Un analís de la sociedá asturiana dizmos qu’ésta ye ca vegada más sensitible a los mensaxes nacionaliegos. El conxuntu’l Pueblu asturianu ta sintiendo, ca vegada con más fuercia, la necesidá de proveyese d’una cadarma política que lu configure comu una entidá nacional reconocía y respetada poles demás naciones. Col asoleyamientu d’es-ta voluntá, ca vuelta más ñidia, el sentimientu d’identidá asturiana va tornándose en concenxa nacional; na midía qu’esta concenxa espolleta y se xeneraliza, la esistencia de la nuesa nación yá nun sólo s’espeya nunos fechos hestóricos, culturales, territoriales, sociales o llingüísticos, sinón que tien el so mayor sofitu na voluntá espresa de siguir costituyendo una nación o, lo que ye lo mesmo, na voluntá de nun dexar de selo.

  Esti cambiu cualitativu ye percibíu por tolos partíos políticos y equí ye onde xuega’l so papel cimeru’l plantegamientu de la “autonomía plena” o’l “autogobiernu”, comu ruxideros que formen parte de la so táutica del “ruíu políticu”, xenerando con ello una confusión cola que se puea llegar a creyer qu’esiste bramente una dinámica competencial. Pero, no fondero, éstes tornáronse nes vindicaciones polítiques que l’Estáu español, al traviés de los partíos de la Xunta Xeneral, remanen pa inhibir el sentimientu d’identidá nacional y frenar l’españíu nacionaliegu vindicativu que, de fechu, ta xurdiendo nel sen de la sociedá asturiana. Traten de dar daqué (“autonomía plena”) o daqué más (“autogobiernu”) pa nun tener que dalo too. Y, al empar, con esi discursu nagüen por llograr la criminalización del autodetermín comu conceutu de la teoría política, comu drechu d’un pueblu y comu opción política d’una organización; poro, contraponen de contino la calidá “democrática” de los términos “autonomía plena” y “autogobiernu” frente al supuestu calter incostitucional y antidemocráticu del autodetermín. 

  Dientru’l llabor que desendolca IU pal afitamientu del Estáu español, asoleyó hai poco una nuea táutica: la defensa’l “autogobiernu”. Pue asoceder qu’esti términu seya malinterpretáu por dalguna xente debío a ciertes connotaciones hestóriques y polítiques, pero en realidá nun supón otra cosa más qu’una descentralización alministrativa, con un altor competencial mayor que la “autonomía plena”, pero que conlleva la ñegación de la soberanía del nuesu pueblu. Naide nun se pue engañar col nueu discursu d’IU: l’Asturies del “autogobiernu” sedría igualmente un país sometíu a la soberanía española y al que se-y torga l’exerciciu del drechu al autodetermín. Ellos mesmos lo preben cuandu pretenden que l’autogobiernu ye l’estatus políticu del qu’esfruten Catalunya y Euskadi, pos al sofitar talu argumentu tán dando por fináu’l procesu autonómicu d’esos pueblos, poniéndose na llínia estatalista na qu’hestóricamente avecen tar. 

  Con IU al frente d’esti discursu tamién s’intenta que la xente con enfotos nacionaliegos se centre sólo nun debate (“trátase d’algamar un mayor techu competencial”) nel que puen cayer presones ensin la suficiente formación ideolóxica. Pero esi debate ye falsu y los nacionaliegos refugámoslu dafechu. El problema ye siempres y simplemente l’inicial: la reconocencia d’Asturies comu nación. Y ello nun se pue algamar de dengún mou con un estatutu, nin cola so reforma, nin siquier cola reforma la Costitución española. Poro, defender agora un enanchamientu táuticu o estratéxicu de les competencies estatutaries ye, nin más nin menos, que participar de la dinámica centraliega. Ye una de les munches maneres d’arrenunciar a la soberanía del Pueblu asturianu. 

  Nun mos tracamundiemos, na midía qu’Andecha Astur xorrez y s’enxerta na sociedá asturiana, el mensax rexonalizante/autonomizante de los partíos de la Xunta Xeneral y los medios de comunicación evoluciona, adopta nuees formes y, sobro too, tórnase más monolíticu. A la fin, pretenden presentamos l’altor de les sos vindicaciones comu’l mayor posible, colo que nun faen más que collaborar na defensa de los intereses del Estáu español. Pero analicemos porqué ye un error esti plantegamientu de so.  

