IU, PSOE, PP y PAS ÑÉGUEN-Y A ASTURIES LA OFICIALIDÁ Y LA RECONOCENCIA NACIONAL
 

 

    Esta reforma inútil d’un estatutu impuestu non sólo mos mos ñega la  oficialidá, tamién el drechu a la soberanía nacional y al autodetermín. Y nun ye, comu diz el Pautu, culpa esclusiva del PSOE. Ye responsabilidá de tolos partíos presentes na "Junta General del Principado" ensin esceición:
PSOE, IU, PP y PAS.

    L’enfotu del Pautu de cargar toles culpes al PSOE, escaeciéndose de la responsabilidá del restu los partíos, coincide "sosprendentemente" cola táutica ellectoral que desendolca IU nesta tema. Lo mesmo qu’abulta llamativa la "coincidencia" nel tiempu d’esta movilización col francimientu rellaciones ente’l PSOE ya IU pa consensuar la reforma’l "Estatuto". Asina daquién podría camentar que’l Pautu se moviliza en fonción de les necesidaes concretes de dalgún partíu.

    PP, PAS, IU y PSOE tuvieron/tienen o sofitaron/sofiten gobiernos "regionales" y municipales ensin aperiar yá non la oficialidá, sinón nin siquier una política llingüística digna. Hai que recordar tamién que’l posible alcuerdu pa la oficialidá algamáu agora ente IU y PP, que’l PSOE refuga, nun ye talo. Trátase d’otra engañiza política: polo que nagüen ye daqué más que por incluyir nel "Estatuto" una simplura comu que la "Junta General" pue declarar oficial l’asturianu cuandu-y pete, cosa que siempres foi llegalmente posible; lo que bramente gueten ye endurecer les posibilidaes riales de declarar la oficialidá fasta convertila nun drechu imposible d’algamar, pos agora necesítase mayoría simple y estos partíos pretenden desixir una mayoría de tres quintos de la "Junta General".

    Hai quien quema agora los sos caberos cartuchos publicitando qu’un estatutu con esa nuea torga pa la oficialidá yá sedría un estatutu dignu.
Ello aida los intereses de los partíos d’ámbetu español equí afitaos, pero ye un pilancu na recuperanza cultural y nacional d’Asturies.

    Por embargu, ANDECHA ASTUR trabaya siempres na defensa la llingua asturiana, pero refuga les táutiques ellectoralistes y esculpatories de dellos partíos, que movilicen a la sociedá sólo pa los sos porgüeyos, arrequexando los del Pueblu asturianu.

    ANDECHA ASTUR movilízase pa denunciar el calter antidemocráticu d’una reforma inútil y d’un "Estatuto" impuestu, sometíu a les llendes de la Costitución española, ensin oficialidá o con una oficialidá virtual presa de los tres quintos de la "Junta General", que nun reconoz Asturies comu nación y sol que se-y torga al Pueblu Trabayador Asturianu la posibilidá de manifestase nun referendum, comu yá mos ñegaron en 1981.

    Xixón, 13 d'avientu de 1998.