Marzu

Agora sobramos

Paez ser qu’Asturies nun tien igua. La industria tien de «reconvertise», el campu ye más rentable si nun se trabaya, nunos años nun va quedar un pozu abiertu, pasín ente pasu la pesca va desaniciándose, el turismu nun paez ser la igua que dicíen, el comerciu y la hostelería van comu suel dicise, «en picao» y, poro, el futuru de les asturianes y los asturianos ye bien inciertu.

Por embargu, ta circulando, ca vegada con más fuercia, la teoría de que l'aquel de la custión ta en que sobramos unos 600.000 habitantes y qu’Asturies podríe vivir perbien con mediu millón de presones. Comu suena. Agora la culpa yá nun la tienen los responsables políticos y económicos, nin siquier tien la culpa la economía internacional de Maastricht. Non, agora la culpa tenémosla nós, les y los asturianos, porque somos muncha xente. Y una de les «preclares» mentes que tan nel testeru d’esta corriente pensadora ye, ¡allábate boroña!, Xuan Lluis Rodríguez Vixil, antigu presidente del Gobiernu autonómicu asturianu. Inventor de la cris positiva, Vixil denunció la política qu’él mesmu nomó comu «de mesa camilla» y ellaboró una conceición petromochiana d’Asturies que lu llevó al más altu cumal de la política asturiana. Frutu de too ello, ye esta nuea interpretación de la realidá al traviés de la que llega a pes-canciase que la braera esencia de los nuesos problemes son unos 600.000 asturianos y asturianes que nun teníemos que tar equí. Calistrando nel enguedeyosu entramáu d’esta corriente intelectual, comu sólo Vixil podía facelo, llégase a la inevitable conclusión de que n’Asturies namás hai posibilidaes pa la sosistencia de mediu millón de presones, polo que, teniendo en cuenta qu’hai alrodiu d’un millón cien mil habitantes, n’Asturies sobren les 600.000 presones que s’anunciaben. Por embargu, esta teoría, entá nun llegó a esclariar dalgunos puntos escuros. Por exemplu, ¿quiénes son les 600.000 presones que sobren?, ¿qué pasa si nun quieren colar?, ¿habrá que llexislar al respeutive?, ¿tendremos competencies enforma en materia de ciudadanos y ciudadanes sobrantes?, ¿sedrá enforma con una reforma l’Estatutu o habrá d’asoleyase una llei de les Cortes Xenerales?, ¿podríe güeyase nel Códigu Penal la figura de ciudadanu o ciudadana sobrante?. Son entrugues a les que los voceros d’esta teoría aínda nun tan en condiciones de retrucar correchamente. Pero habrá que tar sollertes, porque ellos, tar, tan nello.

Irregularidaes na costruición del mercáu de ganáu de Sieru

Andecha Astur lleva’l casu a los tribunales

Andecha Astur presentó una denuncia nel xulgáu d’instruición, poles presuntes irregularidaes cometíes pol Gobiernu autonómicu na financiación del mercáu de ganáu de Sieru, no que cinca al destín que se-y apurrió a la sovención concedía pola XE. Nun entamu, esta sovención foi concedía a l’Alministración autonómica pola cantidá de 179’8 millones de pesetes, cola condición de que namás podía empobinase a la costruición del mercáu de ganáu de Sieru. Por embargu, el Gobiernu autonómicu adelantó la cantidá afayaíza pal entamu la obra, quedándose cola parte qu’adelantare nel intre que llegó l’aída europea. Pero l’Ayuntamientu Sieru recibe una comunicación oficial de la Conseyería de Mediu Rural, señalando la llegada d’una sovención de la UE por importe de namás 72 millones. Asina les coses, téunicos comunitarios realicen una inspeición y compreben que la sovención namás tenía un destinatariu, que ye l’Ayuntamientu Sieru, polo que camienten qu’esta irregularidá ye enforma pa que la X.E. desixa la torna la sovención, aínda más cuandu compreben que los 108 millones restantes que nun llegaron a Sieru, repartiéronse ente dellos d’Ayuntamientos y empre-ses. Por too ello, agora la X.E. reclama la torna ensin paliativos y dafechu de la sovención, ello ye, de los 179,8 millones. Nesta denuncia afítase que «ye pernidia la falsificación cosciente del documentu unviáu al Ayuntamientu Sieru pola Conseyería de Mediu Rural, nel que se comunicó’l recibimientu d’una sovención de 72 millones, cuandu, na realidá, recibiérense 179’8 millones».