  Los nacionaliegos, de magar la esistencia la llingua, el territoriu, la identidá hestórica, a la fin, de la nación asturiana, lo que guetamos ye la reconocencia pa la nuesa colleutividá de la condición de nación y, darréu d’ello, de los drechos internacionales reconocíos pa les naciones. Ente talos drechos hai un drechu coleutivu indispensable al autodetermín de los pueblos: ca nación tien de poder decidir, en tou momentu y circustancia, cuálu va ser el so proyeutu de futuru comu pueblu na estaya política, cultural, económica, social,… y  tamién cuálu va ser el so nivel de rellación o independencia respeutu a otres realidaes nacionales. 

  Poro, el nacionalismu asturianu55  tien una riestra de puntos básicos, ente ellos:  
 

* La reconocencia de la esistencia d’una nación y, per ende, la defensa de la so integridá territorial y les sos señes d’identidá, cimeramente, la llingua, comu la más dinámica d’elles. 

* Algamar el poder políticu necesariu pa garantizar la so soberanía. 

* La reconocencia de que son les clases trabayadores y populares les que tienen de protagonizar la necesaria tresformación social. 
 

  Nun hai más, l’espaciu nacionaliegu d’izquierda queda definíu nestes coordenaes. Podemos tar o non d’alcuerdu cola aplicación práutica d’estos plantegamientos, y podemos ver les sos consecuencies comu positives o negatives, eso ye otru discutiniu, pero si salimos d’estos puntos mínimos, taremos saliendo del campu nacionaliegu d’izquierda.

  Por embargu, a nun ser una mui rellativa promoción de la llingua, dengún de los puntos esenciales del nacionalismu d’izquierda son quién a algamase dende la “autonomía plena” o dende’l “autogobiernu”. Nin se mos reconoz comu nación, nin s’algama poder políticu valoratible, nin se da pasu a un procesu haza la soberanía, nin mos dexen un requexu p’autodeterminamos y decidir el nuesu futuru.  

  Tampocu nun se reconoz al Pueblu Trabayador Asturianu comu protagonista políticu. Les polítiques con que se mos esplota al tenemos somorguiaos nel marcu estatal español, xunto cola falta reconocencia de la nuesa identidá nacional, faen imposible la necesaria tresformación social y l’avance de la clas trabayadora. Nun hai más qu’alcordase de qu’Ochobre de 1934 que foi, nesti sen, el momentu más rellumante, foi tamién la ocasión en qu’Asturies tuvo más cerca d’una definición nacional, que finalmente l’Estáu español torgó cola durísima represión del so exércitu, dirixía por Franco.  

  Poro, pa la izquierda nacionaliega de lo que se trata nun ye d’algamar más o menos competencies, de que l’Estáu mos ceda más o menos poder, más o menos drechos, sinón de ser nós, los/es trabayadores d’Asturies los que, dende la nuesa soberanía, decidamos lo que queremos ser, ónde queremos tar y cómu mos peta algamalo. Ello inclúi la necesidá d’aperiar un marcu específicu pa la llucha de clases, un marcu propiu de rellaciones llaborales qu’encadarme les vindicaciones obreres d’anguañu.

  Poro, la “autonomía plena” y el “autogobiernu” nun son un proyeutu nacionaliegu y nun son un proyeutu d’izquierda; nun tienen otru sen qu’integrar los plantegamientos nacionaliegos nun contestu rexonalizante pa que puean ser asimilaos y neutralizaos más cenciellamente por un Estáu que, ha tenese presente, cunta colos preseos afayaízos pa facelo. Bona preba d’ello ye que güei trátase d’un discursu políticu bien asumíu pola drecha española. Bramente, el Coordinador estatal del PP, Ángel Acebes, yá tien falao públicamente de cómu’l so partíu defende y garantiza l’autogobiernu de les comunidaes autónomes. Y Sergio Marqués, presidente del Gobiernu asturianu, declaró, sofitándose “nel modelu de la España les autonomíes diseñáu pola Costitución española”, que “nesta organización territorial, Asturies entra nuna nuea fase de la so hestoria moderna y ta nel puntu básicu en que ye necesario ya inrenunciable algamar el desendolque de la nuesa autonomía, de la descentralización. Ye mester un trespasu competencies y, por tanto, de capacidá d’autogobiernu ca vegada más amplia a les autonomíes. Aportó’l momentu en que’l Gobiernu central tien de reconocer la capacidá de gobernar Asturies dende Asturies”56 . 

