|
NEHIMNAJ DISERVAJ MATERIALOJ |
TTT-HIMNARO CIGNETA
DEDIĈITA AL LA GLORO DE DIO
La Antifonaro "O"
La adventa himno Veni Emmanuel estas bazita sur la "O-Antifonaro", sepopo da mallongaj preĝoj kreita en frumezepoka Romkatolikismo kiel antifonaro por la Maria Kanto (Magnificat) dum la vespraj Diservoj de la 17a ĝis la 23a de decembro inkluzive. Ĉiu antifono post komenca "O" ("Ho") nomas Kriston per iu titolo el la Hebrea Biblio, kaj preĝas, ke Tiu venu al Sia Izraelo. La fina antifono, je la 23a, respondas al la unua strofo de la himno. La Esperanta traduko de Beveridge havas nur kvin strofojn; mankas la originalaj Ho Saĝo kaj Ho Reĝo de la Nacioj. La mankoj estas plenigitaj en la 7-strofa versio, kaj la strofordo spegulas la perdiĝintan latinan akrostikon — en la originalo la komencliteroj de la Kristaj Titoloj, retrolegate, literumas "ERO CRAS", t.e. "Mi estos (tie) morgaŭ" — kion nek Beveridge nek Neale eĉ provis redoni. (La latinaj titoloj estas "Emmanuel", "Rex Gentium", "Oriens", "Clavis David", "Radix Jesse", "Adonai" kaj "Sapientia".) La O-Antifonoj estiĝis en la jarcentoj 7a ĝis 9a. La himno verŝajne ne estas tiom antikva, sed eĉ tio ne maleblas, kaj iuj katolikoj asertas ke la himno estas preskaŭ samepoka kun la antifonoj.
Jen estas la antifonaro (laŭ sudafrika anglikana teksto anglalingva):
- [O Sapientia, 17 dec]
Ho Saĝo, vi venis el la lipoj de plej alta Dio,
kaj vi etendiĝas de unu ekstremaĵo de la universo ĝis la alia,
potence kaj milde ordigante ĉiujn aferojn:
Venu por instrui al ni la vojon prudentan.
- [O Adonai, 18 dec]
Ho Sinjoro kaj Gvidanto de la domo de Izrael,
vi aperis al Moseo en la flamo de brulanta arbedo
kaj ĉe Sinaj vi donis al li la leĝon:
Venu kun via etendita brako por savi nin.
- [O Radix Jesse, 19 dec]
Ho Ŝoso de Jiŝaj, vi staras kiel signo al la gentoj;
antaŭ vi reĝoj silentas kaj la nacioj preĝas sopirante:
Venu nun kaj liberigu nin.
- [O Clavis David, 20 dec]
Ho Ŝlosilo Davida kaj reganto de la domo de Izrael,
vi malfermas kaj neniu povas fermi; vi fermas kaj neniu povas malfermi:
Venu kaj konduku el la prizona ĉelaro la kaptitojn,
kiuj sidas en mallumo kaj en la ombro de la morto.
- [O Oriens, 21 dec]
Ho Ruĝo Orienta, vi estas la grandiozo de eterna vivo;
vi estas la aŭrora suno, la Suno de justeco:
Venu kaj ilumini tiujn, kiuj sidas en mallumo
kaj en la ombro de la morto.
- [O Rex Gentium, 22 dec]
Ho Reĝo de la nacioj kaj la plenumo de ilia sopirado,
vi estas la Ŝtono bazangula kaj vi unuigas ĉion;
vi formis nin el argilo praepoka:
Venu kaj savu nin.
- [O Emmanuel, 23 dec]
Ho Emanuel, nia Reĝo kaj leĝdonanto,
la popolo atendas vin, sian Savonton:
Venu kaj savu nin, ho Sinjoro nia Dio.
Verkis: ROS' Haruo, 2004.12.05
- Konsultitas:
- Kir-Shalom
- Bizancia Katolika Preĝejo de S-ta Anna
- Ho venu vi, Emanuel' (en THC)
- Mudcat Café
is affiliated with
Eldonejo Cigneto