ANDECHA ASTUR PRESENTÓ
UNA ALTERNATIVA NACIONAL AL
PROCESU AUTONÓMICU

    El pasáu xueves, 10 d’avientu, Andecha Astur presentó públicamente un nueu documentu d’analís políticu qu’acaba d’espublizar esta organización nacionaliega d’izquierdes: el conocíu comu documentu "Erbíes". L’actu tuvo llugar nel Atenéu Obreru de Xixón y foron dos, Carme Pérez y Mariano Suárez, los militantes d’esta organización que s’encargaron de presentar a los asistentes y a los medios de comunicación el nueu testu.

    Los representantes d’Andecha Astur señalaron la especial sinificancia que tenía la espublización del documentu "Erbíes" al tiempu que los partíos españolistes cellebraben a lo grandón el vixésimu aniversariu la Costitución y remataben, tamién en Madrid, y otra vegada d’espaldes al pueblu asturianu, la reforma l’Estatutu d’Autonomía.

    Destacaron que’l documentu ye una visión crítica del procesu autonómicu al que l’Estáu español y los partíos españolistes sometieron Asturies dende la dómina la transición fasta la cabera reforma estatutaria. Carme Pérez afitó que "el documentu supón un novedosu esfuerciu d’interpretación política de los caberos venti años y ye tamién una argumentada defensa de l’alternativa que representa’l nacionalismu d’izquierdes: un Estatutu Nacional
p’Asturies". Tamién señaló la importancia que’l documentu va tener nes actividaes internes que na estaya de formación desendolca esta organización.
Pel so llau, la intervención de Mariano Suárez centróse na esposición de los
principales apartaos del documentu.

    Los representantes d’Andecha Astur plantegaron que la Costitución española nun ye sinón la consecuencia d’una reforma de la dictadura franquista, qu’aceutaron pautar UCD, PSOE, AP y PCE y que supunxo l’asimilación llegal de toles naciones del Estáu nuna patria obligada.
Afitaron tamién que’l documentu recién asoleyáu señala cómu, frente a la voluntá soberana de los pueblos, la Costitución pon al exércitu comu garante de la "xunidá d’España", suponiendo ello’l sometimientu militar de la soberanía nacional d’Asturies y, en consecuencia, el calter antidemocráticu del propiu testu costitucional.

    Dende’l so puntu vista’l "Estatuto de Autonomía del Principado de Asturias" ye un estatutu impuestu, "fechu ensin consultar col pueblu asturianu, pos en 1981 PSOE, AP (PP), PCE (IU) y UCD ñegáronse a ello y llantáronmos un Estatutu de ´vía lenta` que nun mos dexaron nin votar, mínimu democráticu que sí ´permitieron`a catalanes, vascos, gallegos y andaluces". Tamién sopelexaron que l’Estatutu conderga a Asturies a ser una
autonomía de tercer categoría y que ñega la reconocencia de la cultura y llingua de nueso, convirtiéndoles n’anéudota folclórica.

    Andecha Astur denunció nesti actu que ven a Asturies frayada tres cuasi dos décades d’autonomía y sometimientu a intereses ayenos, cola soberanía nacional afogana pol Estatutu y coles clases trabayadores que nun-yos dexen decidir el so futuru.

    Pesie a que los partíos con presencia na Xunta Xeneral valoraron nel so día que la reforma l’Estatutu d’Autonomía yera pernecesaria, anque nun coincidieren nes reformes a facer nél, Andecha Astur desmárcase dafechu d’esta posición col so documentu "Erbíes". Esta organización nacionaliega diz que l’Estáu español necesitaba la reforma l’Estatutu porque la bultable diferencia competencial qu’anguañu hai ente les estremaes comunidaes
autónomes taba menaciando la estabilidá del propiu Estáu. Ya interpreta que PP, PSOE, IU y PAS punxéronse otra vegada al sirviciu la xunidá del Estáu español, faciendo una reforma inútil d’un estatutu impuestu. Al empar que desplica que, nesti contestu, términos comu "autonomía plena" o "autogobiernu" son pallabres vacíes que sólo faen referencia a una descentralización alministrativa y que nun suponen nengún proyeutu nacionaliegu nin d’izquierda, sinón que, en realidá, son un mecanismu pa integrar los plantegamientos nacionaliegos nun contestu rexonalizante pa que puean ser asimilaos y neutralizaos más cenciellamente pol Estáu.

    Los representantes d’Andecha acusaron a los partíos parllamentarios de facer por "criminalizar l’autodetermín comu conceutu políticu, comu drechu d’un pueblu y comu opción política", mentres intenten convencer a la xente de que reformar l’Estatutu y llendase a la Costitución ye avanzar haza la soberanía. Y recordaron que la so organización ñega esa posibilidá y dende la creyencia que la soberanía tiense o nun se tien, pero que nun almite graos, vindiquen "el drechu al autodetermín del pueblu asturianu: el drechu
a decidir el proyeutu de futuru comu pueblu y el nivel de rellación o independencia con respeutu a otres rialidaes nacionales".

    Finaron señalando que l’alternativa nacional d’izquierda pasa por un Estatutu Nacional d’Asturies. Ente los fundamentos que consideren básicos nesi Estatutu Nacional incluyeron: "la reconocencia de la realidá nacional asturiana, el drechu al llibre autodetermín, la xunidá política y territorial de la nación asturiana, l’asturianu comu llingua nacional y prioritaria y, a lo postrero, la necesidá de que seyan les clases populares
y trabayadores les que protagonicen la necesaria tresformación social y política d’Asturies haza una sociedá más xusta, igualitaria, non sesista, desmilitarizada, ecolóxica y con especial pricuru pa colos seutores anguañu marxinaos o amenorgaos".

    A lo cabero, repartiéronse exemplares del documentu asoleyáu a tolos asistentes y entamóse un alderique con ellos. Ente les custiones qu’espertaron interés destacó la temprana apaición n’Asturies d’organizaciones nacionaliegues vindicando la reconocencia d’un pueblu soberanu y tamién el papel qu’anguañu representaba’l Pautu pola Oficialidá y l’Autogobiernu, ésti foi interpretáu nel alderique comu un mecanismu partidista d’axitación social controláu al sirviciu d’una conceición centralizada del Estáu, comu ye la que defende Izquierda Xunida, según manifestaron los representantes d’Andecha Astur.

    Anuncióse qu’esti actu de presentación yera’l primeru pero que formaba parte d’una campaña cola que la organización nagua por alitar per tol país l’alderique social al rodiu la reforma estatutaria, les responsabilidaes de la Xunta Xeneral y la necesaria reconocencia nacional d’Asturies. Esta campaña inclúi tamién l’espardimientu del trípticu tituláu "Un estatutu impuestu. Una reforma inútil. Una Asturies soberana", ansí comu varios actos
públicos y actividaes internes de formación.
 
 
 
 

    Xixón, 11 d'avientu de 1998.