La Sociedá Municipal del Teatru Xovellanos prima los aspeutos económicos sobro los culturales
 

L'anuncia fecha ayeri pol so presidente David Gutiérrez, de que la Sociedá Municipal del Teatru Xovellanos algamó un superavi de 27 millones nesti branu, lloñe de suponer una bona anuncia comu aparentemente se quier, costitui la reconocencia d'una política que prima los aspeutos económicos sobro los culturales.

Andecha Astur atalanta que la función a desendolcar dende la SMTX nun ye tanto "benficiar la imaxe y la economía de Xixón" comu la de convertise en foru que dea puxu a l'actividá cultural de Xixón y Asturies, abriéndose a la so utilización polos estremaos grupos de música y teatru xixoneses y asturianos, ainda cuandu ello nun suponga una rentabilidá económica imediata.

Nesti sen, hai de destacar la probe ufierta de programación que favoreza les actuaciones d'estos grupos, mentes que la primacía de "la calidá sobro la cantidá" de la que falen los responsables de la SMTX supón en rialidá el bloquéu pa tola actividá cultural xenerada nel nuesu conceyu, y el vuelcu de la programación haza espeutáculos que yá sabemos d'antemán que cunten con gran acetación social (comu pue ser el casu d'Alejandro Sanz), pero que resulten inrelevantes dafechu a la hora de dinamizar l'actividá cultural de Xixón y Asturies.

Ello asina, ANDECHA ASTUR pidi un cambiu d'orientación na política de la SMTX, de tala miente que, ensin escaecese de los aspeutos púramente económicos, los oxetivos seyan favorecer la participación cultural y la potenciación de los grupos llariegos, y non la esibición d'espeutáculos "de masa" quiciavis perrentables económicamente pero que suponen una aportación cultural nula pa la nuesa tierra.