicidá que nun ta escrita na nuesa llingua, sinón otra ayena a les nueses costumes, y qu’otra empresa, la RENFE, aceute una situación comu ésa.

    La situación abúltamos más grave entá teniendo en cuenta de qu’empreses se trata. Per un llau una empresa pública, RENFE, que debería desendolcar el so llabor dende una perspeutiva d’integración y respetu pa col país nel que presta los sos sirvicios. Per otru llau la ONCE, a la que se-y supón una alta motivación social de toa triba y, comu non, tamién na estaya cultural.

    Yá mos paecía ciertamente ofensivo que la condición de pública d’una y l’enfotu social de la otra nun les llevare a decatase de que, igualmente qu’en Catalunya lo normal ye facer les campañes publicitaries en catalán, n’Asturies lo normal tamién ye que se faigan n’asturianu. Pero los asturianos yá mos sentimos daqué más qu’ofendíos cuandu non sólo nun se fai publicidá na nuesa llingua, sinón que s’almite precisamente cualesquier otra llingua enantes que la nuesa.

    Poro, enfotaos na sensibilidá que se-yos supón a dambes empreses, la organización nacionalista ANDECHA ASTUR acaba de dirixise a RENFE y a la ONCE pa que, darréu, dexen de dañar la sensibilidá del pueblu asturianu, pa lo que les afalamos a facer un usu normalizáu y xeneral de la llingua asturiana na prestación de los sos sirvicios n’Asturies.