Hermanamientu col campamentu saharaui d’Hagunia, en L’Aium

Andecha Astur ya IX denuncien l’actitú del Alcalde

El pasáu mes de payares presentóse nel Ayuntamientu Riosa una propuesta d’hermanamientu col Pueblu Saharaui y, tres l’alderique nel Plenu, aprebóse mayoritariamente talu hermanamientu col campamentu d’Hagunia, na provincia de L’Aium. Nesi intre, Andecha Astur solicitó que, comu complementu a esti actu, se-y apurriere a la opinión pública riosana información dafechu alrodiu d’esti campamentu y les sos carauterístiques y necesidaes concretes, «col finxu torgar cualisquier rocea que pudiere xurdir». Destamiente, l’Ayuntamien-tu Riosa afita la so participación nuna caravana enca-darmada por estremaos coleutivos y muérganismos oficiales, que diba permanecer nel campamentu d’Hagunia del 10 al 15 d’avientu. Por embargu, la decisión del Ayuntamientu de nun apurrir denguna triba d’aída material a la caravana, fizo que los grupos municipales d’Andecha Astur ya IX solicitaren al Alcalde l’aportación d’un pequeñu gabitu, «magar que fuere simbólicu», petición que foi refugada pol Alcalde. Pa Violeta Santapaz, conceyala d’Andecha Astur en Riosa «ye intolerable que se remane una situación de necesidá y d’inxusticia, comu la que carez el Pueblu Saharaui, pa que dellos de presonaxes marchen de vacancies y se faigan publicidá a cuenta les arques públiques». Darréu d’ello, la conceyala d’Andecha Astur y el conceyal d’IX refugaron de les perres del viaxe (72.000 pesetes por presona) y decidieron emplegales en material escolar y melecines. Comu consecuencia d’esta decisión, l’Alcalde viose obligáu a completar esta cantidá fasta les 300.000 pesetes. Pa violeta Santapaz «ye imprescindible encadarmar una collaboración real y comprometída colos Pueblos oprimíos, y non tornar la solidaridá internacionaliega nun «reality show indignante».

El Plan d’Emplegu del PP va aniciar 10 puestos de trabayu

Andecha Astur entama una campaña escontra «un insultu a tol conceyu»

Andecha Astur entamó una campaña de denuncia del Plan d’Emplegu del PP n’Avilés, que va aniciar el ridículu númberu de 10 puestos de trabayu. Pa Xuanxo Mielgo, voceru d’Andecha Astur n’Avilés, «dicir que 10 puestos de trabayu costituin un plan d’emplegu pal que ye'l tercer conceyu d’Asturies, sedríe un chiste, si nun fuere porque ye un insultu a tolos paraos y paraes d’Avilés». Avilés tien un indiz de paru del 25%, el paru xuvenil más altu l’Estáu (50%) y nel horizonte nun esiste denguna previsión inversora o reindustrializadora, polo que, pa Xuanxo Mielgo, «ufiertar 10 puestos de trabayu demuesa que la política d’emplegu del PP ye una chapuza impresentable». Andecha Astur afita que’l xorrecimientu’l paru, l’entamu la emigración y l’avance la probitú y les necesidaes sociales conviven colos sueldos millonarios de los políticos profesionales y los cargos públicos, col gastu millonariu en protocolu, con miles y miles d’hores estres, col fraude fiscal, yaeso. «Baste dicir», según Xuanxo Mielgo, «que coles perres del fraude fiscal esistente nel Estáu español (unos 3 billones añales) podríe afitase un sueldu de 100.000 pesetes mensuales pa toles paraes y paraos del Estáu». Demientres esta campaña, que tien por lema «¡Basta de comedies!¡Por un plan d’emplegu dignu!», Andecha Astur asitiará 1.000 cartelos y repartirá 5.000 panfletos informativos pel centru la Villa y pela totalidá los barrios.

Eventuales de CESA

Andecha Astur caltuvo un aconceyamientu colos trabayadores eventuales de Cristalería, tres el cualu, asoleyó’l so sofitu a la propuesta de negociación d’estos trabayadores, que consistía en respetar la llista trabayadores apautada dende l’entamu pola empresa y la contratación direuta y non al traviés d’una empresa de trabayu temporal, sobrotou dempués de que la propia direición de la empresa valorare los sos beneficios añales en decenes de miles de millones.

