Ye increyíble que se tea aprovechando, pola parte l´ayuntamientu, d´un problema provocau pola contaminación
producida pola empresa INDASA, y la oposición vecinal al caltenimientu de dicha empresa en suelu de San Cloyo, pa facer desapaecer al restu de la industria nelli asitiada. Nesti sen persabemos que la mayoría del pueblu de San Cloyo ye contrariu al camudamientu de suelu industrial por suelu residencial, ya que prefieren tener daqué industria a ser esclusivamente un pueblu dormitoriu.

N´ANDECHA ASTUR vemos con preocupación, comu una vegada más los intereses urbanísticos, de dalgunos
constructores, son tenidos más en cuenta que los intereses sociales d´un pueblu y de los trabayadores. Nun tamos, nin taremos enxamás d´alcuerdu coles industries que contaminen, tean en San Cloyo o n´Olloniego, pero llucharemos xunto colos vecinos y vecines d´esti pueblu pol caltenimientu de la industria llimpia y non contaminante ellí instalada.

Ya ta bien de facer negociu a base de lliberar suelu industrial, obligando a los trabayadores a camudar de domiciliu, u obligándolos a llevantase más ceo pa poder dir a trabayar, pa que dalgún interesau faiga negociu, o l´ayuntamientu pueda sacar dalguna perra estraordinaria pa poder facer caxa a final d´añu.

Nesti sen ANDECHA ASTUR entamó ayeri una campaña pol caltenimientu de la industria en San Cloyo, cola
colocación de varies pancartes en dichu pueblu, pancartes que fueron perbién acoyies, y col caltenimientu de varios contautos con dalgunos vecinos pa desplica-yos la nuesa postura y conocer, de primer mano, la d´ellos nesti tema, llegando a la conclusión de que, mayoritariamente, dichu pueblu ye partidariu de caltener la industria onde ta, cola única esceición de INDASA pol perconociu problema de contaminación. Poro facemos un llamau al bon sentíu del ayuntamientu uvieín pa nun faiga desapaecer daqué pernecesario y mui valoratible pa la vida d´esti pueblu, y permita la instalación de nueves empreses, siempre que seyan llimpies.