Andecha Astur desixe la la imediata paralización de la mina a cielu abiertu de La Mozquita/La Matona y espera del Ayuntamientu de Llangréu una postura firme y coherente.
 

 Andecha Astur desixe al ayuntamientu llangreanu la imediata paralización de la mina a cielu abiertu qu'esplota Hunosa en La Mozquita/La Matona, atalantanco que nun ye de recibu conxelar tala paralización pola nuea solicitú de llicencia presentada por Hunosa dempués de que l'Ayuntamientu consiguiera'l sofitu del Tribunal Superior de Xusticia d'Asturies.

Si l'actuación del Ayuntamientu de Llangréu fasta agora tien pecao de demasiadamente precavida, non actuando en tiempu y mou p'aparar una actividá illegal dafechu, comu ye la esplotación a cielu abiertu de La Mozquita/La Matona (colo que permitieren un dañu medioambiental y a los vecinos d'una magnitú descomanada), la sola posibilidá de que nun lleven alantre tala paralización, agora qu'Hunosa presentó la solicitú de llicencia que tendríe de tener presentao enantes d'escomenzar cola so actividá en La Mozquita/La Matona, supondría que tolo fecho pol Ayuntamientu fasta anguañu nun sedría más qu'una falcatrúa propagandística. Por supuestu, si IU fina dando llicencia a La Mozquita/La Matona, lo que tendremos ye una continuación lliteral de la nefasta política del PSOE cuandu gobernaba en llangréu, en materia medioambiental.

Andecha Astur camienta qu'IU nun tien de tarrecer de les posibles reclamaciones d'Hunosa por daños y perxuicios en casu de refugar la llicencia, nin la repercusión social del desemplegu de varios trabayadores afeutaos, porque enxamás nun se debió escomenzar una actividá tan destructiva y munchu menos ensin llicencia. Con un bon asesoramientu medioambiental y xurídicu, l'Ayuntamientu Llangréu aportaríe necesariamente a la conclusión de que nun pue concedese tala llicencia a Hunosa, pero les coses van mal cuandu l'equipu de gobiernu, nun conceyu tan xabazmente castigáu polos ataques al medio ambiente, nun consideró preciso aniciar una conceyalía específica d'esta materia (pesa figurar nel programa ellectoral d'IU).

Esta sedríe una bona oportunidá pa IU de poner en práutica la so teoría sobro'l desendolque caltenible y un retu qeu de tener una salida positiva, marcaríe un fitu na hestoria de la llucha escontra les mines a cielu abiertu; pero a xulgar polos fechos, paez que va ser desaprovechada.