Unes 10.000 presones piden a la Duro que «pague lo que debe» Una multitudinaria manifestación, convocada pola totalidá los sindicatos, CSI, SUATEA, CXT, CNT, UXT y CCOO, percorrió les cais de Xixón el pasáu xueves, 30 xineru, en defensa'l seutor naval y comu forma de presión pa que la direición de la empresas Duro Felguera pague los 500 millones de delda que tien contrayía con Naxisa. La manifestación, que cuntó con una xixilancia policial descomanada, desendolcóse ensin más incidentes que los españíos de los petardos remanaos polos y les manifestantes y los glayíos de les conseñes, ente les que foi mayoritaria la de «Duro Felguera, paga lo que debes». Voceros de la CSI denunciaron «los graves problemes que carez Asturies y, en particular la fastera de Xixón, que yá algama’l 30% del paru asturianu y carez un procesu d’emprobecimientu que yá nun pue soportase por más tiempu». Asinamesmo, estos mesmos voceros daben datos peresmolecedores, comu que «namás qu’un 21% de paraos y paraes tienen dalguna triba abellugu social o prestación o qu’un 35% de les families trabayadores de Xixón viven de pensiones, sosidios o ingresos xuncíos a trabayos en precario del mercáu prietu de trabayu». Darréu d’ello, nel comunicáu final de la manifestación calificóse de «terrorismu patronal» l’actitú de la direición de Duro Felguera, que «pretende colar de la empresa coles perres que precisamos p’allevantar l’astilleru y caltener los puestos de trabayu y les posibilidaes de sosistencia de munches families xixoniegues».

Sofitu d’Andecha Astur
Tocántenes a les aiciones de los trabayadores del Naval qu’esfarraparon una oficina que la empresa Duro Felguera tien en Xixón, Andecha Astur asoleyó públicamente'l so sofitu «a los trabayadores que defenden el so puestu de trabayu» y, denunció, en pa-llabres de Marcos Fernández, miembru de la Executiva Nacional de la organización d’izquierda, «l’actitú hipócrita de los que frente a la situación d’indefensión y de necesidá na que s’atopen los trabayadores de Duro Felguera y Naval Xixón, nun ufierten denguna alternativa que vaiga acullá’l paru y la emigración». Nesi mesmu sen, M. Fernández denunció «l’intentu de criminalización» d'estos trabayadores y propunxo l’alderique y la presión política como preseos d’entendimientu y trabayu escontra les midíes policiales qu’anuncia’l Delegáu del Gobiernu, porque «la responsabilidá d’estes aiciones hai de guetala nos responsables políticos y económicos que xeneren estes situaciones y non nos trabayadores que defenden el so puestu de trabayu y el futuru, non sólo de les sos families, sinon d'Asturies».

V Alcuentros Nacionaliegos
Dientru los IV Alcuentros Nacionaliegos, Andecha Astur ya Izquierda Asturiana desendolcaron una xornada d’alderique que sirvió pa facer un analís de la situación política d’Asturies anguañu y l’allugamientu de la izquierda nacionaliega asturiana a curtiu y mediu plazu. A estos IV Alcuentros asistieron, asinamesmo, representantes d’otros coleutivos comu la Corriente Sindical d’Izquierda, l’asociación etnográfica Belenos y delles de presones a entítulu presonal. L’apaición del nomáu «Pautu pol autogobiernu y la oficialidá» ye una de les xides que ficieron entamar estos Alcuentros. Pa Paco Iglesias, miembru de la Executiva Nacional d’Andecha Astur, «esti Pautu ye nefastu, ta llevando a un enorme traca-mundiu a la sociedá asturiana y ye imprescindible sali-y al pasu». Darréu d’ello, el voceru d'Andecha Astur afitaba que «el Pautu fai cuantu pue por enguedeyar conceutos comu autonomía, autogobiernu, soberanía, yaeso, cola intención d’esparder la idega de que la reforma l’Estatutu y la nomada autonomía plena son la panacea, cuandu na realidá nun apareyen dengún cambéu valoratible». Por embargu, dende Andecha Astur faise una dura crítica al Pautu y la so alternativa d’autogobiernu porque «esti falsu autogobiernu que reivindiquen nun ye dengún pasu alantre, sinon la continuidá d’un Estatutu inútil y fracasáu; n’otres pallabres, ye la mesma con más bombu». Nesto Alcuentros afitóse la idega de dir encadarmando una alternativa al Pautu pa les presones y organizaciones que s’atopen na izquierda nacionaliega d’Asturies y que, según Paco Iglesias «va ser una cadarma que, dende la izquierda, plantegue una alternativa nacionaliega, seria y coherente colos naguares d’autodetermín y soberanía del Pueblu Asturianu».