  La “autonomía plena”  y el “autogobiernu” nun son, comu dalgunos pretenden argumentar, una triba procesu que quier algamar los oxetivos de soberanía y autodetermín en pasos graduales. Demientres el nacionalismu d’izquierda defende la persistencia de les estremaes naciones, l’autonomía y l’autogobiernu refuercien la posición predominante del Estáu sobro les naciones que lu componen y a lo único que se llenden ye a enanchar, si acasu, la descentralización alministrativa. 

  Hai de tener bien presente que naciones comu Euskadi o Catalunya, que mos lleven años lluz nel algame les sos vindicaciones nacionales, denuncien la “autonomía plena” y el “autogobiernu” comu daqué insuficiente ya incapaz d’iguar los sos problemes y, precisamente cuandu en toa Europa ta dándose un alderique sobro les posibilidaes de procesos dixebriegos, los partíos de la Xunta Xeneral d’Asturies planteguen estatus políticos que, comu la “autonomía plena” o‘l “autogobiernu”, tornarán dexamos nel vagón de cola del Estáu español y del restu Europa. 

  Un exemplu de lo qu’afirmamos ye analizar la posición que caltienen les fuercies nacionaliegues asitiaes anguañu nos gobiernos autonómicos. D’elles podríamos dicir, polo menos dos coses:
 

- Que toes son fondamente conservadores. 

- Que denguna d’elles tien ente los sos oxetivos prioritarios la vindicación real del drechu al autodetermín del so pueblu. 

  CiU nun vindica con ello la plena soberanía nin l’exerciciu real del autodetermín57  del pueblu catalán, custiones que sí son inrenunciables pa un nacionalismu d’izquierdes. CiU, superáu’l pidimientu l’autogobiernu, aprofitao tolo que dio de sí la dinámica estatutaria, demanda agora una “soberanía compartida”. Falaremos darréu d’esti conceutu pero con un enfotu meramente desplicativu, que nun supón compartilu de manera dala. Desplicando les posiciones táutiques d’otres fuercies polítiques sólo naguamos por esclariar cómu’l discursu del “autogobiernu”, que se quier vender n’Asturies comu novedá, nin siquier ye valible pa fuercies nacionaliegues de dreches.

  CiU nun refuga del Estáu español comu concreción valible nel ámbetu la configuración política formal. CiU nun desixe la derogación de la Costitución española, sinón sólo la so igua. CiU sólo demanda una reforma del modelu estatal vixente, que ye namái un modelu autonómicu de simple descentralización alministrativa, pa tresformalu nun Estáu plurinacional, nel qu’ellos destaquen cincu estayes (que siempres ana-licen y vindiquen esclusivamente dende y pa la so realidá nacional): 
 

1. Llingua y cultura 
Catalunya tendría plena soberanía llingüística y cultural. Tratu igualitariu pa toles llingües del Estáu, aceutando ésti comu de so y comu iguales toles cultures nelli presentes. 

2. Simboloxía ya istituciones 
Les istituciones (llexisllatives, xudiciales, executives, econó-miques,…) tamién aceutaríen la plurinacionalidá y ésta espeyaríase nelles. Sedríen sobro too’l Senáu y el Poder Xudicial les que más tendríen de camudar. Finaríase cola torga costitucional pa entamar federaciones de comunidaes autónomes. Desaniciaríense tolos muérganos de l’alministración central en Catalunya. Los símbolos nacionales catalanes recibiríen el mesmu tratu que los del Estáu tanto nel ámbetu estatal comu na Xunión Europea. 

3. Financiación 
Un nueu Pautu Fiscal ente Catalunya y l’Estáu que permita definir un modelu propiu y billateral de financiación, nel que Catalunya ingrese los impuestos ellí recoyíos y tresfiera una parte al Gobiernu central.

4. Competencies 
Amás d’asumir les competencies pendientes, desendolcar un nueu marcu competencial nel que’l poder políticu que-yos correspuende comu nación seya muncho mayor del que tienen anguañu. Esi nueu marcu pasa pola reconocencia nacional de Catalunya y la definición d’una nuea rellación billateral ente ésta y l’Estáu. Esti marcu incluyiría competencies esclusives sobro l’autoorganización de la Generalitat, llingua, cultura, educación, orde públicu, alministración llocal ya infracadarmes. Tamién incluyiría’l sistema d’Alministración única. 

