Es begab sich aber, das ainer zu Guettenstein, genannt Jacob Friderrich, dess vatter
ain lediger von Ramsperg gewesen, von ungefell also gebrochen war und der pruch
also heftig zuname, das er mit keiner mentschlichen hilf getrawete zu genesen. Der
lag nun einer nacht und betrachtet sein gebresten und fiel im für, das er die
allerhailigest junkfraw Mariam und s. Verenam sollte anriefen, seine getrewe
fürbitterin bei Got dem allmechtigen zu sein, und so der enden zu Ingelswies
widerumb ain kirchen gebawen, wie der hirt vilmals fürgeben hette, wellte er
den bösten ochsen in seiner rindermänni daran zu bawstewr geben.
Darauf ist er entschlaffen, und als er des morgens wiederumb ufgestanden, hat im nichs
mehr gebrosten, sonder ist seins vorgesagten brestens halb wunderbarlichen
gesundt gewesen, in maßen, wiewol er hernach ob den vierundzwanzig jaren noch
gelept, so hat sich der brösten doch an im nit mehr erzaigt, sonder ist dess die
überigen tag seins lebens ledig und genzlich genesen, dess der dann Got dem
allmechtigen zu vorderst und dann seinen fürbitterin ires getrewen fürbitts
fleißigen dank sagt, auch volgends den ochsen, wie er den in seinem höchsten
anligen und kumer verhaißen mit willen erstattet hat..