Andecha Astur refuga de la sovención a la Guardia Civil

La organización amuésase partidaria del desaniciu d’esti Cuerpu
Andecha Astur solicitó-y al Presidente’l Gobiernu autonómicu'l denegamientu de cualisquier sovención empobinada a sufragar les reformes y gastos de caltenimientu de les cases cuartel de la Guardia Civil, y empobinar esi dineru a encontiar los preseos ya istalaciones del serviciu de Proteición Civil n’Asturies. Pa Lali García, de la Executiva Nacional d’Andecha Astur, «Asturies nun tien denguna triba competencia na materia de fuercies de seguranza, polo que tala sovención ta fuera llugar, y sedríe’l Ministeriu l’Interior quien tendríe d’arrecostinar colos gastos de caltenimientu de los cuarteles de la Guardia Civil». Pa la organización nacionaliega nun ye de recibu qu’a Asturies se-y ñeguen les competencies na materia seguranza pública y, al empar, que seya’l presupuestu públicu asturianu’l qu’apurra les perres que’l Ministeriu l’Interior tendríe de gastar en caltener les socadarmes que son de la so propiedá. Por otru llau, ye un fechu qu’Asturies ye deficitaria en preseos ya istalaciones de Proteición Civil, lo que s'espeya ca vegada que tien llugar dalguna catástrofe, comu incendios, aveníes, boriaes, bagamares yaeso. Nesi sen, Lali García afitó que «Andecha Astur ye partidaria del desaniciu dafechu de la Guardia Civil y, nesti casu, pescanciamos comu una desixencia inrenunciable empobinar a la estaya Proteición Civil les perres qu’agora pretenden da-y a la Guardia Civil». Comu ye sabío, el presonal de la Guardia Civil recibe de baldre les sos viviendes, lo que costitúi, a xuiciu d’Andecha Astur «un privilexu sobro’l restu la ciudadanía», y, poro, «Serxu Marqués pretende apurrir a la Guardia Civil un dineru que tendría de gastase na costruición de viviendes pa les asturianes y los asturianos que nun se beneficien, comu la Guardia Civil, del dineru qu'apurre'l restu la ciudadanía».

Igua toponímica en Carreño

L’Ayuntamientu Carreño aceutó la propuesta fecha por Andecha Astur y va entamar a camudar les plaques indicadores de les cais y places de Candás.
Asina, pola mor de la execución d’importantes obres na ciudá, el Gobiernu municipal decidió respetar en diches plaques la toponimia tradicional, asina comu emplegar en toes elles la llingua asturiana. Esta actitú de la Corporación produzse dempués de refugar d’otra propuesta anterior de la propia organización nacionaliega, na que se solicitaba la declaración del asturianu comu llingua oficial nel conceyu Carreño, qu’apareyaba la igualdá tratamientu de la llingua asturiana y el castellán, a tolos efeutos. P’Alberto Fidalgo, miembru de la Xunta Nacional d’Andecha Astur, «esto ye lo mínimo que pue faecr esti Ayuntamientu pa dir entamando a dexar al delláu la so incapacidá pa dar rempuesta a la xorreciente demanda social de sopelexar, d’una vegada, la oficialidá de la nuesa llingua».