5. Europa y rellaciones internacionales 
Catalunya taría representada direutamente nos muérganos internacionales y nes delegaciones internacionales del Estáu. Igualmente los grupos y colleutivos catalanes tendríen representación propia n’ámbetos internacionales, alcuentros científicos, teunolóxicos, culturales, sociales, deportivos,… Catalunya tendría representación istitucional na Xunión Europea, sobro too no que cinca a custiones de calter llingüísticu o cultural. 

  Ello asina, nun podemos tracamundiar daqué que ye la basa pa la recostruición del nuesu pueblu, l’autodetermín, coles estremaes cotes d’autogobiernu –que non de soberanía- que suponen los estatus políticos que defenden IU, PSOE, PP y PAS. Nun ye verdá qu’una mayor descentralización alministrativa mos permita un mayor grau de soberanía. Al Pueblu Trabayador Asturianu nun se-y pue dicir que la soberanía tien porcentaxes; la soberanía nun los almite, tiense o nun se tien y l’oxetivu nun ye otru qu’algamar a ser los dueños del nuesu propiu destín.

  Ye preciso dexar de faer enguedeyos y tabús colos términos políticos, y presentar plantegamientos ñidios y valientes, anque recurrir a ellos puea resulta-yos ofensivo a los que quixeron ser cabezaleros de la “movida política”, que, queriendo llabrase nella una imaxe progre y asturiana, nun fixeron más que “retratase” bien comu fuercies que pauten y collaboren colos intereses ayenos a la nación asturiana y a la so clas trabayadora.  

  La reconocencia de los drechos d’autodetermín y soberanía supón, nin más nin menos, la reconocencia de la realidá plurinacional del Estáu español; supón reconocer que toes y cauna de les naciones y pueblos del Estáu tienen drechu permanente a dotase del estatus xurídicu y políticu que camienten afayaízu en ca momentu: asociase ente sí, asociase a un Estáu yá costituyíu, optar por un estáu federal, dotase d’un estáu d’autonomía o, ¿por qué non?, apostar pola secesión y formar un Estáu dixebráu. En cualisquier casu, lo importante nun ye lo que s’escueya, sinón que tala eleición, de fechu, puea dase ensin denguna triba de torga o impedimentu. Porque hai de tener claro que les perspeutives sociales, culturales y económiques d’un pueblu dependen d’abondos factores pero sobro too d’ún: del grau de soberanía, de poder políticu que tien pa tomar les sos pro-pies decisiones.  

  Lo contrario, ye dicir, la “autonomía plena” o’l “autogobiernu”, decidir dende un parllamentu foriatu, comu’l Parllamentu español, la cantidá d’autonomía y de drechos que se mos concede, ye ñegar la esistencia de les estremaes naciones del Estáu español y defender la xunidá d’España comu únicu marcu políticu posible. Esti ye l’espíritu antidemocráticu de la Costitución española que, comu siempres, pon al exércitu y a les fuercies armaes comu garantes d’esa xunidá, perriba la voluntá popular. 

  Frente a toles formes de concreción de la opción españolista que yá conocemos y sofrimos, defendemos que’l nacionalismu d’izquierdes ye la única opción de futuru y modernidá. Sólo elli-y ufierta garantíes al Pueblu Trabayador Asturianu porque tamién ye la única opción política que lu reconoz talu comu ye, cola so identidá nacional y con plena capacidá pa escoyer y determinar soberanamente’l so futuru.

  El nacionalismu asturianu d’izquierdes, dende que ñació hai más de venti años, vien medrando organizativamente pero, sobro too, nel desendolque d’un programa políticu afayaízu pa la realidá del nuesu pueblu. Trabayemos abondo y maduremos fasta algamar la concenxa ñidia de cuálos son los retos hestóricos que tenemos comu nación y disponemos de la suficiente enerxía pa encarialos. 

  Esa opción que representa Andecha Astur dispón güei d’un proyeutu políticu maduru y bien desendolcáu que supón una rempuesta global a les necesidaes d’Asturies, ello ye, un modelu global de nación. Poro, la propuesta d’Andecha Astur configúrase ñidiamente comu una alternativa ellaborada, constructiva, moderna y valible pa l’Asturies del sieglu XXI. Nun hai dubia de qu’ello ye altamente positivo y permite afrontar el nuesu futuru con unes posibilidaes inédites comu movimientu políticu.