Col deslinde marítimu-terrestre nuevamente bloqueáu y ensin una aparente solución xusta ya imediata, gracies a la decepcionante mediación política del nuesu alcalde, nun tiempu presidente de la asociación d’afeutaos pola Llei de Costes.
 

Con un caos circulatoriu constante, nel cascu urbanu de la villa, agraváu por una peatonalización, que si bien yera necesaria nun foi debidamente planificada, lo qu’anguañu prevoca la total falta de fasteres d’aparcamientu na villa riosellana y ratificáu pol caprichu consistorial del "grupu consorte" del PP Riosellanu, la llista "independiente" del señor Ureta y familia, d’afuracar la cai Villar y Valle pa la inecesaria costruición d’un ascensor al barriu de La Cuesta.
 

Con una pavimentación de cartón-piedra y unes obres de saneamientu dignes de Pepe Gotera y Otilio, ensin proyeutos riales d’ellaboración y con una carga presupuestaria desaxerada pa les arques municipales y que na cai vese espeyada en forma de magnolios gabinianos, tiestos OVNI, faroles d’época y probetayos mosaicos nel pavimentu pagaos a preciu de braeres escultures.
 

Con una xestión política totalmente antidemocrática, que nun fai l’usu debíu de los plenos municipales, que nun comunica a los grupos d’oposición les decisiones de l’alcaldía, ue nun presenta a alderique los proyeutos futuros a desendolcar nel conceyu, que nin tan siquier respuende a los escritos que se-y presenten debidamente rexistraos nes oficines municipales y que sigún les Ordenances de Furrulamientu Internu del ayuntamientu tendríen de ser respondíos nun plazu másimu de dos meses.
 

Con una política urbanística llaceriosa y llamentable que pretende llantar la necesaria EDAR (Estación Depuradora d’Agües Residuales) na fastera de La Mediana, una fastera declarada poles propies Normes Subsidiaries del Ayuntamientu de Ribesella, comu de Non Urbanizable d’Especial Proteición Paisaxística, al afayase enxertada na denomada Vega del Sella. Un allugamientu decidíu a espaldes del pueblu ya inclusu de la propia oposición política por un equipu de gobiernu que fexo oyíos sordos a les protestes de más de 300 riosellanos que con recoyíes de firmes y manifestaciónincluyía, yá amuesaron, hai agora más de dos años, la so oposición a talu asitiamientu. Una política urbanística que pretende, gracies a la más nidia actitú caciquil ya interesada, llegalizar una pista de Karting costruyida ensin permisu rial algunu, por un es-conceyal del "grupu consorte", güei retiráu de la vida política activa, nuna fastera tamién declarada comu de Non Urbanizable d’Usu Agrícola.
 

Con un branu festivu a golpe de chequera qu’un ayuntamientu comu’l de Ribesella, que tien un défici d’al rodiu de más de 500 millones de pesete, nun pue permitise.
 

Con una actitú presonal del propiu alcalde de Ribesella haza funcionarios y collacios municdipales totalmente despótica y carauterística del xestor que namái nagua pol so bien particular y el de los que tan a la so rodalada.
 

Pocu más cabe dicir, si ye qu’a daquién-y paez pocu tolo dicho fasta agora. Faltamos falar del Area Comercial de guadamía, de la política agresiva haza’l seutor de la hostelería nuecherniega, del escaecimientu del seutor riosellanu, de la falta de creación d’emplegu, del despreciu faza la llingua y cultura asturiana qu’amuesa’l siñor alcalde, de la facilidá con qu’alcalde y conceyales abren hotelinos y apartamentos rurales nel conceyu...