Andecha Astur sofita a los trabayadores de Duro-Felguer

La organización califica l’actitú del Fiscal del TSXA de «demencial»
Representantes d’Andecha Astur sopelexaron el sofitu d’esta organización a «la llucha de los trabayadores de Duro-Felguera en defensa’l so puestu trabayu» y desixeron al Presidente’l Gobiernu autonómicu, Serxu Marqués, «el cumplimientu’l so compromisu de recolocar a estos trabayadores n’empreses públiques». Rubén Fernández, voceru d’Andecha Astur en Llangréu, criticó l’actitú’l Presidente «que remana demagóxicamente a los paraos y paraes d’Asturies, engafentando a la opinión pública y enfrentándolos a los trabayadores enzarraos na catedral d’Uviéu». Hai de trayer a l’alcordanza que’l Gobiernu autonómicu, una vegada que pasare la fecha que l’alcuerdu afitaba co-mu tope pa la recolocación, nun respetó la comisión de seguimientu y, envede respetar les sos normes, empobinó una carta a ca trabayador despedíu pa que tomare un determín en 48 hores; una carta na que namás s’asoleyaben los nomes de delles d’empreses, ensin denguna triba de datu más. Neses condiciones, los trabayadores, al traviés de los sos representantes, desixeron conocer más detalles, teniendo en cuenta que nun s’algamaben les condiciones apautaes pa la recolocación y tan siquier se cumplía la condición de facelo n’empreses públiques. N’otru sen, Rubén Fernández afitó que l’actitú del Fiscal del TSXA, Rafael Valero, pretendiendo criminalizar a los trabayadores enzarraos na catedral, «ye demencial y demuesa la zuna d’esti individu por reprimir a los y les trabayadores». Darréu d’ello, pal voceru d’Andecha Astur, el fiscal del TSXA «nun ye más qu’un abogaduchu qu’anda navegando pela xudicatura asturiana y namás enseña’l focicu nel intre castigar a la clas obrera y a los y les trabayadores que caltienen la so dignidá y la so llucha perriba les menacies y la represión».

Petición d’una rede guarderíes municipales
Andecha Astur solicitó-y al Ayuntamientu d’Uviéu l’encadarmamientu d’una rede guarderíes municipales nos barrios y pueblos del conceyu, con oxetu d’engabitar el llabor educativu de los neños y neñes, al empar qu’ufiertar el sofitu afayaízu a aquellos pas y mas que lu precisen y deseyen, cimeramente cuandu se trata de families d’un solu proxenitor o proxenitora, o d’ingresos insuficientes qu’obliguen a trabayar a dambos. «Arriendes d'entamar puestos de trabayu direutos ya indireutos», Ezequiel Sánchez, voceru d’Andecha Astur n’Uviéu, afitó qu’esta reivindicación «ye un pasu haza la fin de munches situaciones presonales y familiares que finen por tener graves consecuencies de marxinación y esclusión social nos neños y neñes d’orixe más humilde».

Parque l’Oeste
Por otru llau, Andecha Astur refugó de l’asitiamientu l’Hípicu nel Parque l’Oeste y solicitó-y al Ayuntamientu un aumentu de la inversión d’entamu anunciada pal parque, cincando a una superficie d’actuación mayor de la prevista. Darréu d’ello, Ezequiel Sánchez denunció la tala de dellos de carbayos, demientres la cabezalera fas de les obres del parque, afitando que «ye demencial cortar carbayos cuando lo que ta faciéndose ye una fastera verde».

L’Argañosa
D'otramiente, Andecha Astur presentó un plan de peatonalización alternativu al anunciáu pol Ayuntamientu en L’Argañosa, que «torgaríe los problemes de tráficu, ameyoraríe l’arrodiu la Ilesia S. Pablo y del ambulatoriu de C. Vallespín, al empar que permitiríe la conservación de los árboles de la fastera». Asinamesmo, la organización nacionaliega propunxo que les obres de Cinturón Verde incluyeren la costruición d’aparaderos de la RENFE nos barrios de l’Argañosa y Les Maces.

Protestes pol aniciu de la Comisión de Protocolu

Andecha Astur denuncia’l marafundiu qu’apareya
L’Ayuntamientu Carreño anició, col sofitu de tolos grupos municipales (IU, PSOE, PP y Centristes), una Comisión de Protocolu qu’incluyirá una representación de caún de talos grupos. Alberto Fidalgo, voceru d’Andecha Astur en Carreño, ironizaba cola tema maxinan-do «el llaboriosu trabayu qu’esta Comisión va desen-dolcar cuandu entamen a discutir qué-y van regalar a Tini Areces na prósima visita a Candás o si los menús de les prósimes fartures van ser de carne o de pexe». Dende Andecha Astur critícase que demientres l’Ayuntamientu gastaba 6 millones de pesetes en protocolu en 1.996, el conceyal de Facienda «felicitábase pol amenorgamientu los gastos municipales, algamáu gracies, ente otres coses, al aforru que se fexo nos gastos del material que se-yos apurre a los y les traba-yadores municipales».

ANDECHA ASTUR

E-mail: andecha@asturies.org